ఈనాడులో కొందరికి నెలకు రెండు రోజులే పని

ఒకప్పుడు ఈనాడులో ఉద్యోగం అంటే.. ప్రభుత్వ ఉద్యోగంతో సమానం. ఒక విధంగా చెప్పాలంటే అంతకంటే ఎక్కువే. ఎందుకంటే ప్రభుత్వ ఉద్యోగులకు కూడా వేతనాలు ఒకటో తారీఖున వస్తాయి. కానీ ఈనాడులో మాత్రం అంతకంటే ఒకరోజు ముందు అంటే 30 లేదా 31నే వచ్చేస్తాయి. ఒకవేళ ఆరోజు బ్యాంకు సెలవు ఉంటే మరో రోజు ముందే ఇచ్చేసేవారు. తెలుగు మీడియా సంస్థల్లో సాక్షి మినహా ఏ సంస్థా ఇలా ఇచ్చేది లేదు. అలాంటి ఈనాడు ఇప్పుడు గడ్డుకాలం ఎదుర్కొంటోంది. కరోనా కారణంగా ఆదాయం గణనీయంగా పడిపోవడంతో వ్యయ నియంత్రణపై దృష్టి సారించింది.

మొత్తం అన్ని విభాగాల్లో అవసరానికి మించి ఎంతమంది ఉన్నారో లెక్కలు తీసింది. ప్రస్తుతం ఉండాల్సిన దానికంటే ఏకంగా వెయ్యి మంది అదనంగా ఉన్నారని గుర్తించింది. అయితే, వారందరినీ ఉన్నపళంగా తీసేస్తే కార్మిక చట్టాలతో కొన్ని చిక్కులు తప్పకపోవచ్చు. పైగా ఈనాడుకు ఉన్న మంచి పేరుకు మచ్చ పడే అవకాశం ఉంటుంది. అందుకే మధ్యే మార్గంగా ఓ ఉపాయం ఆలోచించారు. దాని ప్రకారం నెలలో 15 రోజులు పని 15 రోజులు సెలవులు ఇవ్వాలని.. వేతనం కూడా ఆ మేరకే చెల్లించాలని తొలుత నిర్ణయం తీసుకున్నారు.

కానీ అంతలోనే ఏమైందో ఏమో అర్ధరాత్రి ఆ నిర్ణయంలో భారీ మార్పులు చోటుచేసుకున్నాయి. ఉద్యోగులందరికీ సమాన పని.. సమాన వేతనం అనే తరహాలో కాకుండా ఏ ఉద్యోగి అవసరం సంస్థకు ఎంత ఉందో లెక్కగట్టారు. ఆ మేరకు వారి ఈనెలలో ఎన్ని రోజులు ఆఫీసుకు రావాలో నిర్దారించారు. దీని ప్రకారం కొంతమందికి గరిష్టంగా 11 రోజులు పనిచేయాల్సి ఉండగా.. కొందరికి కనిష్టంగా రెండు పనిదినాలు మాత్రమే వచ్చాయి. దీని ప్రకారం పనిచేసే రోజులకు మాత్రమే వేతనం లభిస్తుంది.

అయితే, మిగిలిన రోజులకు లేఆఫ్ పరిహారం చెల్లిస్తామని సంస్థ ప్రకటించింది. ఇది ఎంత వస్తుంది అన్నదానిపై ఎలాంటి సమాచారం లేదు. సంస్థ తీసుకున్న తాజా నిర్ణయంతో ఉద్యోగులు తీవ్ర ఆందోళన వ్యక్తంచేస్తున్నారు. వచ్చే అరకొర జీతంతో ఎలా బతకాలి అని ప్రశ్నిస్తున్నారు. ఇదంతా తమను పొమ్మనలేక పొగ బెట్టడమే అని పేర్కొంటున్నారు.