పవన్ కల్యాణ్ బర్త్ డే స్పెషల్స్: సామాజిక బాధ్యత, ప్రజా చైతన్యమే పవన్ కల్యాణ్ ‘జనసేన’

‘భవిష్యత్తులో కల్యాణ్ పూర్తిగా సినిమాలే చేస్తాడని నాకు నమ్మకం లేదు. సమాజం కోసం నిలబడతాడని చెప్పగలను. అతని ఆలోచనలు, భావాలు వేరు’.. అని పవన్ కల్యాణ్ తండ్రి కొణిదెల వెంకట్రావు ఓ ఇంటర్వ్యూలో చెప్పారు. వరుస హిట్లతో టాలీవుడ్ ని షేక్ చేస్తున్న పవన్ పై అభిమానులు, ప్రేక్షకుల అంచనాలు పెరిగిపోయిన దశలో.. ఆయన మాటలు ఎవరికీ నిజమనిపించలేదనే చెప్పాలి. ఇందుకు సినిమాలపైనే పవన్ ఫోకస్ చేయడం ఒక కారణం. అయితే.. తనకు సినిమాల కంటే ప్రజలు, సమాజం, సామాజిక బాధ్యతే సంతృప్తినిస్తుందని చెప్పేవారు పవన్. తండ్రి మాటలను ఆయన మరణానంతరం ఏడేళ్లకు నిజం చేశారు. తన ఆలోచనలను 2014 మార్చి 14న ‘జనసేన’ పార్టీ ఏర్పాటుతో వాస్తవంలోకి తెచ్చారు. తొలి ప్రసంగంతోనే ప్రజలవైపు తానెంత బలంగా నిలబడతానో నిరూపించారు పవన్ కల్యాణ్.

ప్రజా సమస్యలపై పోరాటం..

నిజానికి 2007లో ప్రారంభించిన కామన్ మెన్ ప్రొటెక్షన్ ఫోర్స్ నే భవిష్యత్తు ప్రణాళికగా పవన్ పెట్టుకున్నారని చెప్పాలి. అయితే 2014లో జరిగిన రాజకీయ పరిణామాలు, కాంగ్రెస్ విధానాలు పవన్ ఆలోచనలను మార్చి జనసేన ఏర్పాటుకు దారి తీశాయి. ‘కాంగ్రెస్ హఠావో.. దేశ్ బచావో’ అంటూ పార్టీ ఆవిర్భావ సభలోనే నినదించి ప్రకంపనలు రేపారు. ఆ ఏడాది జరిగిన సార్వత్రిక ఎన్నికల్లో పోటీ చేయకపోయినా.. తెలుగుదేశం, బీజేపీ కూటమికి మద్ధతు ప్రకటించి ముఖ్యంగా ఏపీలో టీడీపీ అధికారంలోకి రావడానికి ప్రధాన కారణంగా నిలిచారు. తాను ప్రశ్నించేందుకే పార్టీ పెట్టానని ప్రజా సమస్యలపై అధికార పార్టీ నిర్లక్ష్యం వహిస్తే ప్రజల తరపున ప్రశ్నించి వారికి అండగా నిలుస్తానని అన్నారు. తదనంతర పరిణామాల్లో రాజకీయ విబేధాలతో కూటమి నుంచి విడిపోయి టీడీపీ ప్రభుత్వంపై విరుచుకుపడ్డారు. రాజధాని అమరావతి భూముల విషయంపై టీడీపీ ప్రభుత్వ తీరును బహిరంగంగానే విమర్శించారు.

ప్రజా సమస్యలే ప్రభావం చూపి..

సినిమాల్లో పవన్ కల్యాణ్ కు ఉన్న అప్రతిహతమైన క్రేజ్, రాజకీయాల్లోనూ అక్కరకొచ్చింది. ‘ప్రభుత్వాన్ని నడపడం తేలిక.. పార్టీని నడపటం చాలా కష్టం’ అని పొలిటికల్ మాట. క్యాడర్, బూత్, కమిటీ, నాయకులు అందరినీ ఏకతాటిపై నడిపించాలి, గ్రామస్థాయిలో పార్టీని పటిష్టం చేయాలి. సినిమాలు చేస్తూనే సోషల్ మీడియా ద్వారా సమస్యలను వెలుగులోకి తెచ్చారు. శ్రీకాకుళం జిల్లాలో ఉద్ధానం కిడ్నీ బాధితుల సమస్యపై స్పందించి హార్వార్డ్ నుంచి డాక్టర్లను రప్పించారు. పవన్ ఎఫెక్ట్ తో అప్పటి టీడీపీ ప్రభుత్వం అక్కడ డయాలసిస్ సెంటర్ల ఏర్పాటు చేసిందంటే అతిశయోక్తి కాదు. 2009లో ప్రజారాజ్యం పార్టీలో యువరాజ్యం అధ్యక్షుడిగా పని చేసారు పవన్ కల్యాణ్. ఎన్నికల ప్రచారంలో భాగంగా నల్గొండ జిల్లాలో ఫ్లోరైడ్ సమస్య చూసి చలించిపోయారు. ఇలాంటి సంఘటనలే పవన్ ను రాజకీయాల్లోకి వచ్చేలా చేశాయి.