క్రాస్ రోడ్స్: ఈటెల రాజకీయ పయనమెటు.?

ముఖ్యమంత్రి కల్వకుంట్ల చంద్రశేఖర్ రావు తనను రాజకీయంగా అణగదొక్కే క్రమంలోనే అత్యంత కఠినమైన నిర్ణయం తీసుకుని, తనను బయటకు పంపేశారని వాపోతున్నారు మాజీ మంత్రి ఈటెల రాజేందర్. నిజానికి, ఈ పరిస్థితిని ఈటెల రాజేందర్ కొద్ది నెలల క్రితమే ఊహించారు. ఆయన అప్పటినుంచీ, నర్మగర్భంగా తెలంగాణ రాష్ట్ర సమితి అంతర్గత రాజకీయాలపైనా, ప్రభుత్వంపైనా సునిశిత విమర్శలు చేస్తూనే వున్నారు.

అయితే, సమస్యకు పరిష్కారం దొరుకుతుందని ఆయన ఎదురుచూశారు నిన్న మొన్నటిదాకా. కానీ, జరగాల్సిన డ్యామేజీ జరిగిపోయింది. పార్టీ నుంచి బయటకు తాను వెళ్ళాలా.? గెంటేసేవరకూ వేచి చూడాలా.? అన్నదానిపై ఈటెల ఎటూ తేల్చుకోలేకపోతున్నారు. మరోపక్క, ఈటెల రాజేందర్ విషయమై వివిధ రాజకీయ పార్టీలకు చెందిన నేతలు ఆచి తూచి స్పందిస్తున్నారు. టీఆర్ఎస్ నుంచి కాంగ్రెస్ పార్టీలోకి, ఆ తర్వాత కాంగ్రెస్ పార్టీకి రాజీనామా చేసి.. బీజేపీతో కలవడానికీ సిద్ధపడ్డ మాజీ ఎంపీ కొండా విశ్వేశ్వర్ రెడ్డి, నిన్ననే ఈటెలను కలిశారు.

కాగా, కాంగ్రెస్ ఎంపీ రేవంత్ రెడ్డి కూడా ఈటెల విషయమై కొంత సానుకూలంగానే వున్నట్లు తెలుస్తోంది. కాంగ్రెస్, బీజేపీలు.. ఈటెలను తమవైపుకు తిప్పుకోవడానికి చూస్తోంటే, ఆయా పార్టీల్లోని కొందరు నేతలు, ఈటెల కొత్త కుంపటి పెట్టాలని కోరుకుంటున్నారట.. ఈటెల ఆ నిర్ణయం తీసుకుంటే, ఆయన వెంట నడవాలనుకుంటున్నారట. కానీ, ఈ రోజుల్లో రాజకీయ పార్టీ అంటే అంత ఆషామాషీ వ్యవహారం కాదు. అంత ఆర్థిక స్తోమత ఈటెలకు వుందా.? అన్నదే మిలియన్ డాలర్ల ప్రశ్న.

ఇప్పటికైతే ఈటెల రాజేందర్ ‘క్రాస్ రోడ్స్’లో వున్నారనీ, ఇప్పట్లో ఆయన తన రాజకీయ భవిష్యత్తుపై కీలక నిర్ణయం తీసుకునే అవకాశం లేదనీ అంటున్నారు. రాజకీయాల్లో ఏదైనా జరగొచ్చు. గతం గతః అనుకుని తిరిగి ఈటెల, తెలంగాణ రాష్ట్ర సమితిలో సర్దుకుపోవచ్చు కూడా.