రాపాక.. ఇటువైపు రామాక.! ఏకైక ఎమ్మెల్యేకి జనసేన వెరైటీ ఝలక్.!

జనసేన పార్టీ నుంచి గెలిచిన ఒకే ఒక్క ఎమ్మెల్యే ఆయన. ‘ఏదో గెలవడం కోసం జనసేనలో చేరానుగానీ.. నా మనసంతా వైఎస్సార్ కాంగ్రెస్ పార్టీ నే వుంది..’ అని చెప్పుకుంటూ, చివరికి తనను గెలిపించిన జనసేన పార్టీని కాదని, వైఎస్సార్ కాంగ్రెస్ పార్టీలోకి దూకేశారాయన. ఆయనే రాజోలు ఎమ్మెల్యే రాపాక వరప్రసాద్.

సొంత నియోజకవర్గంలో వైసీపీ అరాచకాలకు రాపాక ఇబ్బందులు పడుతోంటే, ఆయనకు అండగా నిలిచేందుకు జనసేనాని ప్రయత్నించడం పెద్ద పాపమైపోయినట్టుంది. జనసేన మీద రాపాక సెటైర్లు వేశారుగానీ, జనసేనాని ఎప్పుడూ రాపాకపై విమర్శలు చేయలేదు. పార్టీ నేతలెవరూ ఆయన్ని విమర్శించాల్సిన అవసరం లేదని జనసేనాని పవన్ స్పష్టమైన ఆదేశాలు కూడా జారీ చేశారు.

అయితే, జనసైనికులు అంత సంయమనంతో వుండలేరు కదా.! అందుకే, జనసేనకు వెన్నుపోటు పొడిచి, వైసీపీలోకి దూకేసిన రాపాక.. నియోజకవర్గంలో జనసేన నుంచి తీవ్ర వ్యతిరేకతను ఎదుర్కొంటున్నారు. ఇటీవల పంచాయితీ ఎన్నికలు జరిగితే, రాజోలు నియోజకవర్గంలో వైసీపీకి దిమ్మ తిరిగే షాక్ తగిలింది. అటు వైసీపీ నుంచీ, ఇటు జనసేన నుంచీ.. రెండు వైపుల నుంచీ వ్యతిరేకత రాపాక మీద తీవ్రస్థాయిలో ఎదురైంది. రాపాక, జనసేనకు వెన్నుపోటు పొడిస్తే, రాపాకకు వైసీపీ కూడా వెన్నుపోటు పొడిచేసింది రాజోలులో.

ఇక, తాజాగా, జనసేన పార్టీ రాజోలు నియోజకవర్గంలోని మలికిపురంలో ఓ ప్రత్యేక సమావేశం కోసం ఏర్పాట్లు చేసుకుంది. సాధారణంగా ఆ సభకు వచ్చే నాయకులకు స్వాగతం పలుకుతూ బ్యానర్లు కనిపిస్తుంటాయి. కానీ, ఇక్కడ ‘రాపాక, మీకు మాత్రం అనుమతి లేదు..’ అని పేర్కొంటూ బ్యానర్లు పెట్టారు జనసేన నేతలు. అది కూడా రాపాక ఫొటోలతో కూడినవి కావడం గమనార్హం. పొలిటికల్ ర్యాగింగ్‌లో ఇది వేరే లెవల్.. అనుకోవాలేమో. చేసుకున్నోడికి చేసుకున్నంత.. అని పెద్దలు ఊరకనే అనలేదు మరి.