డిప్రెషన్ ను మనం తేలిగ్గా తీసుకుంటున్నామా?

సెలబ్రిటీల జీవితాలు అద్దాల మేడ వంటివి. బయటనుండి చూస్తే అందంగానే కనపడతాయి. కానీ వారికి కూడా చాలా ఇబ్బందులే ఉంటాయన్న విషయం మనకు కొన్ని కొన్ని సందర్భాలలో బయటపడుతూనే ఉన్నాయి. రీసెంట్ గా బాలీవుడ్ యువ నటుడు సుశాంత్ సింగ్ రాజ్ పుత్ ఆత్మహత్య చేసుకోవడం అందరిలో కలకలం రేపింది. డిప్రెషన్ కారణంగానే అతను ఆత్మహత్య చేసుకున్నాడని భావిస్తున్నారు అందరూ. దీంతో డిప్రెషన్ మళ్ళీ చర్చలోకి వచ్చింది.

అయితే చాలా మంది అనలిస్టులు సైతం డిప్రెషన్ ను చాలా తక్కువ చేసి మాట్లాడుతుంటారు. ఎవరైనా డిప్రెషన్ లో ఉన్నామంటే బయటకి రావాలి అని సలహాలు కూడా ఇస్తారు. కానీ మానసిక ఆరోగ్యం అనేది ఎంత ముఖ్యమో ఎవరూ గుర్తించలేరు. ముఖ్యంగా ఆత్మహత్య చేసుకోవాలనుకున్న వారు ఆ చర్యకు ముందు ఎంతటి మానసిక వేదనను అనుభవిస్తారో మనం ఊహించలేం.

దీనికి సంబంధించిన ఉదాహరణ ఇప్పుడు టాలీవుడ్ లో చర్చకు వచ్చింది. ఉదయ్ కిరణ్ ఆత్మహత్య చేసుకున్నప్పుడు సీనియర్ నటులు రంగనాథ్ చలించిపోయారు. ఎవరైనా డిప్రెషన్ లో ఉంటే దాన్నుండి బయటకు రావాలంటే ఎవరితోనైనా మీ బాధను షేర్ చేసుకోండని, ఎవరికైనా ఆత్మహత్య చేసుకోవాలన్న ఆలోచన వస్తే తనతో మాట్లాడడానికి ఎటువంటి సందేహం అవసరం లేదని, నిరాశలో ఉంటే తప్పకుండా తనను కలవమని, వారి నిరాశను తాను దూరం చేస్తానని తెలిపారు.

అయితే ఇది జరిగిన రెండేళ్లకు రంగనాథ్ కూడా ఆత్మహత్య చేసుకుని తనువు చాలించారు. ఆయన ఆత్మహత్యకు కూడా డిప్రెషన్ ప్రధాన కారణమని తర్వాత తెలిసింది. దీన్ని బట్టి డిప్రెషన్ అనేది ఎంత ప్రమాదమో, దానికి లోనైనవారు ఎలాంటి తీవ్ర నిర్ణయాలు తీసుకోవడానికైనా వెనుకాడరని అర్ధమవుతోంది.