బాపు-రమణ జీవం పోసిన ‘పెళ్లిపుస్తకం’కు 30 ఏళ్లు

సినిమాల్లో పౌరాణికం, జానపదం, ప్రేమ, యాక్షన్, కామెడీ, సెంటిమెంట్, ట్రాజెడీ, క్లాస్, మాస్ కుటుంబకథా చిత్రాలు ఉంటాయి. వీటిలో అన్ని వర్గాల ప్రేక్షకులు మెచ్చే సినిమా క్లాసిక్ అవుతుంది. తెలుగులో అటువంటి క్లాసిక్స్ కు కొదవ లేదు. తెలుగు సినిమాల్లో అచ్చ తెలుగు వాతావరణం చూపించే దర్శకుల్లో బాపు అగ్రగామి. తన రచనలో తెలుగుదనం నింపే రచయిత ముళ్లపూడి వెంకటరమణ. బాపు-రమణ ద్వయంగా వీరిద్దరూ తెలుగు సినిమాపై వేసిన ముద్ర చెరగనిది. వీరిద్దరూ కలిసి తెరపై ఆవిష్కరించిన అద్భుతాల్లో ఒకటి ‘పెళ్లిపుస్తకం’. ఈ సినిమా విడుదలై ఏప్రిల్ 1వ తేదీకి 30 ఏళ్లు పూర్తయ్యాయి.

భార్యభర్తల అనుబంధాన్ని తెరపై ఇంత అందంగా చూపించొచ్చా.. భార్యభర్తల బంధం అంటే ఇలానే ఉండాలి.. అనిపించేలా బాపు-రమణ సినిమాను తెరకెక్కించిన విధానం ప్రేక్షకుల్ని కట్టిపడేసింది. రాజేంద్రప్రసాద్-దివ్యవాణి తమ పాత్రలకు ప్రాణం పోశారు. సినిమా ఆద్యంతం.. ప్రేక్షకులు కృష్ణమూర్తి-సత్యభామ పాత్రల్లో తమని తాము ఊహించుకున్నారంటే అతిశయోక్తి కాదు. నిజజీవితంలో భార్యభర్తల మధ్య అనుబంధం, మనస్పర్ధలను పరిష్కరించుకోవడం, ఒకరిపై ఒకరికి ప్రేమ, కోపతాపాలు, అలకలు, హృద్యమైన శృంగారం.. ఇలా ప్రతి అంశంలోనూ తెలుగుదనమే కనిపిస్తుంది. సినిమాలా కాకుండా ప్రేక్షకులకు జీవితసూత్రాలుగా, జీవితపాఠంగా అనిపించేలా ఉండటమే పెళ్లిపుస్తకం ప్రత్యేకత. సినిమాలో వచ్చే పుట్టుమచ్చ సన్నివేశం గురించి ఎంత చెప్పుకున్నా తక్కువే.

ముఖ్యంగా దివ్యవాణి కట్టు బొట్టు, హావభావాలతో ప్రేక్షకుల్ని కట్టిపడేసింది. ఈ సినిమాతో దివ్యవాణి బాపు బొమ్మ అనే పేరు తెచ్చుకుంది. రాజేంద్రప్రసాద్.. ఈ సినిమాలో భర్త పాత్రలో ఒదిగిపోయి తనలోని నటనను చూపించారు. సినిమాకు అదనపు ఆకర్షణ కేవీ మహదేవన్ సంగీతం. ‘శ్రీరస్తు.. శుభమస్తు..’ పాట ప్రతి ఇంట పెళ్లి శుభకార్యంలో మోగాల్సిందే. చిత్రీకరణ కూడా అంతే అందంగా ఉంటుంది. సన్నివేశానికి తగ్గట్టుగా ఆయన అందించిన నేపథ్య సంగీతం సినిమాలో లీనమయ్యేలా, పాత్రలతో మమేకమయ్యేలా చేస్తుంది. ఇంతటి కవితాతాత్మక సినిమా తెలుగులో తెరకెక్కడం మన అదృష్టం. అందుకే ‘పెళ్లిపుస్తకం’ సినిమా జీవం పోసుకుని ప్రేక్షకుల మనసుల్లో ఉండిపోయంది.