రాజమండ్రి అభివృద్ధి: వైసీపీ ఎంపీ ఎవర్ని ర్యాగింగ్ చేస్తున్నట్టు.?

వైఎస్సార్ కాంగ్రెస్ పార్టీకి చెందిన యువ నేత, రాజమండ్రి ఎంపీ మార్గాని భరత్, సోషల్ మీడియా వేదికగా ఓ ఆసక్తికరమైన పోస్ట్ పెట్టారు. ‘రాజమండ్రి అభివృద్ధి’ అంటూ వైసీపీ అధినేత, ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డి ఫొటోతో పలు అంశాల్ని అందులో పేర్కొన్నారు. వాటిల్లో అతి ముఖ్యమైనది ‘ఔటర్ రింగ్ రోడ్డు’. ఈ దెబ్బకి రాజమండ్రి లోక్ సభ నియోజకవర్గ ప్రజలకు ఒక్కసారిగా షాక్ తగిలింది.

అంతేనా, అందులో చాలా అద్భుతాలున్నాయి. ప్రపంచ స్థాయి రోడ్లు.. వరల్డ్ క్లాస్ సిటీ.. చెప్పుకుంటూ పోతే ఒకటా.? రెండా.? బోల్డన్ని వున్నాయ్. అన్నట్టు, ఇంకో అద్భుతం కూడా వుందండోయ్.. అదే అంతర్జాతీయ క్రికెట్ స్టేడియం. ఇవన్నీ ఎక్కడున్నాయ్.? అని మాత్రం అడక్కండి. కావాలంటే, రాజమండ్రి వెళ్ళి చూసుకోండి. రాజమండ్రి విమానాశ్రయంలో కొత్త కార్గో టెర్మినల్ దగ్గర్నుంచి, రాజమండ్రి రైల్వే స్టేషన్‌లో కొత్తగా 4, 5 ప్లాట్‌ఫారంల అంశం వరకు.. ఏదీ వదలకుండా అన్నిటినీ అందులో పొందుపరిచేశారు ఎంపీ మార్గాని భరత్.

‘వైసీపీ గ్రామ సింహాలు..’ అంటూ జనసేన అధినేత పవన్ కళ్యాణ్, వైసీపీ ప్రభుత్వ వైఫల్యాల గురించి పేర్కొంటూ ఇటీవల ఓ ట్వీట్ చేసిన విషయం విదితమే. దానికి కొనసాగింపుగా మరో ట్వీట్ కూడా వేశారు పవన్ కళ్యాణ్. వాటికి సమాధానంగా వైసీపీ నుంచి ఇప్పుడు మార్గాని భరత్ రామ్ ఇలా ట్వీట్ వేశారా.? లేదంటే, తన నియోజకవర్గ పరిధిలోని ఓ వైసీపీ ఎమ్మెల్యే తనకు ఎదురు తిరగడం.. ఈ క్రమంలో నడిచిన పంచాయితీ, ముఖ్యమంత్రి వైఎస్ జగన్ చీవాట్లతో.. మార్గాని భరత్ మనసు మార్చుకుని.. అధికార పార్టీని ‘ట్రోలింగ్’ చేస్తున్నారా.? అన్నది తేలాల్సి వుంది.

లేకపోతే, రాజమండ్రిలో రింగ్ రోడ్డు ఏంటి.? రాజమండ్రిలో అంతర్జాతీయ విమానాశ్రయమేంటి.? గట్టిగా వర్షం కురిస్తే.. రాజమండ్రిలో చాలా ప్రాంతాలు మునిగిపోతున్నాయి. ట్రాఫిక్ అస్తవ్యస్థం. ప్రపంచ స్థాయి రోడ్లు వున్నాయా.? అసలు రోడ్లున్నాయా రాజమండ్రిలో.. అనే సందేహం వాహనదారులకు కలుగుతుంటేనూ.!

నో డౌట్, ఎమ్మెల్యే – ఎంపీ మధ్య ఆధిపత్య పోరులో భాగంగా అధికార పార్టీని భరత్ రామ్ ట్రోల్ చేసేందుకే ఈ ట్వీటేశారని అనుకోవాలేమో. అంతేనా, జనసేన అధినేత పవన్ కళ్యాణ్ అక్టోబర్ 2న రాజమండ్రిలో శ్రమదానం చెయ్యనున్న దరిమిలా.. ఆదిరిపడుతూ భరత్ రామ్ ఈ పబ్లిసిటీ స్టంటుకి తెరలేపారా.?