బీజేపీతో టీడీపీ పొత్తు.! ‘తూచ్’ అనేసిన బీజేపీ కీలక నేత.!

రాజకీయ పార్టీల మధ్య పొత్తులు అధిష్టానం స్థాయిలో జరుగుతాయ్.! కింది స్థాయి నాయకులు, పార్టీలో ముఖ్య నేతలు పొత్తుల గురించి మాట్లాడితే, అందులో ఎంత వాస్తవం.? అన్నదానిపై మళ్ళీ భిన్న వాదనలుంటాయ్.! రాజకీయాలన్నాక గాసిప్స్ సహజం. అదే సమయంలో లీకులు కూడా సర్వసాధారణం.

అసలు విషయమేంటంటే, బీజేపీ – టీడీపీ మధ్య మళ్ళీ ‘స్నేహం’ చిగురిస్తోందంటూ నేషనల్ మీడియాకి చెందిన ఓ న్యూస్ ఛానల్ కొన్నాళ్ళ క్రితం బ్రేకింగ్ న్యూస్ ప్రసారం చేసింది. దానిపై విశ్లేషనాత్మక కథనాన్ని కూడా మాంఛి మసాలా దట్టించి.. వండి వడ్డించింది. అది ‘రిపబ్లిక్’ ఛానల్. ఆ ఛానల్, భారతీయ జనతా పార్టీకి కొమ్ము కాసే ఛానల్ అన్నది జగమెరిగిన సత్యం.

మరోపక్క, టీడీపీ అను‘కుల’ మీడియాలోనూ బీజేపీ – టీడీపీ పొత్తు గురించి కథనాలొచ్చాయి. చినబాబు నారా లోకేష్ చొరవతో బీజేపీ – టీడీపీ పొత్తు ఖాయమైపోయిందన్నది ఆ టీడీపీ అను‘కుల’ మీడియా చర్చల సారాంశం. సరే, విషయమైతే.. బీజేపీ – టీడీపీ పొత్తు దిశగా సంకేతాలు పంపుతోంది. అందులో కొంత వాస్తవం లేకపోలేదు.

కానీ, తెలంగాణ బీజేపీ నేత డాక్టర్ లక్ష్మణ్ మాత్రం ‘బీజేపీ – టీడీపీ మధ్య పొత్తు లేదు, వుండబోదు..’ అని సెలవిచ్చేశారు. తెలంగాణలో టీడీపీ అవసరం తమకేమీ లేదని చెప్పారాయన. ఒంటరిగానే తెలంగాణలో బీజేపీ అధికారంలోకి వస్తుందనీ లక్ష్మణ్ చెప్పుకొచ్చారు. అన్నట్టు, తెలంగాణలో జనసేనతో కూడా బీజేపీకి పొత్తు లేదట.

ఆంధ్రప్రదేశ్ రాష్ట్రంలో మాత్రం బీజేపీ – జనసేన మధ్య పొత్తు వుందట. ఆ రెండు పార్టీలు కలిసి ఎన్నికలకు వెళతాయట. ఇదీ ఏపీ గురించి డాక్టర్ లక్ష్మణ్ చేసిన వ్యాఖ్యల సారాంశం. ఏపీలో జనసేన మిత్ర పక్షం.. తెలంగాణలో జనసేనతో పొత్తు లేదు గనుక, ఒకవేళ జనసేన తెలంగాణలో కూడా పోటీ చేస్తే.. బీజేపీ వర్సెస్ జనసేన.. అనుకోవాలేమో.! ఇది కాస్త ఇంట్రెస్టింగ్ ఫైట్ అవుతుంది.

తెలంగాణ బీజేపీ నేతల్లో కొందరు జనసేనతో బీజేపీ స్నేహాన్ని ఒప్పుకోవడంలేదు. కానీ, బీజేపీ అధిష్టానానికి ఓ క్లారిటీ వుంది. ఎన్నికల సమయంలో పొత్తుల సంగతులు తేలతాయ్. బీజేపీకి టీడీపీతో కూడా అవసరం వుందన్నది నిర్వివాదాంశం. ఆ వ్యవహారంపై ముందు ముందు స్పష్టత వస్తుంది.