ఎక్స్‌క్లూజివ్‌ ఇంటర్వ్యూ: ‘వి’ స్టార్‌ సుధీర్‌బాబు ముచ్చట్లు

‘వి’ జర్నీ ఎలా ప్రారంభం అయ్యింది?

ఇంద్రగంటి గారు ఒక సారి మాటల మద్యలో ‘వి’ స్టోరీ లైన్‌ చెప్పారు. కొన్ని నెలల తర్వాత మరోసారి ఈ కథపై చర్చ జరిగింది. ఆ తర్వాత సినిమా పట్టాలెక్కింది.

‘వి’ సినిమా ఎంపిక చేసుకోవడానికి కారణం ఏంటీ?

కథ, నాపాత్ర మరియు దర్శకుడు.

నానితో నటిస్తున్న సమయంలో ఎలాంటి ఛాలెంజస్‌ ఎదుర్కొన్నారు?

మా ఇద్దరి మద్య ఛాలెంజ్‌లు ఏమీ లేవు. ఒకరితో ఒకరం నటించేందుకు చాలా కంఫర్ట్‌ ఫీల్‌ అయ్యాం. ఒకరికి ఒకరం పోటీ అన్నట్లుగా మేము ఎప్పుడు కూడా అనుకోలేదు.

పోలీస్‌ స్టోరీని ఈ దర్శకుడు హ్యాండిల్‌ చేయగలడా అనే అనుమానం మీకు ఎప్పుడైనా వచ్చిందా?

దర్శకుడు ఇంద్రగంటి ఇలాంటి కథలు ఇంతకు ముందు చేయలేదు. కాని ఈ సినిమాను తప్పకుండా ఆయన ఆకట్టుకునేలా తీస్తారని అనుకున్నాను. ఆయన ఎలా తీస్తారా అంటూ ఆసక్తిగా ఎదురు చూశాను. అంచనాలను మించి తీశారు అనడంలో సందేహం లేదు.

ట్రైలర్‌ చూస్తుంటే హాలీవుడ్‌ సైకో థ్రిల్లర్‌గా అనిపిస్తుంది, తెలుగు ఆడియన్స్‌ దీన్ని ఎంత వరకు రిసీవ్‌ చేసుకుంటారని మీరు అనుకుంటున్నారు?

ఇది రెగ్యులర్‌ కిల్లర్‌ వర్సెస్‌ పోలీస్‌ సినిమా కాదు. ఇదో మంచి డ్రామా ఉన్న సినిమా. తప్పకుండా ప్రేక్షకులు దీనిని ఆధరిస్తారనే నమ్మకం ఉంది. తెలుగు ప్రేక్షకుల అభిరుచికి తగ్గట్లుగా ఉంటుంది.

మేము విన్నదాని ప్రకారం సినిమాలో మీరే రియల్‌ విలన్‌ అని, అది క్లైమాక్స్‌లో తెలుస్తుందట, ఇది నిజమేనా?

నేను ఇప్పుడు సినిమా కథ గురించి ఏమీ రివీల్‌ చేయదల్చుకోవడం లేదు. సినిమా గురించి ఇంకా చాలా చాలా కథనాలు వస్తున్నాయి. వాటన్నింటికి కూడా సెప్టెంబర్‌ 5న సమాధానం వస్తుంది.

సినిమాలో మీ జోడీ గురించి చెప్పండి?

సాంగ్‌ ప్రోమో విడుదలైనప్పటి నుండి మా జోడీకి మంచి స్పందన వచ్చింది. నివేదా మంచి ప్రతిభ ఉన్ననటి. మా ఇద్దరి కాంబో సీన్స్‌ మరియు కెమిస్ట్రీ బాగుందని అంటున్నారు. ఆమెతో వర్క్‌ చేయడం సంతోషంగా ఉంది.

ఇంకా ఏమైనా మల్టీస్టారర్‌ సినిమాలు లైన్‌ లో ఉన్నాయా?

ప్రస్తుతానికి ఏమీ లేవు. కథ డిమాండ్‌ చేస్తే తప్పకుండా నటిస్తాను. ‘వి’ కథ ఒక మంచి కథ. ఆ కథే మమ్ముల ఇద్దరిని ఎంపిక చేసుకుంది.

ఈ సినిమాలో సిక్స్‌ ప్యాక్‌ ట్రై చేశారు కదా, దర్శకుడు అడిగారా? మీరే చేశారా?

దర్శకుడు మీరు సిక్స్‌ ప్యాక్‌ లో కనిపించాలని ప్రత్యేకంగా చెప్పలేదు. అయితే నేను ఆ పాత్రకు సిక్స్‌ ప్యాక్‌ అయితే బాగుంటుందనే ఉదేశ్యంతో నేను ట్రై చేశాను.

‘వి’ కోసం ప్రత్యేకంగా ఏమైనా నేర్చుకున్నారా?

ఈ సినిమా కోసం నేను ఒక సీనియర్‌ పోలీస్‌ ఆఫీసర్‌ ను కలిశాను. ఆయన నాకు చాలా సాయం అందించారు.

మొదటి సారి ఒక పెద్ద సినిమా ఓటీటీలో విడుదల అవుతుంది. దీనిపై మీ అభిప్రాయం?

ఇలాంటి సమయంలో ఓటీటీ రిలీజ్‌ అనేది నిర్మాతలకు చాలా భరోసాను ఇస్తుంది. నా సినిమా 200 దేశాల్లో విడుదల కాబోతున్నందుకు చాలా సంతోషంగా ఉంది. ఇంత పెద్ద విడుదల అనేది కేవలం ఓటీటీ ద్వారా మాత్రమే సాధ్యం. కనుక ఓటీటీ విడుదలపై చాలా సంతోషంగానే ఉన్నాను.

ఈ సినిమాలోని పాత్ర గురించి లేదా ఓటీటీ రిలీజ్‌ గురించి మహేష్‌ బాబు గారితో ఏమైనా మాట్లాడారా? ఆయన సలహాలు ఇచ్చారా?

నిజం చెప్పాలంటే ‘లేదు’. కాని నా కెరీర్‌ ప్రతి విషయంలో కూడా వారి గైడెన్స్‌ ఉంటుంది.

లాక్‌ డౌన్‌ టైంలో ఏం చేశారు?

ఫ్యామిలీకి సమయం కేటాయించడంతో పాటు మంచి సినిమాలు చూశాను. స్నేహితులతో మాట్లాడేందుకు కూడా టైం స్పెండ్‌ చేశాను.

ఇటీవల మీ పీఆర్‌ మేనేజర్‌ కు కరోనా పాజిటివ్‌ అంటే మీరు చేసిన సాయం నిజంగా అద్బుతం సర్‌, మీరు వారి ఇంటికి వెళ్లి సాయం చేయడం నిజంగా అభినందనీయం. మీ స్టాఫ్‌ పట్ల మీకున్న శ్రద అభినందనీయం

నా స్టాఫ్‌ ను నా కుటుంబ సభ్యులుగా అనుకుంటాను. అందుకే నేను వారి ఇంటికి వెళ్లి మరీ ధైర్యం చెప్పాను. అది నా బాధ్యతగా నేశాను. మీ అభినందనలకు కృతజ్ఞతలు.

‘వి’ నుండి ప్రేక్షకులు ఏం ఆశించొచ్చు?

ఇది ఒక ఫుల్‌ మీల్స్‌ వంటి సినిమా. ప్రేక్షకులు ఆశించే ప్రతి విషయం ‘వి’ లో ఉంటుంది.

మీ తర్వాత సినిమాల గురించి చెప్పారా?

ప్రస్తుతానికి మూడు స్ర్కిప్ట్‌ లు వింటున్నాను. త్వరలో ఫైనల్‌ చేస్తాను.

ఒక్క మాటలో..

నాని గురించి.. నాచురల్‌
నివేధా థామస్‌ … ట్యాలెంటెడ్‌
మోహన్‌ కృష్ణ ఇంద్రగంటి… ప్రతిభావంతుడు
అధితి రావు హైదరి… అందంతో పాటు తెలివి ఉన్న అమ్మాయి
పీజీ వింద.. మిస్టర్‌ కూల్‌
మహేష్‌ బాబు.. గ్రీక్‌ దేవుడు
కృష్ణ గారు.. స్వచ్చమైన వ్యక్తి

ఇంటర్వ్యూ బై

హరీష్