మీడియాతో యుద్ధమా.? ఇదెక్కడి చోద్యం జగన్ సారూ.!

మీడియా ఎప్పుడూ ప్రజల పక్షానే నిలబడాలి. అది ఎప్పుడూ అధికార పక్షాన్ని నిలదీస్తూనే వుండాలి. మీడియా కూడా అధికార పక్షానికి బాకా ఊదితే, ప్రజల తరఫున నిలబడేది ఎవరు.? మీడియాని నిఖార్సయిన ప్రతిపక్షంగా భావిస్తుంటారు ప్రజాస్వామ్యవాదులు.

అయితే, మీడియా గత కొన్నేళ్ళలో ఎలాంటి వింత పోకడలు ప్రదర్శిస్తోంది.? తద్వారా మీడియా అనేది రాజకీయ నాయకుల దృష్టిలో ఎంత చులకనైపోయింది.? అన్నవి వేరే అంశాలు. మీడియా, కొన్ని రాజకీయ పార్టీలకు అమ్ముడుపోవచ్చుగాక.. అలాగని, మీడియా.. అధికార పక్షాన్ని ప్రశ్నంచకూడదని అంటే ఎలా.? మీడియా, ప్రభుత్వ వైఫల్యాల్ని ఎత్తి చూపకూడదంటే ఎలా.? మీడియా మీద ప్రభుత్వం యుద్ధం ప్రకటిస్తే ఎలా.? పైగా, అధికారుల్ని.. మీడియాపైకి ప్రభుత్వ పెద్దలు ఉసిగొల్పడమా.? ఇది నిజంగానే సరికొత్త పోకడ.

అధికారం చేతిలో వుంటే, ఏదైనా మాట్లాడొచ్చనుకోవడమే ఇన్ని అనర్థాలకీ కారణం. ఓ రెండు మూడు మీడియా సంస్థలు ప్రభుత్వానికి ఎదురొడ్డి నిలబడగలవా.? ఆయా మీడియా సంస్థల ఆర్థిక మూలాల్ని ప్రభుత్వ పెద్దలు దెబ్బకొట్టడం సులభమా.? మీడియా, ప్రభుత్వాన్ని కూలగొట్టడం సులభమా.? తెలుగు నాట పలు మీడియా సంస్థలు అధికార పార్టీకి సరెండర్ అయిపోయాయి.

ఒకప్పుడు ‘పచ్చ మీడియా’ ట్యాగ్ తగిలించుకున్న ‘మెరుగైన’ ఛానల్, ఆ తర్వాత ‘బలుగు’ రంగు ఎలా పులుముకుందో ప్రత్యేకంగా చెప్పాల్సిన పనిలేదు. మీడియాతో యుద్ధం చేయడమేంటి.? మీడియాని ఎలా లోబర్చుకోవాలో అధికార పక్షానికి తెలుసు. అమ్మాయిలపై అఘాయిత్యాల విషయంలో ప్రభుత్వం ఎంత వేగంగా స్పందించినాసరే, అలాంటివి జరగకూడదనే కోణంలో మీడియా, ప్రభుత్వాన్ని నిలదీసి తీరుతుంది. వ్యవస్థలో వైఫల్యాల్ని ఎండగడుతుంది.

ప్రతిపక్షంలో వున్నప్పుడు వైసీపీ చేసిందేంటి.? వైఎస్ జగన్ మోహన్ రెడ్డి మాట్లాడిందేంటి.? ఆయా అంశాలపై అధికారులతో సమీక్ష సందర్భంగా ‘మీడియాతో యుద్ధం చేయాల్సి వస్తోంది..’ అని అనడమంటే, అంతకన్నా హాస్యాస్పదం ఇంకోటుండదు. మీడియాతో కాదు, ప్రజలెదుర్కొంటున్న సమస్యలతో యుద్ధం చేయాలి. నేరస్తులతో యుద్ధం చేయాలి.