బిగ్‌ క్వశ్చన్‌: పవన్‌ కళ్యాణ్‌ రెమ్యునరేషన్‌ ఎన్ని కోట్లు.?

‘అజ్ఞాతవాసి’ సినిమాకి పవర్‌ స్టార్‌ పవన్‌ కళ్యాణ్‌ భారీ రెమ్యునరేషన్‌ అందుకున్నట్లు అప్పట్లో జరిగిన ప్రచారం అందరికీ తెల్సిందే. అప్పటికి అదే అత్యధిక పారితోషికం.. తెలుగు సినీ పరిశ్రమలో. ఇక, తాజా లెక్కల ప్రకారం టాలీవుడ్‌లో అత్యధిక రెమ్యునరేషన్‌ పొందుతోన్న హీరో మహేష్‌బాబు.. అనే ప్రచారం జరుగుతున్నా, అదెంత.? అన్నదానిపై ఖచ్చితమైన సమాచారం లభించడం కష్టమే.

ఇక, మెగాస్టార్‌ చిరంజీవి ‘సైరా నరసింహారెడ్డి’తో పాత రికార్డులు చెరిపేశారని (రెమ్యునరేషన్‌ పరంగా) గాసిప్స్‌ తెరపైకొస్తున్నాయి. మరోపక్క రామ్‌చరణ్‌, జూ.ఎన్టీఆర్‌ కూడా కెరీర్‌లో అత్యధిక పారితోషికాలు ‘ఆర్‌ఆర్‌ఆర్‌’తో అందుకుంటున్నారన్నది తాజాగా ప్రచారంలో వున్న గాసిప్స్‌ సారాంశం. సందట్లో సడేమియా, పవన్‌ కళ్యాణ్‌ రెమ్యునరేషన్‌ గురించి సరికొత్త ప్రచారం షురూ అయ్యింది.

పవన్‌ కళ్యాణ్‌ తాను చేయబోయే కొత్త సినిమా కోసం ఏకంగా 50 కోట్లు పారితోషికం అందుకుంటున్నాడన్నది ఆ గాసిప్స్‌ సారాంశం. ఆలూ లేదు.. చూలూ లేదు, కొడుకు పేరు సోమలింగం అన్నట్టుంది కథ. ప్రస్తుతానికి సినిమాల్లో నటించే విషయమై పవన్‌ కళ్యాణ్‌ నుంచి ఎలాంటి అధికారిక ప్రకటనా రాలేదు. అయితే, ఆయన సినిమాల్లో నటించడానికి సుముఖంగా వున్నారని, స్వయంగా చరణ్‌ ప్రకటించడంతో.. పవన్‌ తదుపరి సినిమాపై ప్రచారం జోరుగా సాగుతోంది.

‘పింక్‌’ రీమేక్‌ అనీ, ‘సత్యాగ్రహి’ సినిమా చేస్తాడనీ.. ఇవేవీ కాదు, ఓ కంప్లీట్‌ ఎంటర్‌టైనర్‌ని ప్లాన్‌ చేస్తున్నారనీ.. ఇలా పవన్‌ చుట్టూ కుప్పలు తెప్పలుగా కథనాలు పుట్టుకొస్తున్నాయి. ఇదీ పవన్‌ కళ్యాణ్‌ స్టామినా అంటే. ఓ వైపు పవన్‌ రాజకీయాలతో బిజీగా వుంటు, క్షణం తీరిక లేకుండా పొలిటికల్‌ కమిట్‌మెంట్స్‌ని డిజైన్‌ చేసుకుంటోంటే.. ఆయనకి సినిమాల్లో నటించే వెసులుబాటు దొరుకుతుందా.? ఏమోగానీ, పవన్‌ అభిమానులే కాదు, జనసేన నేతలు కూడా పవన్‌ నుంచి ఓ సినిమా ఆశిస్తున్నారు. అది పార్టీకి సైతం ఉపయోగపడ్తుందన్నది మెజార్టీ అభిప్రాయం.