తెలుగుదేశం పార్టీకి ఆ పార్టీ జాతీయ ప్రధాన కార్యదర్శి నారా లోకేష్ కంటే పెద్ద శతృవు ఇంకెవరుంటారు.? ఈ చర్చ టీడీపీ వర్గాల్లోనే జరుగుతోందిప్పుడు.! టీడీపీ అధినేత నారా చంద్రబాబునాయుడు నానా తంటాలూ పడి, జనసేన పార్టీతో పొత్తుకి గ్రౌండ్ క్లియర్ చేశారు.! కానీ, ఆ పొత్తుని చెడగొట్టే దిశగా నారా లోకేష్ పావులు కదుపుతున్నట్టుంది.
తెలిసి మాట్లాడుతున్నాడో తెలియక మాట్లాడుతున్నాడోగానీ, ‘చంద్రబాబే కూటమి తరఫున ముఖ్యమంత్రి అభ్యర్థి’ అని నారా లోకేష్ చేస్తున్న ప్రకటనతో, జనసేన శ్రేణులు తీవ్ర అసహనానికి గురవుతున్నాయి.
రెండు రాజకీయ పార్టీల మధ్య పొత్తుకు సంబంధించి అధికారిక ప్రకటన, ఇరు పార్టీల అధినేతల నుంచి రావాలి. ‘జనసేనతో పొత్తుకు సిద్ధంగా వున్నాం’ అని చాలాకాలం క్రితమే టీడీపీ అధినేత నారా చంద్రబాబునాయుడు ప్రకటించారు. తెలుగుదేశం పార్టీతో కలిసి పయనించబోతున్నాం.. అని కొన్నాళ్ళ క్రితమే జనసేన అధినేత వెల్లడించారు.
మధ్యలో నారా లోకేష్ ఎవరు.? టీడీపీ అధినేత చంద్రబాబు తనయుడైనంతమాత్రాన, టీడీపీ జాతీయ ప్రధాన కార్యదర్శి హోదాలో వున్నంత మాత్రాన.. పొత్తులకు సంబంధించి ఇలా ఏకపక్షంగా లోకేష్.. కీలక ప్రకటన చేసేస్తారా అన్నది సర్వత్రా వినిపిస్తోన్న వాదన.
‘ముఖ్యమంత్రి ఎవరు అవ్వాలన్నది ఎన్నికల్లో గెలిచే సీట్లను బట్టి ఆధారపడి వుంటుంది..’ అని గతంలో జనసేన అధినేత పవన్ కళ్యాణ్ ప్రకటించారు, అదే మాటకు ఆయన కట్టుబడి వున్నారు. చంద్రబాబు కూడా, ‘నేనే ముఖ్యమంత్రి అభ్యర్థిని’ అని జనసేనతో పొత్తు అనంతరం వ్యాఖ్యానించిన సందర్భాల్లేవు.
పొత్తు కుదిరి, కింది స్థాయిలో ఇరు పార్టీల శ్రేణులు కలిసి పని చేస్తున్న తరుణంలో, ‘చంద్రబాబే ముఖ్యమంత్రి అభ్యర్థి’ అని పదే పదే నారా లోకేష్ చేస్తున్న ప్రకటనలతో, తీవ్ర గందరగోళం ఏర్పడింది. జనసేన అధినేత పవన్ కళ్యాణ్ ఈ విషయమై స్పందించాల్సి వుంది. అంతకన్నా ముందు, టీడీపీ అధినేత నారా చంద్రబాబునాయుడు, తన కుమారుడ్ని కంట్రోల్‌లో పెట్టుకోవాలన్నది జనసేన శ్రేణుల నుంచి వస్తున్న స్వీట్ వార్నింగ్.
లేదూ, చంద్రబాబు ఇలాగే వ్యవహారాన్ని సాగదీస్తే, ఇరు పార్టీల శ్రేణులకూ తప్పుడు సంకేతాలు వెళతాయి. తద్వారా ఓటు షేరింగ్ ఇరు పార్టీల మధ్యా కష్ట సాధ్యమవుతుంది. అదే జరిగితే, పొత్తు వల్ల ఇరు పార్టీలకూ ప్రయోజనం వుండదు.
కూటమి విఫలయత్నంగా మారితే, అందుకు పూర్తి బాధ్యత నారా లోకేష్ తీసుకోవాల్సిన పరిస్థితి రావొచ్చు. అప్పటికి నష్టం జరిగిపోతుంది గనుక, టీడీపీ కాలగర్భంలో కలిసిపోవడానికి నారా లోకేష్ కారకుడవుతాడు. అసలు, ఇంతటి డ్యామేజ్ జరగడానికి, నారా లోకేష్ నోటి దురద మాత్రమే కారణమా.? వ్యూహాత్మకంగానే లోకేష్ ఆ నోటి దురద ప్రదర్శించాడా.? ఏమో, చంద్రబాబు ఈ వ్యవహారాన్ని ఎలా డీల్ చేస్తారో ఏమో.!