క్రికెటర్‌.. ప్రైమ్‌ మినిస్టర్‌.. ఇప్పుడు కమెడియన్‌.!

ఇమ్రాన్‌ ఖాన్‌.. ఒకప్పుడు ప్రపంచ క్రికెట్‌లో అతడో అద్భుతం. పాకిస్తానీ క్రికెటర్‌ అయినా, అప్పట్లో అతనికి ప్రపంచ దేశాల్లో విపరీతమైన ఫాలోయింగ్‌ వుండేది. బాలీవుడ్‌ భామలు కొందరు అప్పట్లో ఆయనతో ప్రేమలో పడ్డారు కూడా. భారతదేశంలో ఎంతోమంది ఫ్రెండ్స్‌ ఇమ్రాన్‌ఖాన్‌కి వున్నారు. ఇరు దేశాల మధ్య ‘దాయాది’ పోరు వున్నా, ఇమ్రాన్‌ ఖాన్‌ క్రికెటర్‌గా భారత్‌కి వ్యతిరేకంగా నినదించింది చాలా చాలా అరుదు.

అలాంటి ఇమ్రాన్‌ ఖాన్‌, రాజకీయాల్లోకి వచ్చాక మారిపోయాడు. పాకిస్తాన్‌ ప్రధాని అయ్యాక, ఇమ్రాన్‌ ఖాన్‌ మరింతగా మారిపోయాడు. ఒక్క మాటలో చెప్పాలంటే, ఇప్పుడాయన జస్ట్‌ కమెడియన్‌. ఓ దేశ ప్రధానిని ఉద్దేశించి కమెడియన్‌.. అనాలంటే అది అంత సబబు కాకపోవచ్చు. కానీ, ఇమ్రాన్‌ ఖాన్‌ తన స్థాయిని దిగజార్చేసుకున్నాడు. ఓ గల్లీ లీడర్‌, మత విద్వేషాల్ని రెచ్చగొట్టేలా ప్రసంగిస్తే ఎలా వుంటుంది.? అలాంటిది, ఓ దేశ ప్రధాని అంతర్జాతీయ వేదికపై.. అదీ ఐక్యరాజ్యసమితిలో మత విధ్వేషాల్ని రెచ్చగొట్టడం హాస్యాస్పదం కాకపోతే మరేమిటి.?

బారతదేశంతో పోల్చితే పాకిస్తాన్‌ 7 రెట్లు చిన్నదని ఇమ్రాన్‌ ఖాన్‌ స్వయంగా చెబుతున్నాడు. కానీ, పాకిస్తాన్‌ వద్ద అణుబాంబులున్నాయట. వాటితో, భారత్‌ని ఢీకొనే ప్రయత్నం చేస్తామని ఇమ్రాన్‌ ఖాన్‌ అంటున్నాడు. సాధ్యమయ్యే పనేనా.? పాకిస్తాన్‌, తన మిస్సైళ్ళను ఎక్కుపెట్టడానికి ముందే, మొత్తంగా పాకిస్తాన్‌ నేలమట్టమయిపోయేలా చేయగల సత్తా భారతదేశానికి వుంది. ఆ సంగతి ఇమ్రాన్‌ ఖాన్‌కి తెలియదని ఎలా అనుకోగలం.?

పాకిస్తాన్‌కి చెందిన ఏ టెర్రరిస్టు సంస్థో ఇచ్చిన స్క్రిప్ట్‌ని ఐక్యరాజ్యసమితి వేదికపై చదివేశాడు తప్ప, ఇంగితజ్ఞానంతో ఇమ్రాన్‌ ఖాన్‌ మాట్లాడిన మాటలు కావవి. ప్రపంచంలో చాలా ఇస్లామిక్‌ దేశాలు, ఇస్లాం పేరుతో తీవ్రవాద కార్యకలాపాల్ని నడపడాన్ని సహించడంలేదు.. పాకిస్తాన్‌ లాంటి కొన్ని దేశాలు తప్ప. ఐక్యరాజ్యసమితిలో భారత ప్రధాని నరేంద్రమోడీ హుందాగా మాట్లాడితే, ఇమ్రాన్‌ఖాన్‌ తన స్థాయిని దిగజార్చేసుకుని మాట్లాడాడు. కాశ్మీర్‌ పేరు ప్రస్తావించేందుకూ అర్హత లేని పాకిస్తాన్‌, తొలుత తమ దేశంలో తీవ్రవాదులు సృష్టిస్తున్న మారణహోమాన్ని చక్కదిద్దుకుంటే మంచిది.