తొక్కితే, పైకి లేచే ఛాన్సుందా చంద్రబాబూ!

2014 ఎన్నికల తర్వాత తెలంగాణలో దెబ్బ తిన్న తెలుగుదేశం పార్టీ, ఇటీవలి ఎన్నికలతో ఆంధ్రప్రదేశ్‌లోనూ దెబ్బతినేసింది. తెలంగాణలో తెలుగుదేశం పార్టీని టీఆర్‌ఎస్‌ ఏ స్థాయిలో ‘తొక్కేసిందో’ ప్రత్యేకంగా చెప్పాల్సిన పనిలేదు. ఆ తర్వాత తెలంగాణలో తెలుగుదేశం పార్టీ కోలుకోలేకపోయింది. టీడీపీ తరఫున తెలంగాణలో ఇప్పుడు చెప్పుకోదగ్గ నాయకుడు లేడంటే పరిస్థితి ఎంత దారుణంగా వుందో అర్థం చేసుకోవచ్చు.

మరి, 2024 ఎన్నికల నాటికి తెలుగుదేశం పార్టీ ఆంధ్రప్రదేశ్‌లో ఎలా వుండబోతోంది.? ఏమోగానీ, చంద్రబాబు మాత్రం ‘మమ్మల్ని ఎంతగా మీరు తొక్కేయాలనుకుంటే.. అంత గట్టిగా నిలబడి చూపిస్తాం.. ఎంత తొక్కితే అంత పైకి లేస్తాం..’ అని చంద్రబాబు సొంత నియోజకవర్గం కుప్పంలో పర్యటన సందర్భంగా వ్యాఖ్యానించారు. ఈ వ్యాఖ్యలిప్పుడు రాజకీయ వర్గాల్లో అందర్నీ ఆశ్చర్యపరుస్తున్నాయి.

నలుగురు రాజ్యసభ సభ్యుల్ని ఎన్నికలు పూర్తయ్యాక నెల రోజులు కూడా కాపాడుకోలేకపోయింది తెలుగుదేశం పార్టీ. పైగా, అందులో చంద్రబాబుకి అత్యంత సన్నిహితులైనవారు. దాదాపు 16 మంది ఎమ్మెల్యేలు బీజేపీ వైపు చూస్తున్నట్లుగా ప్రచారం జాగుతోంది. మొత్తం 23 మంది ఎమ్మెల్యేలలో 16 మంది జారిపోతే, తెలుగుదేశం పార్టీ ఉనికి ఆంధ్రప్రదేశ్‌లో ప్రశ్నార్థకమవుతుందన్నది నిర్వివాదాంశం.

ఎన్నికలయ్యాక, విహార యాత్ర కోసం విదేశాలకు వెళ్ళొచ్చిన చంద్రబాబు, పార్టీ పటిష్టత కోసం సరైన చర్యలు ఇప్పటిదాకా చేపట్టింది లేదు. రాష్ట్రమంతటా పర్యటిస్తాననీ, కార్యకర్తలకు అండగా వుంటాననీ చంద్రబాబు తాజాగా సెలవిచ్చారుగానీ, నిజంగానే చంద్రబాబులో అంత ఓపిక వుందా.? అన్నది ప్రస్తుతానికైతే మిలియన్‌ డాలర్ల ప్రశ్నే.

రాజకీయాలు గతంలోలా లేవు. 2004 ఎన్నికల్లో, 2009 ఎన్నికల్లో ఓడిపోయినా చంద్రబాబు మొత్తం పదేళ్ళపాటు ప్రతిపక్ష నేతగా బలంగా నిలబడగలిగారు. అయితే, ఇప్పుడు పరిస్థితులు వేరు. ఓడిపోవడమంటే.. అంతే సంగతులు. జగన్‌ నిలబడలేదా.? అంటే, అందుకు కారణాలు వేరే వున్నాయి. అంతలా సానుకూల పరిస్థితులు చంద్రబాబుకి మాత్రం లేవని నిస్సందేహంగా చెప్పొచ్చు.