ఆంధ్రప్రదేశ్ ప్రయోజనాలపై వైసీపీ చిత్తశుద్ధి ఇదీ.!

ప్రధాని నరేంద్ర మోడీ దగ్గరకు వెళ్ళేసరికి వైసీపీ నేతలు అనుకోకుండా వంగి వంగి దండాలు పెట్టేస్తారెందుకు.? పెద్దాయన, పైగా.. దేశ ప్రధాని కాబట్టి, గౌరవ భావంతో అలా వంగి వంగి నమస్కారం పెట్టాలనిపిస్తుందేమో.! అలాగైతే, తప్పుపట్టడానికేమీ లేదు. కానీ, ఇంట్లో పులి, వీధిలో పిల్లి.. అన్న చందాన వ్యవహరించినప్పుడే, ‘చిత్తశుద్ధి’ అన్న అంశం చుట్టూ చర్చ జరుగుతుంది.

ప్రత్యేక హోదా విషయమై కేంద్రం మెడలు వంచేస్తామని ఇదే వైసీపీ తరచూ నినదిస్తుంటుంది. ఏదీ ఎక్కడ.? ప్రధాని నరేంద్ర మోడీని చూడగానే వంగిపోయే మెడలు కలిగిన వైసీపీ నేతలు, ప్రత్యేక హోదా కోసం కేంద్రంపై ఒత్తిడి తీసుకురాగలరా.? ఛాన్సే లేదు.

2019 ఎన్నికల్లో రాజకీయ ప్రయోజనం కోసం, అత్యంత వ్యూహాత్మకంగా అప్పట్లో వైసీపీ ఎంపీలు తమ పదవులకు రాజీనామా చేశారు. ఉప ఎన్నికలు వచ్చే అవకాశమే లేదని ధృవీకరించుకున్నాక చేసిన రాజీనామాలు అవి. తూచ్, తాము చిత్తశుద్ధితోనే రాజీనామా చేశామని వైసీపీ చెప్పదలచుకుంటే, ఇప్పుడెందుకు వైసీపీ ఎంపీలు అదే ప్రత్యేక హోదా కోసం రాజీనామా చేయడంలేదు.?

ప్రత్యేక హోదా సంగతి పక్కన పెడదాం. శాసన మండలిని రద్దు చేయాలని అసెంబ్లీలో తీర్మానం చేసి, దాన్ని కేంద్రానికి పంపిన వైసీపీ, ఆ దిశగా కూడా కేంద్రం నుంచి సానుకూల ఫలితం రాబట్టలేకపోయింది. కేంద్రంపై ఒత్తిడి తీసుకురాలేకపోయింది. ఇక్కడా యూ టర్న్ రాజకీయమే.

పోనీ, ప్రత్యేక రైల్వే జోన్ విషయంలో అయినా వైసీపీ ఎంపీలు పోరాడుతున్నారా.? అంటే అదీ లేదాయె. ఏ విషయంలో కేంద్రంపై వైసీపీ పోరాడుతోంది.? ఏ రకంగా కేంద్రం మెడల్ని వైసీపీ వంచగలుగుతోంది.? ఛాన్సే లేదు. వంగిపోయే మెడలున్న రాజకీయ నాయకుల నుంచి, ఇతరుల మెడల్ని వంచేసేంత చిత్తశుద్ధిని ఆశించలేం.

వైసీపీనే కాదు, టీడీపీ కూడా గతంలో చేసిందిదే. 60 – 40 భాగస్వామ్యం ఇలాగే వుంటుంది మరి.