చంద్రబాబు తన స్థాయిని తగ్గించేసుకుంటున్నారా?

నలభయ్యేళ్ల సుదీర్ఘ రాజకీయ అనుభవం ఆయన సొంతం. తొమ్మిదేళ్లు ఉమ్మడి ఆంధ్రప్రదేశ్‌ ముఖ్యమంత్రిగా, ఐదేళ్లు 13 జిల్లాల ఆంధ్రప్రదేశ్‌కి ముఖ్యమంత్రిగా బాధ్యతలు నిర్వహిస్తున్న తెలుగుదేశం పార్టీ అధినేత నారా చంద్రబాబు నాయుడు ఎన్నికల పోలింగ్‌ ముగిశాక, అధికారుల విషయంలో ఎలా వ్యవహరించాలో తెలియక తికమక పడుతుండడం అందర్నీ ఆశ్చర్యపరుస్తోంది. ఎన్నికల కోడ్‌ అమలులోకి వచ్చిందంటే, అధికారంలో ఉన్నవారి అధికారాలపై కోత ఉంటుంది. అధికారులు ఎన్నికల సంఘం నిర్ణయాలకు లోబడి పని చేస్తారు. చంద్రబాబుకు ఇవన్నీ తెలియదని ఎలా అనుకోగలం.?

ఇంటెలిజెన్స్‌ ఛీఫ్‌ని మార్చడం, సీఎస్‌ని బదిలీ చేయడం, కొందరు ఐపీఎస్‌ అధికారులపై వేటు వేయడం, ఐఏఎస్‌ అధికారులూ బదిలీ వేటుకు గురి కావడం.. ఇలాంటివన్నీ అసాధారణమేమీ కాదు. కానీ ఎక్కడా లేని విధంగా ఆంధ్రప్రదేశ్‌లోనే ఇంత పెద్ద దుమారం రేగడం ఖచ్చితంగా అశ్యంతరకరమే. దాన్ని ప్రశ్నిస్తూ, ఓ సీనియర్‌ పొలిటీషియన్‌గా చంద్రబాబు రాజకీయ పోరాటం చేయొచ్చు. దాన్నెవరూ తప్పు పట్టలేరు. కానీ ఎన్నికల సంఘంలో నిర్ణయాలకు లోబడి పని చేసే అధికారుల్ని తూలనాడడం ద్వారా చంద్రబాబు సాధించేదేమీ లేదు.

చంద్రబాబు ప్రస్తుత అధికారాలపై ఛీఫ్‌ సెక్రటరీ ఎల్‌.వి.సుబ్రహ్మణ్యం స్పష్టత ఇచ్చారు. దాని అర్ధం చంద్రబాబుకు ఇప్పుడు అధికారాలు పూర్తి స్థాయిలో లేవని. అది నిజమే. కానీ సీఎస్‌తో చెప్పించుకునే స్థాయికి చంద్రబాబు వివాదాన్ని తీసుకెళ్లడమే దారుణం. రేపొద్దున్న చంద్రబాబే తిరిగి ముఖ్యమంత్రి అవ్వొచ్చు గాక, అప్పుడు ఇదే సీఎస్‌తో కలిసి పని చేయాల్సిన అవసరం ఏర్పడొచ్చు, లేదా ప్రస్తుత సీఎస్‌ని తొలగించి, తనకు కావల్సిన అధికారిని ఆ పోస్ట్‌లో కూర్చోబెట్టుకునే అవకాశం చంద్రబాబుకు ఉంటుంది. కేవలం నెలా పదిహేను రోజుల వ్యవధికి గానూ అమలులోకి వచ్చిన ఎన్నికల కోడ్‌, ఆ కారణంగా జరిగిన మార్పుల గురించి చంద్రబాబు ఇంతలా ఆయాస పడడం సీనియర్‌ పొలిటీషియన్‌గా ఆయనకు తగని పని.

ఓటమిని ముందే పసిగట్టి మిగిలిన కొద్ది కాలాన్ని సద్వినియోగం చేసుకోవడానికే చంద్రబాబు అధికారులపై అత్యుత్సాహం చూపుతున్నారనీ సంకేతాలు ఆల్రెడీ జనంలోకి వెళ్లిపోయాయి. ఇంకా ఈ వివాదాన్ని తెగేదాకా లాగడం, చంద్రబాబుకు మంచిది కాదనీ, రాజకీయ పండితులు సూచిస్తున్నారు. ఇదిలా ఉంటే, తుపాను ముంచుకొస్తోంది. ఆంధ్రప్రదేశ్‌పై దాని ప్రభావాన్ని అంచనా వేయడంలో అధికార యంత్రాంగం కొంత నిర్లిప్తత చూపిస్తున్నట్లే కనిపిస్తోంది. మరో పక్క తుపాను ప్రభావం ఎక్కువగా ఉంటే మాత్రం అది రాష్ట్రానికి ఈ పరిస్థితుల్లో పెను శాపమే.

తుపాను పట్ల అప్రమత్తత ఏదీ.? అని టీడీపీ ప్రశ్నించడాన్ని కూడా ప్రతిపక్షం తప్పుపడుతోంది. విపత్తుల విషయంలో రాజకీయాలకు అతీతంగా ప్రతీ ఒక్కరూ ఒకే మాట మీద ఉండాలి. దురదృష్టం ఏంటంటే, ఆంధ్రప్రదేశ్‌లో ఆ ఐక్యత ఎప్పటికీ కనిపించకపోవచ్చు. ముఖ్యమంత్రి, క్యాబినెట్‌ అనే వ్యవస్థ మరీ అచేతనావస్థలో ఉండదు కనుక అధికార యంత్రాంగం కూడా ప్రజల్ని దృష్టిలో పెట్టుకుని ఈ సమయంలో ప్రభుత్వ పెద్దలతో కలిసి పని చేయాల్సి ఉంటుంది.