ఎట్టకేలకు ఈనాడుకు తత్వం బోధపడింది!

అనుభవం అయితేనే గానీ తత్వం బోధపడదంటారు. కరోనా విషయంలో ఈనాడుకు ఇన్నాళ్లకు తత్వం బోధపడింది. కరోనా ఎంతగా విజృంభిస్తున్నా ఉద్యోగులకు వర్క్ ఫ్రం హోం ఇచ్చే విషయంలో మీనమేషాలు లెక్కించిన ఆ సంస్థ.. చివరకు డెస్క్ సీనియర్లలో ఇరువురికి కరోనా పాజిటివ్ సోకడంతో కాస్త బెట్టు సడలించింది. డెస్క్ సిబ్బందికి కూడా వర్క్ ఫ్రం హోం అమలు చేస్తున్నట్టు సమాచారం.

కరోనా మహమ్మారి ప్రపంచాన్ని ఎలా అతలాకుతలం చేస్తుందో ప్రత్యక్షంగా చూస్తున్నాం. రాజు, పేద.. ధనిక, బీద.. పాలకుడు, పౌరుడు ఇలా తారతమ్య బేధాలు దానికి లేవు. అది రాకుండా చూసుకోవడమే అందరి ముందూ ఉన్న ప్రధాన కర్తవ్యం. ఈ నేపథ్యంలో అవకాశం ఉన్న అన్ని సంస్థలూ తమ ఉద్యోగులకు వర్క్ ఫ్రం హోం సౌకర్యం కల్పించాయి. ఆఫీసుకు వచ్చేవారి టైమింగ్స్ లో కూడా నిబంధనలు సరళం చేశాయి. అయితే, ఈ విషయంలో ఈనాడు వైఖరి పట్ల సర్వత్రా విమర్శలు వ్యక్తమయ్యాయి.

ఖైరతాబాద్ లోని ఈనాడు ప్రధాన కార్యాలయంలో ఇటీవల కరోనా నిర్ధారణ పరీక్షలు చేయగా.. 16 మందికి పాజిటివ్ నిర్ధారణ అయింది. దీంతో చాలా మంది ఉద్యోగులు భయంతో వణికిపోయారు. ఇంటి నుంచి పనిచేస్తామని విన్నవించుకున్నారు. కానీ యాజమాన్యం అందుకు అంగీకరించలేదు. కొలువు ఉండాలంటే ఆఫీసుకు రావాల్సిందే అని హుకుం జారీచేసినట్టు సమాచారం. దీంతో అటు మానేయలేక.. ఇటు ఆఫీసుకు వస్తే ఏం జరుగుతుందో అనే భయంతో ఉద్యోగులు కొంతమంది సెలవు పెట్టుకున్నారు. కొంతమందికి సంస్థే లేఆఫ్ ప్రకటించి ఎన్ని రోజులు ఆఫీసుకు కావాలో నిర్దారించి ఆ మేరకే వేతనాలిస్తోంది.

అయితే, ఖైరతాబాద్ లో పనిచేసేది తక్కువ మందే. ఈనాడు మొత్తం రామోజీ ఫిల్మ్ సిటీ నుంచే ఆపరేట్ అవుతోంది. ఖైరతాబాద్ లో కేవలం రిపోర్టర్లు, అడ్వైర్జైజింగ్ విభాగం వంటివి మాత్రమే ఉంటాయి. ఈ నేపథ్యంలో తాజాగా ఫిల్మ్ సిటీకి కరోనా పాకిందనే వార్త ఆందోళన రేపుతోంది. డెస్క్ లో పనిచేస్తున్న ఇద్దరు సీనియర్లకు కరోనా పాజిటివ్ రావడంతో శనివారం ఫిల్మ్ సిటీలో పనిచేసే ఈనాడు సిబ్బందికి టెస్టు చేయించారు. వారి రిపోర్టులు సోమవారం రానున్నాయి. ఇప్పటికే వారిలో పలువురికి కరోనా లక్షణాలు ఉన్నట్టు సమాచారం. దీంతో చాలామందిలో తీవ్ర ఆందోళన నెలకొంది. ఈ నేపథ్యంలో డెస్క్ సిబ్బందికి కూడా తప్పనిసరి పరిస్థితుల్లో వర్క్ ఫ్రం హోం సౌకర్యం కల్పించినట్టు తెలుస్తోంది.

అయితే, ప్రతి డెస్కులో ఇద్దరిద్దరికే ప్రస్తుతం ఈ వెసులుబాటు కల్పించారని సమాచారం. ఇది ముందే ఇచ్చి ఉంటే ఇప్పుడీ పరిస్థితి ఉండేది కాదు కదా అనే అభిప్రాయాలు వ్యక్తమవుతున్నాయి. ఇక సాక్షి విషయానికొస్తే కరోనా పరిస్థితుల్లోనూ ఏ ఒక్క ఉద్యోగినీ తొలగించకుండా, జీతాలు కోత వేయకుండా మంచి మార్కులు కొట్టేసింది. రిపోర్టర్లందరికీ వర్క్ ఫ్రం హోం సౌకర్యం ఇచ్చింది. టీవీలో కూడా రోజు విడిచి రోజు పని విధానం అమలు చేస్తోంది. డెస్క్ సిబ్బందికి జూన్ మొదటివారం వరకు వర్క్ ఫ్రం హోం కల్పించినా.. అనంతరం దానిని తొలగించారు. కానీ తాజాగా మళ్లీ హైదరాబాద్ లో కేసులు పెరుగుతున్న తరుణంలో వారికి కూడా వర్క్ ఫ్రం హోం ఇవ్వాలని భావిస్తున్నట్టు సమాచారం.