రాజశేఖర్‌ రాజీనామా.. ఈ షాక్‌ ‘మా’మూలేనా.?

మూవీ ఆర్టిస్ట్స్‌ అసోసియేషన్‌ ఉపాధ్యక్ష పదవికి (ఎగ్జిక్యూటివ్‌ వైస్‌ ప్రెసిడెంట్‌) సినీ నటుడు రాజశేఖర్‌ రాజీనామా చేశారు. ఈ రోజు ఉదయం మూవీ ఆర్టిస్ట్స్‌ అసోసియేషన్‌ ఆధ్వర్యంలో డైరీ ఆవిష్కరణ కార్యక్రమం జరగడం, ఆ కార్యక్రమానికి ముఖ్య అతిథులుగా మెగాస్టార్‌ చిరంజీవితోపాటు, సీనియర్‌ నటుడు కృష్ణంరాజు సహా సినీ ప్రముఖులు మోహన్‌బాబు, సుబ్బిరామిరెడ్డి, మురళీమోహన్‌ తదితరులు హాజరవడం, ఈ క్రమంలో రాజశేఖర్‌ చేసిన వ్యాఖ్యలు కొంత గలాటాకు కారణమవడం తెల్సిన విషయాలే.

రాజశేఖర్‌ వ్యవహారంపై మొత్తంగా అందరూ అసహనం వ్యక్తం చేశారు.. చిరంజీవి, మోహన్‌బాబు సహా. రాజశేఖర్‌పై క్రమశిక్షణా చర్యలు తీసుకోవాల్సిందేనన్న డిమాండ్‌ కూడా తెరపైకొచ్చింది. ‘ఎటూ పదవి పోతుంది’ అన్న ఆలోచనతోనే బహుశా రాజశేఖర్‌, తన పదవికి ముందస్తుగా రాజీనామా చేశారేమో. అయినా, జరిగిన ఘటనపై జీవిత, మూవీ ఆర్టిస్ట్స్‌ అసోసియేషన్‌కి, మరీ ముఖ్యంగా ఈ కార్యక్రమానికి హాజరయిన సినీ పెద్దలందరికీ రాజశేఖర్‌ తరఫున క్షమాపణ చెప్పిన తర్వాత కూడా, రాజశేఖర్‌ ఎందుకు రాజీనామా చేయాల్సి వచ్చిందో ఏమో.!

ఒక్కటి మాత్రం నిజం.. ‘మా’లో విభేదాలున్నాయి. అవి సర్వసాధారణమైన విషయాలే. మూవీ ఆర్టిస్ట్స్‌ అసోసియేషన్‌ విషయమై కొందరు సినీ ప్రముఖులు ‘అత్యుత్సాహం’ ప్రదర్శిస్తున్నారుగానీ, ఆ పదవుల ద్వారా అదనంగా ఆయా సినీ ప్రముఖులు పొందే పబ్లిసిటీ కావొచ్చు, ఇతరత్రా ప్రయోజనాలు కావొచ్చు.. ఏమీ వుండవు. అయినా, ఎందుకో ఈ రచ్చ.! చాలాకాలంగా వరుస ఫ్లాపుల్ని ఎదురుచూసిన రాజశేఖర్‌, ‘గరుడవేగ’, ‘కల్కి’ సినిమాలతో లైమ్‌లైట్‌లోకి వచ్చినట్లే వచ్చి.. ఈ మధ్య వరుస వివాదాలతో తన ఇమేజ్‌ని మళ్ళీ తానే నాశనం చేసుకుంటుండడం దురదృష్టకరం.