వైసీపీలో కమ్మ, రెడ్డి నేతలకీ.. కాపు నేతలకీ అదే ‘మెగా’ తేడా.!

చిరంజీవిని విమర్శిస్తే, ఓట్లు రావేమోనన్న భయం వైసీపీ నేతల్ని వెంటాడుతోంది. ఈ విషయాన్ని స్వయంగా మాజీ మంత్రి, వైసీపీ నేత, గుడివాడ ఎమ్మెల్యే కొడాలి నాని బయటపెట్టారు.

మెగాస్టార్ చిరంజీవి పుట్టినరోజు సందర్భంగా అభిమానులు నిర్వహించిన ఓ కార్యక్రమంలో కొడాలి నాని పాల్గొన్నారు. ‘నేనేమీ చిరంజీవిని విమర్శించలేదు. కొందరు పకోడీగాళ్ళని ఉద్దేశించి విమర్శించాను. మా ప్రభుత్వానికి చిరంజీవి సలహా ఇచ్చారు. మేం తీసుకుంటాం ఆ సలహాని. అలాగే, సినీ పరిశ్రమలో వున్న పకోడీగాళ్ళకీ సలహా ఇవ్వమని చెప్పానంతే..’ అంటూ కొడాలి నాని, ‘పకోడీ’ వ్యాఖ్యలపై బుకాయించారు.

‘కొంతమంది పకోడీగాళ్ళు..’ అంటూ, చిరంజీవి మీదనే నేరుగా కొడాలి నాని ఇటీవల విమర్శలు చేసిన సంగతి తెలిసిందే. ‘ప్రత్యేక హోదా గురించి పార్లమెంటులో మాట్లాడండి.. పిచ్చుక మీద బ్రహ్మాస్త్రంలా సినీ పరిశ్రమపై ఎందుకు.?’ అంటూ చిరంజీవి ఇటీవల వ్యాఖ్యానించడంపై వైసీపీ నేతలు తీవ్రస్థాయిలో విరుచుకుపడిపోయారు.

పార్లమెంటులో, స్టార్ హీరోల రెమ్యునరేషన్ల అంశాన్ని ప్రస్తావించిన వైసీపీ ఎంపీ విజయసాయిరెడ్డి కూడా సోషల్ మీడియా వేదికగా, చిరంజీవికి పుట్టినరోజు శుభాకాంక్షలు తెలియజేయడం గమనార్హం.

కమ్మ సామాజిక వర్గానికి చెందిన కొడాలి నాని, రెడ్డి సామాజిక వర్గానికి చెందిన విజయసాయిరెడ్డి.. ఇద్దరూ తప్పు తెలుసుకున్నట్టే.! మరి, వైసీపీలోని కాపు సామాజిక వర్గ నేతల సంగతేంటి.? అత్యంత జుగుప్సాకరంగా, వెటకారంగా చిరంజీవి మీద విమర్శలు చేసిన పేర్ని నాని ఎక్కడ.?

వైసీపీలో వున్న కాపు సామాజిక వర్గ నేతల రూటే సెపరేటు.! అధినేత మెప్పు కోసం, అడ్డగోలుగా మాట్లాడటంలో వైసీపీ కాపు నేతలకు సాటి ఇంకెవరూ రారేమో.! వైసీపీలో కాపు నేతలకి లౌక్యం చేతకావడంలేదా.? సాటి కాపు ప్రముఖులంటే, వైసీపీ కాపు నేతలకు అలుసా.? అన్న దిశగా కాపు సామాజిక వర్గంలో చర్చ జరుగుతోంది.