ఏపీలో ఫ్యాన్ స్పీడ్.. కేంద్రంలో కమలం జోరు

ఎప్పుడెప్పుడా అని అందరూ ఎంతో ఉత్కంఠతో ఎదురుచూస్తున్న ఎన్నికల ఫలితాలు వచ్చేశాయి. అందరూ ఊహించినట్టుగానే ఆంధ్రప్రదేశ్ లో వైఎస్సార్ సీపీ ప్రభంజనం సృష్టిస్తోంది. అక్కడ ఫ్యాన్ ఫుల్ స్పీడ్ గా తిరుగుతోంది. నాలుగు రౌండ్లు ముగిసే సరికి ఏకంగా 150 స్థానాల్లో ఆధిక్యంలో దూసుకెళ్తోంది. అధికార తెలుగుదేశం పార్టీ కేవలం 24 సీట్లలో మాత్రమే ఆధిక్యంలో ఉండగా.. పవన్ కల్యాణ్ నేతృత్వంలోని జనసేన కేవలం ఒక్క స్థానంలో మాత్రమే లీడ్ లో కొనసాగుతోంది. పోస్టల్ బ్యాలెట్ తోనే వైఎస్సార్ సీపీ హవా మొదలైంది. అనంతరం మొదలైన ఈవీఎం ఓట్ల లెక్కింపులోనూ తిరుగులేని ఆధిక్యతలో దూసుకెళ్తోంది. మంగళగిరిలో నారా లోకేశ్ వెనకంజలో ఉన్నారు.

ఇక ఈ ఎన్నికల్లో జనసేన ప్రభావం ఏమాత్రం కనిపించలేదు. ఆ పార్టీకి దాదాపు 10 శాతం ఓట్లు పోలైనట్టు ఇప్పటివరకు అందిన సమాచారం మేరకు తెలుస్తోంది. జనసేన అధినేత పవన్ కల్యాణ్ పోటీచేసిన గాజువాక, భీమవరం రెండు చోట్లా వెనకబడే ఉన్నారు. భీమవరంలో మూడో స్థానంలో ఉండగా.. గాజువాకలో ఓ సారి ముందంజలోకి వచ్చి మళ్లీ వెనకబడ్డారు. ఆ పార్టీ తూర్పుగోదావరి జిల్లా రాజోలులో మాత్రం స్వల్ప ఆధిక్యంలో కొనసాగుతోంది. ఇక పార్లమెంటు స్థానాల్లోనూ వైఎస్సార్ సీపీ తిరుగులేని ఆధిక్యత సాధించింది. ఆ పార్టీ ఏకంగా 23 స్థానాల్లో లీడ్ లో ఉండగా.. టీడీపీ రెండు స్థానాల్లో మాత్రమే ముందంజలో ఉంది.

ఒక్కసారి అవకాశం ఇవ్వాలంటూ జగన్ చేసిన అభ్యర్థనను ప్రజలు అంగీకరించినట్టుగా ఈ ఫలితాలను బట్టి తెలుస్తోంది. ఇక కేంద్రంలో మరోసారి ఎన్డీఏ ప్రభుత్వమే ఏర్పాటు కానుంది. ఎగ్జిట్ పోల్ ఫలితాల్లో వెల్లడైన మేరకే ఎన్డీఏకి స్పష్టమైన మెజార్టీ కనిపిస్తోంది. బీజేపీ నేతృత్వంలోని ఎన్డీఏ ఏకంగా 335 స్థానాల్లో ఆధిక్యంలో ఉండగా.. యూపీఏ కూటమి 90 స్థానాలకే పరిమితమైంది. బిహార్ లో బీజేపీ దాదాపు క్లీన్ స్వీప్ చేయడం విశేషం. అలాగే యూపీలో కూడా బీజేపీ స్పష్టమైన ఆధిక్యం కనబరుస్తోంది.

మరోవైపు తెలంగాణలో అధికార టీఆర్ఎస్ జోరు కనిపిస్తున్నప్పటికీ, ఇక్కడ బీజేపీ బాగానే పుంజుకుంది. మొత్తం 17 స్థానాలకు గానూ 8 స్థానాల్లో టీఆర్ఎస్, 4 స్థానాల్లో బీజేపీ, 4 స్థానాల్లో కాంగ్రెస్, ఒక స్థానంలో ఎంఐఎం ఆధిక్యంలో ఉన్నాయి. కారు.. సారు.. పదహారు.. ఢిల్లీలో సర్కారు నినాదంతో బరిలోకి దిగిన టీఆర్ఎస్ కు ఇది ఒకవిధంగా ఎదురుదెబ్బగానే చెప్పొచ్చు. కాంగ్రెస్ కంటే బీజేపీ ఇక్కడ బలం పుంజుకోవడం విశేషం.