కేసీఆర్ వ్యతిరేకుల్ని ఏకం చేస్తున్న ఈటెల.!

తెలంగాణ మాజీ మంత్రి ఈటెల రాజేందర్, తెలంగాణలో కేసీఆర్ వ్యతిరేకులందర్నీ ఏకతాటిపైకి తెచ్చేందుకు ప్రయత్నిస్తున్నారు. ఈ క్రమంలో ఒకప్పటి టీఆర్ఎస్ సీనియర్ నేత డి.శ్రీనివాస్ అలాగే మరికొందరు మాజీ టీఆర్ఎస్ నేతలతో మంతనాలు జరిపారు తాజాగా. డి.శ్రీనివాస్ ఒకప్పుడు కాంగ్రెస్ పార్టీలో కీలక నేత. ఆ తర్వాత కేసీఆర్ పిలుపుతో తెలంగాణ రాష్ట్ర సమితిలో చేరారు. అయితే, కేసీఆర్ కుమార్తె కవిత రాజకీయ భవిష్యత్తు కోసం డీఎస్ విషయంలో కొందరు గులాబీ నేతలు అత్యంత వ్యూహాత్మకంగా పావులు కదిపి, ఆయన్ని పార్టీ నుంచి బయటకు పంపేశారు.

డి.శ్రీనివాస్ తనయుడు అరవింద్ బీజేపీలో కీలక నేతగా వ్యవహరిస్తున్న విషయం విదితమే. ఇక, డీఎస్ – ఈటెల మధ్య సుదీర్ఘంగా రాజకీయ మంతనాలు జరిగినట్లు తెలుస్తోంది. నిన్ననే కాంగ్రెస్ నేత భట్టి విక్రమార్కతో ఈటెల చర్చలు జరిపారు. కేసీఆర్ వ్యతిరేక పోరాటంలో తనతో అందరూ కలిసి రావాలని ఈటెల రాజేందర్ ఆయా నేతలను కోరుతున్నారు. అయితే, భట్టి విక్రమార్క.. ఈటెల రాజేందర్ కాంగ్రెస్ పార్టీలోకి రావాల్సిందిగా కోరినట్లు సమాచారం.

డీఎస్, బీజేపీలోకి ఈటెల వెళితే మంచిదని అభిప్రాయపడ్డారట. అయితే, ఇప్పుడున్న పరిస్థితుల్లో ఏదో ఒక పార్టీలోకి వెళ్ళడం సమంజసం కాదన్న భావనలో ఈటెల వున్నట్లు తెలుస్తోంది. అన్ని పార్టీలకూ సమదూరం పాటిస్తూనే, ఆయా పార్టీల్లోని ముఖ్య నేతలతో సన్నిహిత సంబంధాలు ఏర్పరచుకోవాలన్న ఆలోచనలో ఈటెల వున్నారని ఈటెల సన్నిహితులనుంచి లీకులు అందుతున్నాయి.

కేసీఆర్ వ్యతిరేక శక్తుల్ని ఏకం చేయాలన్న ఆలోచన గతంలోనూ తెరపైకొచ్చినా, ఎవరూ ఆ క్రమంలో విజయవంతమైన దాఖలాల్లేవు. ప్రొఫెసర్ కోదండరామ్ ప్రయత్నాలే ఇందుకు నిదర్శనంగా చెప్పుకోవచ్చు. కాగా, ఈటెల ప్రతి అడుగునీ తెలంగాణ రాష్ట్ర సమితి ప్రత్యేకంగా గమనిస్తూ వస్తోంది. ఈటెలకు రాజకీయ భవిష్యత్తు లేకుండా చేయాలన్న కోణంలో గులాబీ పార్టీ పావులు కదుపుతోంది.