దేవినేని అవినాష్ పై మళ్లీ మైండ్ గేమ్

టీడీపీ యువ నేత దేవినేని అవినాష్ కు పొగ పెడుతున్నారా? సొంత పార్టీలోనే ఆయనకు వ్యతిరేకంగా ప్రచారం సాగుతోందా? ప్రస్తుత పరిణామాలు చూస్తుంటే అలాగే కనిపిస్తున్నాయి. ఇటీవల ఎన్నికల్లో ఓటమి తర్వాత దేవినేని అవినాష్ పై వ్యతిరేక ప్రచారం ఊపందుకుంది. ఆయన పార్టీ మారతారని, వైఎస్సార్ సీపీలో చేరతారంటూ విస్తృతంగా ప్రచారం సాగింది. అయితే, అలాంటిది ఏమీ లేదని ఆయన పలుమార్లు స్పష్టంచేశారు. కంఠంలో ప్రాణం ఉన్నంత వరకు టీడీపీలోనే ఉంటానని పేర్కొన్నారు.

అయినప్పటికీ, అవినాష్ కు వ్యతిరేకంగా ప్రచారం మాత్రం ఆగడంలేదు. టీడీపీకి చెందిన సోషల్ మీడియాలోనే అవినాష్ కు వ్యతిరేకంగా ప్రచారం సాగుతోంది. వైఎస్సార్ సీపీ అధినేత వైఎస్ జగన్ మోహన్ రెడ్డితో సమావేశమయ్యారని, పార్టీ మార్పు ఖాయమని ట్రెండ్ చేస్తున్నారు. దీనిపై అవినాష్ తీవ్ర అసహనం వ్యక్తం చేస్తున్నారు. తన ఎదుగుదలను ఓర్వలేక పొగ పెడుతున్నారని ఆవేదన వ్యక్తంచేస్తున్నారు.

ప్రతిరోజూ తాను పార్టీ మారేది లేదనే వివరణ ఇవ్వాల్సి వస్తుందని వాపోతున్నారు. వాస్తవానికి వైఎస్సార్ సీపీ సైతం పార్టీ బలోపేతానికి నేతల చేరికను ప్రోత్సహిస్తోంది. టీడీపీలోని కీలక నాయకులను చేర్చుకునే ప్రక్రియకు తెర తీసింది. ఇందులో భాగంగా అవినాష్ కు కూడా ఆహ్వానం పంపినట్టు సమాచారం. విజయవాడ తూర్పు నియోజకవర్గ బాధ్యతలు అప్పగిస్తామని ఆఫర్ చేసినట్టు చెబుతున్నారు. అయితే, అందుకు ఆయన అప్పట్లో అంత సానుకూలత వ్యక్తం చేయలేదు.

తాజాగా మున్సిపల్ ఎన్నికలకు సమయం సమీపిస్తున్న నేపథ్యంలో తాము బలహీనంగా ఉన్న చోట్ల ప్రత్యర్థి పార్టీ నేతలను చేర్చుకుని బలం పెంపొందించుకోవాలని అధికార పార్టీ యోచిస్తోంది. ఇందులో భాగంగానే అవినాష్ పై మైండ్ గేమ్ మొదలుపెట్టిందని అంటున్నారు. టీడీపీకి రాష్ట్రంలో ఇక భవిష్యత్తు లేదని, ఈ సమయంలోనే సరైన నిర్ణయం తీసుకోవాలని ఆయనకు సూచనలు చేస్తున్నారని తెలుస్తోంది. మరి వీటిపై అవినాష్ ఎలా స్పందిస్తారో చూడాలి.