ముందు దేశం, త‌రువాత పార్టీ: ఎల్‌కె అద్వానీ

బిజెపి కురువృద్ధుడు ఎల్‌కె అధ్వానీ చాలా రోజుల త‌రువాత త‌న మ‌నో భావాల‌ను బ్లాగ్‌లో పంచుకున్నారు. ఒక దశ‌లో దేశ‌వ్యాప్తంగా ర‌థ‌యాత్ర‌చేసి, బిజెపికి ఊపిరి పోసిన నేత ఆయ‌న‌. 1991 నుంచి వ‌రుస‌గా ఆరు సార్లు గుజ‌రాత్‌లోని గాంధీన‌గ‌ర్ నుంచి ఎన్నిక‌వుతూ వ‌స్తున్నారు. కానీ ఈ సారి ఆయ‌న‌కు టిక్కెట్ ద‌క్క‌లేదు.

ఉప ప్ర‌ధానిగా ప‌నిచేసిన ఆయ‌న ఏదో ఒక రోజు భార‌త ప్ర‌ధానిగానో లేదా రాష్ట్రప‌తి గానో ఆయ‌న‌ను చూడాల‌ని అభిమానులు ఆశించారు. కానీ ఆ అవ‌కాశాలు ఇప్పుడు స‌న్న‌గిల్లాయి. ఈ నేప‌థ్యంలోనే బ‌హుశ ఇప్పుడు త‌న మ‌నో భావాల‌ను బ‌య‌ట‌పెట్టారు. ఏప్రిల్ ఆరున బిజెపి వ్య‌వ‌స్థాప‌క దినోత్స‌వం జ‌రుపుకుంటున్న సంద‌ర్భంగా కార్య‌క‌ర్త‌ల‌కు త‌న సందేశ‌మిస్తూ బిజెపి నేత‌ల‌కు ఇది ముఖ్య‌మైన రో జ‌ని, ప్ర‌తి కార్య‌క‌ర్త ఆత్మ ప‌రిశీల‌న‌తో పాటు గ‌త జ్ఞాప‌కాల‌ను , భ‌విష్య‌త్ కార్య‌చ‌ర‌ణ‌ను ఆలోచించ‌వ‌ల‌సిన అవ‌స‌రం ఉంద‌ని హిత‌వు ప‌లికారు.

బిజెపి శ్రేణులు త‌న‌పై చూపిన అభిమానం, గౌర‌వాల‌కు తాను రుణ‌ప‌డి ఉన్నాన‌ని, గాంధీన‌గ‌ర్ ప్ర‌జ‌ల‌కు కూడా కృత‌జ్ఞ‌త‌లు చెపుతున్నాన‌ని ఆయ‌న అన్నారు. తాను త‌న 14 వ ఏట‌నే ఆర్ ఎస్ ఎస్ లో చేరాన‌ని, అప్ప‌టి నుంచి మాతృభూమికి సేవ చేయ‌డం అల‌వాటుగా మారింద‌ని త‌న రాజ‌కీయ జీవితంలో జ‌న‌సంఘ్‌, బిజెపిల‌తో ఏడు ద‌శాబ్దాలు విడ‌దీయ‌లేని అనుబంధం ఉంద‌ని పేర్కొన్నారు.

దీన్‌దయాళ్‌ ఉపాధ్యాయ, అటల్‌ బిహారీ వాజ్‌పేయీతో పాటు పలువురు స్ఫూర్తిదాయక, నిస్వార్థ నేతలతో పని చేసే గొప్ప అవకాశం త‌న‌కు దక్కింది. మొదట దేశం.. ఆ తర్వాత పార్టీ.. సొంత ప్రయోజనాలు చిట్టచివర.. అనే స్ఫూర్తిదాయక సూత్రాన్ని నేను నా జీవితంలో అన్ని పరిస్థితుల్లోనూ పాటించాన‌ని అద్వానీ పేర్కొన్నారు. స్వాతంత్ర్యం, ఐక్యత, ప్రజాస్వామ్య వ్యవస్థలతో పాటు మీడియా స్వేచ్ఛ, ఎన్నికల సంస్కరణలు, పారదర్శకతలను కాపాడడానికి బిజెపి క‌ట్టుబ‌డి ఉంటుంద‌ని ఆయ‌న అన్నారు. మన దేశ ప్రజాస్వామ్య విలువలను బలపరచడానికి మనమంతా ఐక్యంగా పోరాడాలన్నదే త‌న కోరిక అని అద్వానీ నొక్కి చెప్పారు. అంతేకాకుండా . మీడియాతో పాటు ప్రజాస్వామ్య వ్యవస్థలన్నీ స్వతంత్రంగా పనిచేయాలని హిత‌వు ప‌లికారు.