బిగ్ బ్రేకింగ్: కరోనా వ్యాక్సిన్ విడుదల చేసిన రష్యా

ప్రపంచాన్ని అతలాకుతలం చేస్తున్న కరోనా మహమ్మారికి చెక్ చెప్పేందుకు తొలి వ్యాక్సిన్ వచ్చేసింది. ఆగస్టులో వ్యాక్సిన్ విడుదల చేస్తామని చెప్పిన రష్యా.. అది చేసి చూపించింది. వాస్తవానికి బుధవారం దీనిని విడుదల చేస్తామని రష్యా ఆరోగ్యశాఖ సోమవారం ధ్రువీకరించినా.. ఒకరోజు ముందే వ్యాక్సిన్ ను విడుదల చేసినట్టు రష్యా అధ్యక్షుడు వాద్లిమిర్ పుతిన్ మంగళవారం అధికారికంగా ప్రకటించారు. ప్రపంచంలో తొలి కరోనా వ్యాక్సిన్ తమదేనని పేర్కొన్నారు.

గమ్ కోవిడ్ వ్యాక్ లయో పేరుతో గమలేయా రీసెర్చ్ ఇన్ స్టిట్యూట్ తో కలసి రష్యా రక్షణ శాఖ ఈ వ్యాక్సిన్ ను అభివృద్ధి చేసింది. తొలుత వైద్యులు, ఉపాధ్యాయులకు ఈ టీకా అందించనున్నారు. అనంతరం దేశవ్యాప్తంగా పౌరులందరికీ టీకా ఇవ్వనున్నారు. మూడు దశల్లో ప్రయోగాలు పూర్తయిన తర్వాత ఇది సమర్థంగా పనిచేస్తన్నట్టు నిర్ధారణకు వచ్చారు. తొలి డోస్ వేసిన తర్వాత 21 రోజులకు శరీరంలో రోగనిరోధక శక్తి బలోపేతమైందని, రెండో డోస్ తో ఇది మరింత శక్తివంతమైందని పేర్కొంటున్నారు.

రష్యా అధ్యక్షుడు పుతిన్ కుమార్తె సహా పలువురికి టీకా వేశారు. వచ్చే నెలలో వాణిజ్య ఉత్పత్తి ప్రారంభించి, నవంబర్ కల్లా దేశంలో అందరికీ టీకా వేయాలని రష్యా ప్రభుత్వం భావిస్తోంది. వాస్తవానికి కరోనా వ్యాక్సిన్ కనిపెట్టే విషయంలో పలు దేశాలు ఎప్పటినుంచో పరిశోధనలు చేస్తున్నాయి. ఈ క్రమంలో రేసులో ముందు ఉండటం కోసం రష్యా శతవిధాలా ప్రయత్నించింది. ఇందుకోసం ట్రయల్స్ కాల వ్యవధిని కూడా తగ్గించాలని పుతిన్ ఆదేశించారు. అయితే, అది మంచిది కాదని.. హడావుడిగా చేసే పరిశోధనల వల్ల ఫలితం ఉండదని అమెరికా వ్యాఖ్యానించింది.

మరోవైపు ప్రపంచ ఆరోగ్య సంస్థ (డబ్ల్యూహెచ్ఓ) సైతం రష్యా టీకాపై ఆందోళన వ్యక్తంచేసింది. టీకా తయారీలో తాము సూచించిన మార్గదర్శకాలన్నీ పాటించాలని సూచించింది. ప్రస్తుతం రష్యా తయారుచేసిన వ్యాక్సిన్ సరిగ్గా పనిచేస్తే ప్రపంచానికి ఆ దేశం పెద్ద ఆశాకిరణమే. అయితే, రేసులో ముందు ఉండటం కోసం హడావుడిగా టీకా తీసుకొచ్చామని ప్రకటిస్తే మాత్రం దానివల్ల ఎలాంటి ఉపయోగం ఉండదు. త్వరలోనే పలువురికి ఈ టీకా ఇవ్వనున్న నేపథ్యంలో దాని పనితీరు ఎలా ఉందనే విషయం తెలుస్తుంది.