కేసీఆర్ మెట్టు దిగినట్టా.. దిగనట్టా?

తెలంగాణలో మూడు వారాలుగా ఉధృతంగా ఆర్టీసీ సమ్మె జరుగుతున్నా.. సమస్య పరిష్కారం కోసం గట్టి ప్రయత్నాలు జరగలేదు. ఈ నేపథ్యంలో హైకోర్టు జోక్యం చేసుకుంది. ఇరు వర్గాలూ బెట్టు వీడి మెట్టు దిగాలని పేర్కొంది. ప్రజలు ఇబ్బందులు పడకుండా సమస్యను వెంటనే పరిష్కరించుకోవాలని స్పష్టంచేసింది. ఈనెల 18నే ఇందుకు సంబంధించిన ఆదేశాలిచ్చింది.

అయితే, ఉత్తర్వులు ప్రతి అందే వరకు హడావుడి పడక్కర్లేదని భావించిన ప్రభుత్వం.. అవి అందే వరకు తీరిగ్గా వేచి చూసింది. ఎట్టకేలకు మంగళవారం హైకోర్టు ఉత్తర్వులు ప్రభుత్వానికి అందడంతో రాత్రికి సీఎం కేసీఆర్ సమీక్ష నిర్వహించారు. కోర్టు ఆదేశాలకు లోబడి ఈ అంశంలో ముందుకెళ్లాలని నిర్ణయించారు. అయితే, ప్రభుత్వంలో ఆర్టీసీ విలీనం మినహా మిగిలిన డిమాండ్లను మాత్రమే పరిశీలించాలని స్పష్టంచేశారు. ఇందుకు కొత్త భాష్యం కూడా చెప్పారు.

కార్మికులే విలీనం డిమాండ్ ను సొంతంగా వదులుకున్నారని, అదే విషయాన్ని కోర్టులో చెప్పారని పేర్కొన్నారు. వాస్తవానికి కార్మికులు విలీనం డిమాండ్ తోనే సమ్మెకు దిగారు. దీంతోపాటు బకాయిలు చెల్లించాలనేది మరో డిమాండ్. మిగిలినవన్నీ సాధారణ డిమాండ్లే. వాటి కోసం చర్చలు కూడా అవసరంలేదు. కేవలం వినతుల ద్వారా తేర్చే సమస్యలవి. కానీ సీఎం కేసీఆర్ మాత్రం పైకి మెట్టు దిగినట్టే కనిపిస్తున్నా.. తన వైఖరికి కట్టుబడే ఉండటం గమనార్హం.

ఆ ఒక్కటీ తప్ప అనే రీతిలో విలీనం మినహా మిగిలిన డిమాండ్ల పరిశీలనకు సిద్ధం అని ఆది నుంచీ చెబుతూనే ఉన్నారు. ఇప్పుడు కూడా అదే చెప్పారు. పైగా వెంటనే చర్చల ప్రక్రియ కూడా మొదలుపెట్టలేదు. డిమాండ్ల అధ్యయనం కోసం కమిటీ ఏర్పాటు చేశారు. ఇదీ కేసీఆర్ మార్కు ఝలక్ అంటే. పైగా చర్చలు కూడా అధికారుల స్థాయిలోనే జరపాలన్నది ప్రభుత్వ ఉద్దేశంగా తెలుస్తోంది. మొత్తానికి విలీనం ప్రసక్తే ఉండేది లేదని అర్థమవుతోంది. మరోవైపు ఆర్టీసీ జేఏసీ మాత్రం విలీనం డిమాండ్ ను వదులుకోలేదని స్పష్టంచేస్తోంది. ఆ డిమాండ్ పైనే ప్రధానంగా చర్చలు జరగాలని పేర్కొంటోంది.