కామెడీ కాదు, సీరియస్: బాలయ్య ‘రివల్యూషన్’ రాజకీయం.!

నందమూరి బాలకృష్ణ మాట్లాడితే ఒక్కోసారి ఆయన అభిమానులు కూడా చెవులు మూసుకోవాల్సిందే. చెవులే కాదు, కళ్ళు కూడా మూసుకోవాల్సి వస్తుంటుుంది ఒక్కోసారి. ఆయన హావభావాల్ని తట్టుకోవడం ఎవరికైనా కష్టమే మరి.

అసలు విషయంలోకి వస్తే, టీడీపీ ఎమ్మెల్యే, సినీ నటుడు నందమూరి బాలకృష్ణ తన సొంత నియోజకవర్గం హిందూపురంలో పర్యటించారు మునిసిపల్ ఎన్నికల నేపథ్యంలో. ఈ క్రమంలో కుర్రాళ్ళ రాత్రి సంచారం గురించి సీరియస్‌గా మాట్లాడేశారు బాలయ్య. కానీ, టీడీపీ నేతలు దాన్ని కామెడీగా తీసుకున్నారు. ‘ఏయ్ కామెడీ కాదు.. మేటర్ సీరియస్సు..’ అంటూ బాలయ్య కన్నెర్రజేశారు.. అంతే టీడీపీ నేతలు, కార్యకర్తలు సైలెంటయిపోయారు. తప్పదు మరి, బాలయ్యకు కోపమొస్తే చెంప పగిలిపోద్ది.!

ఇక, బాలయ్య వైసీపీని విమర్శించే క్రమంలో ఏవేవో మాట్లాడేశారు. తన పాండిత్యాన్ని చాటుకునేందుకు బాలయ్య పడే పాట్లు ఎలా వుంటాయో అందరికీ తెలిసిందే కదా. ‘ఫ్రెంచ్ రివల్యూషన్’ అనీ ఇంకోటేదో అనీ.. ప్రస్తావిస్తూ, విప్లవం వస్తుంది జాగ్రత్త.. రెచ్చగొట్టొద్దు.. అని వైసీపీ మీద విరుచుకుపడ్డారు ఎమ్మెల్యే బాలకృష్ణ.

వైసీపీని బాలయ్య బెదిరించడం ఇదే కొత్త కాదు. గతంలోనూ బెదిరించారు, హెచ్చరించారు.. అల్టిమేటం జారీ చేశారు. కానీ, వైసీపీ ఏనాడూ బాలయ్యను సీరియస్‌గా తీసుకోలేదు. ‘ఏదో కామెడీ చేస్తున్నారు.. లైట్ తీసుకోండి..’ అన్నట్టుగా వైసీపీ నేతలు, బాలయ్య విషయంలో గమ్మునుండిపోతున్నారు.

అవును మరి, బాలయ్య సీరియస్ స్టేట్‌మెంట్లు ఇచ్చేస్తారు.. ఆ తర్వాత సైలెంటయిపోతారు. ఏనాడూ అసెంబ్లీ సాక్షిగా అధికార పక్షాన్ని.. ప్రతిపక్ష పార్టీకి చెందిన ఎమ్మెల్యేగా బాలయ్య నిలదీసింది లేదు. పైగా, అసెంబ్లీలో ఆయా అంశాలపై అధికార – ప్రతిపక్షానికి మధ్య సీరియస్ ఫైట్ జరుగుతున్నప్పుడు, ప్రతిపక్ష ఎమ్మెల్యే అయి వుండీ.. అధికార పార్టీ ఎమ్మెల్యేలతో నవ్వుతూ ఖుషీ చేస్తుంటారు బాలయ్య. అందుకే, వైసీపీ.. ఆయన్ని లైట్ తీసుకుంటుంది.