ఎర్రన్నా, ఆ ముగ్గుర్నీ గెలిపించావన్నా!

ఒకప్పుడు తెలుగుదేశం పార్టీలో కీలక నేతగా ఓ వెలుగు వెలిగిన దివంగత ఎర్రన్నాయుడు కుటుంబం నుంచి ముగ్గురు ఈసారి విజయం సాధించారు. అందులో ఒకరు ఎర్రన్నాయుడు సోదరుడు అచ్చెన్నాయుడు కాగా, మరొకరు ఎర్రన్నాయుడు తనయుడు రామ్మోహన్‌నాయుడు. ఎర్రన్నాయుడు కుమార్తె ఆదిరెడ్డి భవానీ సైతం ఈ ఎన్నికల్లో విజయం సాధించారు. అచ్చెన్నాయుడు, రామ్మోహన్‌నాయుడు తమ సిట్టింగ్‌ స్థానాల్ని నిలబెట్టుకోవడానికి చెమటోడ్చాల్సి వచ్చింది.

ఓ దశలో అచ్చెన్నాయుడు ఓడిపోవడం ఖాయమని అంతా అనుకున్నారు. రామ్మోహన్‌నాయుడు అయితే బొటాబొటి మెజార్టీతో గట్టెక్కారు. అచ్చెన్నాయుడిపై చాలా అవినీతి ఆరోపణలు వచ్చాయి. శ్రీకాకుళం జిల్లాలో అచ్చెన్నాయుడు పేరు చెబితే అభివృద్ధి గుర్తుకు రాదు సరికదా, అరాచకాలే గుర్తుకొస్తాయంటారు చాలామంది. అయితే, అదంతా ప్రత్యర్థుల పసలేని ఆరోపణలు తప్ప, నిజం కావనీ, అందుకు తన గెలుపే నిదర్శనమనీ అచ్చెన్నాయుడు అంటున్నారు.

మరోపక్క, శ్రీకాకుళం అసెంబ్లీ నియోజకవర్గంలో తెలుగుదేశం పార్టీకి అనూహ్యంగా షాక్‌ తగిలింది. సిట్టింగ్‌ ఎమ్మెల్యే గుండ లక్ష్మిదేవిపై సానుకూలత వున్నా, వైఎస్సార్‌ కాంగ్రెస్‌ పార్టీ వేవ్‌ కారణంగా ఆమె పరాజయం పాలయ్యారు. గెలవడం అసాధ్యమనుకున్న ధర్మాన ప్రసాదరావు ఘనవిజయాన్ని అందుకున్నారు. ఆయనకు మంత్రి పదవి ఖాయమన్న ప్రచారం జరుగుతున్న సంగతి తెల్సిందే. ఇక, అచ్చెన్నాయుడు కుమార్తె ఆదిరెడ్డి భవానీ విషయానికొస్తే ఆమె అనూహ్యంగా టిక్కెట్‌ దక్కించుకున్నారు, అంతే అనూహ్యంగా విజయాన్ని అందుకున్నారు. చివరి నిమిషంలో టిక్కెట్‌ ఖరారైనా, మెరుపు వేగంతో నియోజకవర్గంలో ఎన్నికల ప్రచారాన్ని నిర్వహించిన ఆదిరెడ్డి భవానీ, దాదాపు ప్రతి ఇంటి తలుపూ తట్టి, తన విజయాన్ని ఖరారు చేసుకున్నారు. ఇక్కడ క్రాస్‌ ఓటింగ్‌ చాలా ఎక్కువగా జరగడం గమనార్హం.

ఏదిఏమైనా ఎర్రన్నాయుడు కుటుంబం నుంచి ముగ్గురు చట్ట సభలకు ఎంపిక కావడం పట్ల శ్రీకాకుళం జిల్లా ప్రజానీకం హర్షం వ్యక్తం చేస్తున్నారు. అచ్చెన్నాయుడిని మినహాయిస్తే రామ్మోహన్‌నాయుడు, ఆదిరెడ్డి భవానీల పట్ల పార్టీలకతీతంగా సానుకూలత వుంది. అదే వారి గెలుపుకు కారణమైంది. ఐదేళ్ళు ఎంపీగా పనిచేసినా రామ్మోహన్‌నాయుడిపై ఒక్క అవినీతి మరకా అంటలేదు సరికదా, మంచి వక్తగా.. అద్భుతమైన పార్లమెంటేరియన్‌గా గుర్తింపు పొందారు. ఆయన విజయం నల్లేరు మీద నడకేనని చిక్కోలు ప్రజానీకం అనుకున్నారుగానీ, వైఎస్సార్సీపీ సునామీ ముందు ఆయన కూడా ఒకింత వణకక తప్పలేదు. ఎలాగైతేనేం, చివరికి రామ్మోహన్‌ విజయాన్ని అందుకున్నారు. రామ్మోహన్‌నాయుడు, ఆదిరెడ్డి భవానీల గెలుపుతో ‘ఎర్రన్నా.. గెలిపించావన్నా’ అని అనుకుంటున్నారు ఎర్రన్నాయుడు అభిమానులు.