చంద్రబాబు చేసిన తప్పులివేనా?

ఎన్నికల్లో తెలుగుదేశం ఘోర పరాజయం ఆ పార్టీ నేతలనే కాదు.. రాజకీయ విశ్లేషకులను కూడా ఆశ్చర్యానికి గురిచేసింది. ఈ ఎన్నికల్లో వైఎస్సార్ సీపీదే గెలుపు అని అన్ని రకాల సర్వేలూ నిర్ధారించినప్పటికీ, ఈ స్థాయిలో ఏకపక్ష విజయం వస్తుందని ఎవరూ అంచనా వేయలేదు. ప్రభుత్వ ఏర్పాటుకు అవసరమైన సంఖ్యలో వైఎస్సార్ సీపీకి సీట్లు వస్తాయని, వందకు అటూ ఇటూగా అవి ఉండొచ్చని ఎక్కువ మంది ఊహించారు. అయితే, వాస్తవ ఫలితాల్లో మాత్రం 175 స్థానాల్లో ఏకంగా 151 సీట్లు ఆ పార్టీకి దక్కడం.. టీడీపీ కేవలం 23 స్థానాలకే పరిమితం కావడం పలువురిని విస్మయపరిచింది.

తెలుగుదేశం పార్టీ నేతలు సైతం తమకు ఓటమి తప్పదని భావించినా, మరీ ఇంత దారుణమైన పరాభవం ఉంటుందని అనుకోలేదు. దీంతో ఎన్నికల ఫలితాలు వచ్చిన అనంతరం వారు బాగా డీలా పడిపోయారు. తమ ఓటమికి కారణాలేమిటా అని విశ్లేషించుకుంటున్నారు. ఇంతకీ ఈ ఎన్నికల్లో తెలుగుదేశం ఓటమికి కారణాలేమిటి? ఎందుకు ఇంత ఘోర పరాజయం మూటగట్టుకోవాల్సి వచ్చింది? ఈ ఓటమిలో చంద్రబాబు బాధ్యత ఎంత?

విభజన సమయంలో పీకల్లోతు కష్టాల్లో ఉన్న రాష్ట్రానికి అనభవంతుడైన చంద్రబాబు అయితే బాగుంటుందని భావించిన ప్రజలు.. ఆయనకే పట్టం కట్టారు. అప్పటివరకు వైఎస్సార్ సీపీకి అనుకూలంగా ఉన్న పరిస్థితి ఎన్నికలకు మూడు నెలల ముందు మొత్తం మారిపోయింది. ముఖ్యంగా యువత అంతా బాబుకే జైకొట్టారు. కానీ ఈ ఎన్నికలకు వచ్చేసరికి పరిస్థితి మారిపోయింది. అప్పుడు బాబుకు జైకొట్టిన యువతలో కొంతమంది పవన్ కల్యాణ్ కు, మరికొంతమంది జగన్ కు మద్దతుగా నిలిచారు. దీంతో టీడీపీ ఘోరంగా ఓడిపోయింది. ఇందుకు కారణం చంద్రబాబు చేసిన తప్పులే.

గత ఎన్నికల సమయంలో ఇచ్చిన హామీలను అమలు చేయడంలో ఘోరంగా విఫలమయ్యారు. ఎన్నికలు సమీపిస్తున్న సమయంలో చివరి ఏడాది హడావుడిగా కొన్ని పథకాలను అమలుచేయడానికి ప్రయత్నాలు చేశారు. అప్పటివరకు పట్టించుకోని వర్గాలను ఆకట్టుకునేందుకు యత్నించారు. ఇది ఒక విధంగా బాబుకు మైనస్ గానే మారింది. ఇక నిరుద్యోగ భృతి విషయంలోనూ చంద్రబాబు తప్పటడుగే వేశారు. తాము అధికారంలోకి వస్తే ప్రతి ఒక్క నిరుద్యోగికీ రూ.2వేల చొప్పున భృతి ఇస్తానని హామీ ఇచ్చిన బాబు.. తర్వాత చాలాకాలం పాటు ఆ ఊసే మరచిపోయారు. చివర్లో అనేక వడపోతల తర్వాత కొద్ది మందికే ఇచ్చాం అనే పేరుకు ఆ పథకాన్ని వర్తింపజేశారు. ఇదీ కూడా ఆయనకు ప్రతికూలంగా మారింది. రాష్ట్రానికి ప్రత్యేక హోదా విషయంలో బాబు వైఖరి తీవ్ర ప్రభావం చూపించింది.

తొలుత హోదా అవసరంలేదన్న ఆయనే.. అనంతరం హోదా కోసం పోరాడుతున్నట్టుగా ప్రయత్నించడం మొదటికే మోసం తెచ్చింది. మరోవైపు కేంద్రం సహకరించడంలేదని, నిధులు ఇవ్వడంలేదని పదేపదే చెప్పిన బాబు.. కొన్ని అంశాల్లో నిధులను బాగా దుర్వినియోగం చేశారనే ఆరోపణలు ఎదుర్కొన్నారు. ప్రచార ఆర్భాటానికి భారీగా నిధులు వెచ్చించారనే విమర్శలు వ్యక్తమయ్యాయి. ఎక్కడికి వెళ్లాలన్నా ప్రత్యేక విమానాల్లోనే వెళ్లడం వల్ల నిధులు భారీగా ఖర్చయ్యాయి. రెగ్యులర్ విమాన సౌకర్యం ఉన్న ప్రాంతాలకు కూడా ప్రత్యేక విమానాల్లో వెళ్లడం విమర్శలకు తావిచ్చింది. ఇక ఒక సెక్షన్ మీడియా ఇచ్చే కథనాలను చూసి, రాష్ట్రం అద్భుతంగా ఉందనే భ్రమలో ఉండిపోవడం కూడా చంద్రబాబు చేసిన పొరపాటే.

బాబు మెప్పు కోసం ఆయా మీడియా వండి వార్చిన కథనాల్లో నిజానిజాలే తెలుసుకునే ప్రయత్నం చేయలేదు. అంతా బాగానే ఉందనే భ్రమలో ఉండిపోవడంతో నివారణ చర్యలు చేపట్టలేకపోయారు. ఇక అద్భుతమైన రాజధాని నిర్మిస్తారని నమ్మని జనానికి నిరాశే ఎదురైంది. కేవలం డిజైన్ల ఎంపికకే రెండేళ్ల సమయం తీసుకున్న చంద్రబాబు.. తాత్కాలిక భవనాలు తప్ప.. శాశ్వత భవనాలు నిర్మించలేకపోయారనే అపవాదు ఎదుర్కొన్నారు. మరోవైపు సిట్టింగ్ ఎమ్మెల్యేల పట్ల ప్రజల్లో తీవ్రంగా ఉన్న వ్యతిరేకతను గుర్తించినా, వారిని మార్చే ప్రయత్నం చేయకపోవడం ఎన్నికల్లో విజయంపై ప్రభావం చూపించింది. ఇక అదేపనిగా సమీక్షలతో అధికారులను గంటల తరబడి వేచి చూసేలా చేయడం కూడా వారిలో వ్యతిరేకతకు కారణమైంది. ఇలాంటి మరెన్నో అంశాలే తెలుగుదేశం ఘోర పరాజయానికి కారణాలని చెప్పక తప్పదు.