గాంధీలో పరిస్థితి అంత ఘోరంగా ఉందా?

‘కరోనా విషయంలో ప్రభుత్వంపై దుష్ప్రచారం చేస్తున్నారు. ఎంతమందికైనా చికిత్స చేసే సామర్థ్యం ప్రభుత్వాస్పత్రులకు ఉంది. గాంధీ ఆస్పత్రిలో బెడ్లు లేక రోగులు కిక్కిరిసోతున్నారంటూ వస్తున్న వార్తలు అవాస్తవం. 2వేల మందికి చికిత్స చేసే సామర్థ్యం కలిగిన గాంధీ ఆస్పత్రిలో ప్రస్తుతం ఉన్నది 247 మంది మాత్రమే’ – ఇవీ సీఎం కేసీఆర్ సోమవారం చేసిన వ్యాఖ్యలు. కరోనా విషయంలో అంతా తప్పుడు సమాచారం ఇస్తున్నారంటూ హైకోర్టు మండిపడిన నేపథ్యంలో ఆయన ఈ మేరకు స్పందించారు.

నిజానికి క్షేత్ర స్థాయిలో పరిస్థితి ఎలా ఉంది? కేసీఆర్ చెప్పినట్టుగానే ఉందా? అంటే కాదనే వ్యాఖ్యలే ఎక్కువగా వినిపిస్తున్నాయి. ప్రస్తుతం తెలంగాణలో.. ముఖ్యంగా జీహెచ్ఎంసీ పరిధిలో ప్రతిరోజూ భారీగానే కరోనా కేసులు నమోదవుతున్నాయి. తెలంగాణ వైద్య ఆరోగ్య శాఖ వెల్లడించిన లెక్కల ప్రకారమే ప్రస్తుతం 2,030 మంది ఆస్పత్రిలో చికిత్స పొందుతున్నారు. హైదరాబాద్ లో గాంధీతోపాటు ఛాతీ ఆస్పత్రి, ఫీవర్ ఆస్పత్రిలోనే కరోనా చికిత్స జరుగుతోంది. ఈ మూడింటిలో కూడా గాంధీ ఆస్పత్రిలోనే ఎక్కువ మంది బాధితులున్నారు. కానీ సీఎం మాత్రం 247 మంది మాత్రమే ఉన్నారని చెప్పడంపై సందేహాలు వ్యక్తమవుతున్నాయి.

పైగా సీఎం ఈ వ్యాఖ్యలు చేసిన సోమవారంనాడే గాంధీ ఆస్పత్రి నుంచి 50 ఏళ్ల లోపు వయసున్న 393 మందిని డిశ్చార్జి చేశారు. వీరిలో 310 ఇంట్లో క్వారంటైన్ కాగా, 83 మంది ప్రకృతి చికిత్సాలయానికి తరలించారు. వారికి కరోనా తగ్గకపోయినా.. బెడ్ల కొరత దృష్ట్యానే ఈ నిర్ణయం తీసుకున్నట్టు సమాచారం. అయితే, ఐసీఎంఆర్ తాజా మార్గదర్శకాల ప్రకారమే వారిని డిశ్చార్జి చేసినట్టు గాంధీ వైద్యాధికారులు వెల్లడించారు.

ఈ సంగతి అలా ఉంచితే.. గాంధీ ఆస్పత్రిలో పరిస్థితి దారుణంగా ఉందనే విమర్శలు వినిపిస్తున్నాయి. గాంధీకి వెళ్లడం అంటే శ్మశానానికి వెళ్లడమే అంటూ ఇటీవల చనిపోయిన జర్నలిస్టు మనోజ్ చేసిన వ్యాఖ్యలు కలకలం రేపాయి. మనోజ్ ను సరిగా పట్టించుకోవడంలేదని, అందుకే ఆయన ప్రాణాలు కోల్పోయారని విమర్శలు వచ్చాయి.

తాజాగా ఓ ఛానల్ కు చెందిన కెమెరామెన్ గాంధీలో పరిస్థితిని ఏకరువు పెట్టాడు. కరోనా సోకిన సదరు కెమెరామెన్ ను చికిత్స నిమిత్తం గాంధీకి తరలించారు. అయితే, మీ బెడ్లు ఇవి అని చూపించిన తర్వాత ఏ ఒక్కరూ తమను పట్టించుకోలేదని, కనీసం ఆహారం కూడా ఇవ్వలేదని వాపోయాడు. మంచినీళ్లు అడిగినా ఇచ్చే పరిస్థితి లేదని పేర్కొన్నాడు. ఒకరోజు గడిచినా డాక్టర్లు కూడా రాలేదని తెలిపాడు. నిన్న రాత్రి నుంచి ఆహారం తినలేదని చెప్పినా.. ఓకే ఓకే అంటున్నారు తప్ప ఇప్పటివరకు ఏమీ ఇవ్వలేదని ఆవేదన వ్యక్తంచేశాడు. దీనికి సంబంధించి అతడు మాట్లాడిన ఫోన్ సంభాషణ బయటకు రావడంతో గాంధీలో పరిస్థితి ఎలా ఉందో తెలిసింది. మరి దీనిపై ప్రభుత్వం ఎలా స్పందిస్తుందో చూడాలి.