బిగ్‌ క్వశ్చన్‌: ఎవరిది జర్నలిజం.? ఎవరిది బ్రోకరిజం.?

మీడియా అండ లేనిదే ఏ రాజకీయ పార్టీ కూడా మనుగడ సాధించే పరిస్థితి ప్రస్తుతం లేదన్నది నిర్వివాదాంశం. మీడియా నైతిక విలువలకు కట్టుబడి ప్రజా శ్రేయస్సు కోసం తనంతట తానుగా రాజకీయ పార్టీలకు మద్దతిస్తుందా.? మీడియాని బలవంతంగా లోబర్చుకుని, రాజకీయ పార్టీలు తమ ప్రచారాస్త్రంగా మలచుకుంటున్నారా.? రాజకీయ పార్టీలకు అమ్ముడుపోయి మీడియా, ప్రజా శ్రేయస్సుని పక్కన పెట్టి రాజకీయ కరపత్రికగా మారిపోతుందా.? అన్న విషయమై భిన్నాభిప్రాయాలున్నాయి.

దేశంలో మిగతా రాష్ట్రాల్లో పరిస్థితులు ఎలా వున్నా, ఆంధ్రప్రదేశ్‌కి వచ్చేసరికి.. మీడియా అత్యంత పతనావస్థలో వుందన్నది నిర్వివాదాంశం. ఓ రాజకీయ పార్టీకి అనుకూలంగా మీడియా వ్యవహరించడం వేరు. ఆ రాజకీయ పార్టీకి అనుకూలంగా వ్యవహరిస్తూ.. మిగతావారికి వ్యతిరేకంగా పనిచేయడం వేరు. ఏపీలో మీడియా చేస్తున్నది రెండో రకం. ఇక్కడే అసలు సమస్య వస్తోంది.

అధికార వైసీపీకి చెందిన ఓ నేత, ‘బ్రోకరిజం’ అంటూ మీడియాపై తీవ్రమైన వ్యాఖ్యలు చేశారు. నిజమే, ఓ సెక్షన్‌ ఆఫ్‌ మీడియా చేస్తోన్నది జర్నలిజం కాదు.. బ్రోకరిజం.. అన్న వాదన ఈనాటిది కాదు. ‘పచ్చ మీడియా’ గురించి ఇలా ‘బ్రోకరిజం’ అంటోన్న అధికార పార్టీ, ‘బ్లూ మీడియా’ గురించి ఏం చెప్పగలుగుతుంది.?

‘అందులో తప్పు రాశారు అధ్యక్షా..’ అని తమ సొంత పత్రిక గురించే ముఖ్యమంత్రి వైఎస్‌ జగన్‌, అసెంబ్లీలో చెప్పుకోవాల్సి వచ్చింది. ఇదీ రాష్ట్రంలో ప్రస్తుతం మీడియా తీరు. టీడీపీ అనుకూల మీడియా మీద వైసీపీకి ఒళ్ళు మండి ‘జర్నలిజంని కాస్తా బ్రోకరిజం’ అనేసింది. అదే మాట, బ్లూ మీడియాని ఉద్దేశించి టీడీపీ అంటుండడం కూడా చాలాకాలంగా చూస్తూనే వున్నాం.

కొన్నాళ్ళ క్రితం ఓ రాజకీయ పార్టీకి చెందిన ఓ ముఖ్య నేత, ఓ పత్రికను ఉద్దేశించి ‘టాయిలెట్‌ పేపర్‌’ అనేశారు. అప్పట్లో అది పెను దుమారమే రేపింది. ఆ పెద్దమనిషి, ఆ పత్రికని ప్రసన్నం చేసుకుని, ఆ పత్రికలో తనను పొగడ్తలతో ముంచెత్తేలా వార్తలు రాయించుకున్నారనుకోండి.. అది వేరే సంగతి. పాత్రికేయ రంగంలో ఇప్పుడు విలువల గురించి మాట్లాడితే అంతకన్నా హాస్యాస్పదం ఇంకోటుండదేమో. ఆ స్థాయిలో జర్నలిజంని భ్రష్టుపట్టించేశాయి రాజకీయ పార్టీలు.

ఇక్కడ రాజకీయ పార్టీల్ని కూడా గట్టిగా అనలేని పరిస్థితి. ఎందుకంటే, కొన్ని మీడియా సంస్థలు.. తాము బ్రోకరిజం చేయడానికే వున్నామన్నట్లుగా వ్యవహరిస్తున్నాయి కూడా. కొద్దోగొప్పో సోషల్‌ మీడియా, కొన్ని వెబ్‌సైట్లు (ఇందులోనూ పెంట చాలా ఎక్కువే వున్నా.. విలువలకు కట్టుబడి పనిచేసేవి కొన్నయినా వున్నాయని చెప్పకోవచ్చు) మాత్రం.. కొంతమేర ప్రజా శ్రేయస్సు కోసం పనిచేస్తున్నాయి తప్ప.. దాదాపుగా తెలుగు మీడియా అంతా ఏనాడో భ్రష్టుపట్టిపోయింది.