వైజాగ్ స్టీల్ ప్లాంట్ పై కేంద్రం శీతకన్ను

విశాఖ ఉక్కు-ఆంధ్రుల హక్కు అని ఉద్యమాలు చేసి సాధించుకున్న ప్రతిష్టాత్మక వైజాగ్ స్టీల్ ప్లాంట్ పై కేంద్రం సవతి ప్రేమ చూపిస్తోంది. స్టీల్ అభివృద్ధిని పట్టించుకోవడం మానేసి దక్షిణ కొరియాకు చెందిన పోస్కో కంపెనీకి ప్రాధాన్యతనిస్తోంది. స్టీల్ ప్లాంటుకు చెందిన విలువైన భూములను ఆ కంపెనీకి దారాధత్తం చేస్తోంది. హైగ్రేడ్ స్టీల్ ఫ్యాక్టరీ ఏర్పాటు చేస్తామని ముందుకొచ్చిన పోస్కోకు ఇప్పటికే 900 ఎకరాలు కేటాయించింది. అలాగే మరో 900 ఎకరాలు ఇచ్చేందుకు సన్నద్ధమవుతోంది.

ప్రభుత్వరంగ సంస్థలను నిర్వీర్యం చేస్తూ ప్రైవేటీకరణ వైపు అడుగులు వేస్తున్న కేంద్రంలోని ఎన్డీఏ సర్కారు.. విశాఖ ఉక్కును కాలరాసే చర్యలకు ఉపక్రమించింది. ఇందులో భాగంగానే స్టీల్ ప్లాంట్ మూడో దశ విస్తరణ ప్రతిపాదనలను పక్కన పెట్టేయడంతోపాటు పోస్కో కంపెనీ అభివృద్ధికి పాటుపడుతోందనే ఆరోపణలు వినిపిస్తున్నాయి.

వాస్తవానికి పోస్కో కంపెనీ ఒడిశాలో స్టీల్ ప్లాంటు పెట్టాలని దాదాపు 15 ఏళ్లు ప్రయత్నించి విఫలమైంది. ఈ క్రమంలో ఏపీకి వచ్చిన ఆ కంపెనీకి కేంద్రం గ్రీన్ సిగ్నల్ ఇచ్చింది. విశాఖ స్టీల్ ప్లాంటు వద్ద దాదాపు 26వేల ఎకరాల భూములు ఉండటంతోపాటు పోర్టు నిర్మించుకోవడానికి అనువైన స్థలం ఉండటంతో ఆ దిశగా పావులు కదిపింది. హైగ్రేడ్ స్టీల్ ప్లాంట్ ఏర్పాటు పేరుతో విశాఖ ఉక్కుతో ఒప్పందం కుదిరేలా చేసింది.

ఏడాదికి 50 లక్షల టన్నుల ఉత్పత్తి చేసే లక్ష్యంతో పోస్కో కంపెనీ ప్లాంటు పెట్టనుంది. ఇందుకు దాదాపు రూ.35వేల కోట్ల పెట్టుబడి పెట్టనుందని సమాచారం. ఇందుకోసం తమకు 1170 ఎకరాలు కేటాయించాలని కంపెనీ కోరగా.. ఇప్పటికే 900 ఎకరాలను కేంద్రం కేటాయించింది. ఈ భూములు లీజుకు ఇస్తున్నారా లేక విక్రయిస్తున్నారా అనేదానిపై స్పష్టత లేదు.

అలాగే ఈ కంపెనీ వల్ల ఎంత మందికి ఉద్యోగ అవకాశాలు వస్తాయనే అంశంపైనా క్లారిటీ లేదు. ఇక ప్రైవేటు కంపెనీపై కేంద్రం విపరీతమైన ప్రేమ చూపిస్తూ.. విశాఖ ఉక్కుపై మాత్రం పట్టించుకోవడంలేదు. తాము 3 బెర్తులతో పోర్టు నిర్మించుకుంటామని విశాఖ ఉక్కు పరిశ్రమ మూడో దశ విస్తరణపై కేంద్రానికి ప్రతిపాదనలు పంపించగా.. వాటిపై ఎన్డీఏ సర్కారు నోరు మెదపడంలేదు.

అలాగే ప్రస్తుతం ఏడాదికి 73 లక్షల టన్నులుగా ఉన్న ఉత్పత్తి సామర్థ్యాన్ని మరో 32 లక్షల టన్నులకు పెంచుకుంటామన్న ప్రతిపాదనలపైనా స్పందించలేదు. ఇంత జరుగుతున్నా రాష్ట్రంలోని వైసీపీ సర్కారుకు చీమ కుట్టినట్టయినా లేదనే విమర్శలు వినిపిస్తున్నాయి. ఇప్పటికే రాష్ట్ర ప్రయోజనాలను కేంద్రం వద్ద తాకట్టు పెట్టిన ప్రభుత్వ పెద్దలు.. విశాఖ ఉక్కు పరిశ్రమ విషయంలోనూ మీనమేషాలు లెక్కిస్తున్నారని పలువురు మండిపడుతున్నారు.