ఆంధ్రాలో అందరూ పేదోళ్లే(నా)..!

రాష్ట్ర విభజన తర్వాత ఆంధ్రప్రదేశ్ కు అంతగా ఆదాయం లేదన్నది నిజమే. అంతమాత్రాన ఆ రాష్ట్రంలో ఉన్నవారంతా పేదలేనా? జనాభా మొత్తం దారిద్ర్యరేఖకు దిగువనే ఉన్నారా? రాష్ట్రంలోని రేషన్ కార్డుల సంఖ్య చూస్తే ఇదే అనిపిస్తుంది.

ఏపీలో ఎన్ని కుటుంబాలు ఉన్నాయో.. దాదాపు తెల్లరేషన్ కార్డులు కూడా అన్నే ఉన్నాయి. ప్రజాసాధికార సర్వే ప్రకారం ఆంధ్రప్రదేశ్ లో 1.52 కోట్ల కుటుంబాలు ఉన్నాయి. అదే సమయంలో ఉన్న రేషన్ కార్డుల సంఖ్య 1,50,81,101. అంటే దాదాపు ఓ లక్షన్నర కుటుంబాలు మినహా అందరికీ రేషన్ కార్డులున్నాయన్న మాట. ఇదెలా సాధ్యం? అంటే, వీరిలో చాలామంది అక్రమ మార్గంలో కార్డులు పొందినవారేనని తెలుస్తోంది. అందరూ పేదలు కాదు.. కానీ కార్డులుంటాయి అంతే.

ఏ ప్రభుత్వం వచ్చినా రేషన్ కార్డుల విషయంలో చూసీచూడనట్టు వ్యవహరిస్తుంటుంది. వాటిపై దృష్టి పెట్టి అనర్హులను ఏరిపారేయడానికి ప్రయత్నిస్తే క్షేత్రస్థాయిలో వ్యతిరేకత వస్తుంది. ఫలితం ఎన్నికల్లో కనిపిస్తుంది. అందుకే వాటి జోలికి వెళ్లరు. గత తెలుగుదేశం ప్రభుత్వ హయాంలో దాదాపు 1.47 కోట్ల రేషన్ కార్డులు ఉండగా.. వైఎస్సార్ సీపీ అధికారంలోకి వచ్చిన తర్వాత కొత్త కార్డులు భారీగా మంజూరు చేసింది. దీంతో అవి కోటిన్నర దాటేశాయ్.

వైసీపీ సర్కారు దాదాపు 17 లక్షల కార్డులు అనర్హులు పొందారని గుర్తించింది. వాటిని తొలగించడానికి చర్యలు తీసుకోవడంతో తీవ్ర వ్యతిరేకత రావడంతో వెనక్క తగ్గక తప్పలేదు. ప్రభుత్వ సంక్షేమ పథకాలు రేషన్ కార్డుతోనే ముడిపడి ఉంటాయి కాబట్టి.. ఏదో ఓ మార్గంలో దానిని సంపాదించుకోవడానికే చాలామంది ప్రయత్నిస్తారు. పైగా ప్రస్తుతం గ్రామస్థాయిలోనే కార్డు మంజూరు ప్రక్రియ జరుగుతుండటంతో అలాంటివారి పని మరీ సులభమైంది. స్థానికంగా కాస్త మేనేజ్ చేసుకోగలిగితే కార్డు వచ్చేస్తుంది.

గతంలో కూడా చాలామంది అనర్హులు ఇలాగే కార్డులు పొందారు. వాటిని ప్రక్షాళన చేయడం మాత్రం అధికార యంత్రాంగానికి కుదరడంలేదు. ఈ నేపథ్యంలోనే రాష్ట్రంలో కుటుంబాల సంఖ్యకు సమానంగా రేషన్ కార్డులు కూడా ఉన్నాయి. ఇక కుటుంబంలో అబ్బాయిలకు పెళ్లి కాగానే వేరే కుటుంబంగా ఏర్పడి రేషన్ కార్డుకు దరఖాస్తు చేసుకోవడం కూడా వీటి సంఖ్య పెరగడానికి మరో కారణం. ఇప్పటికైనా అర్హులకు మాత్రమే కార్డులిచ్చి, అనర్హులకు తొలగించే ప్రక్రియ చేపడతారా అన్నది చూడాలి.