వరవరరావు ఆరోగ్య పరిస్థితిపై దాపరికమెందుకు?

విప్లవ కవి వరవరరావు ఆరోగ్య పరిస్థితిపై అటు మహారాష్ట్ర ప్రభుత్వంతోపాటు ఇటు జాతీయ దర్యాప్తు సంస్థ అధికారులు నిర్లక్ష్యం ప్రదర్శిస్తున్నారు. వాస్తవంగా ఆయన పరిస్థితి ఎలా ఉందనే విషయాన్ని వరవరరావు కుటుంబ సభ్యులకు కూడా తెలియజేయకపోవడంపై విమర్శలు వ్యక్తమవుతున్నాయి. వరవరరావు ఆరోగ్యం ఎలా ఉందో దాపరికం లేకుండా వాస్తవ పరిస్థితి తెలియజేయాలని ఆయన భార్య హేమలత, కుమార్తెలు మహా సర్కారుకు లేఖ కూడా రాశారు. ఆయన ఆరోగ్య పరిస్థితి గురించి కుటుంబ సభ్యులమైన తమకు కూడా చెప్పకపోవడం రాజ్యాంగ విరుద్ధమే కాకుండా అక్రమం, అమానవీయమని విమర్శించారు.

ఆయనకు కరోనా పాజిటివ్ గా తేలిందని మాత్రమే అధికారికంగా వెల్లడించారని.. ఇతరత్రా అన్ని విషయాలు తమ మరో మార్గం ద్వారా తెలుసుకోవాల్సి వచ్చిందని పేర్కొన్నారు. ఆయన పరిస్థితి ప్రస్తుతం ఎలా ఉందో వెంటనే తెలియజేయాలని కోరారు. మరోవైపు ఇదే విషయంపై బాంబే హైకోర్టును కూడా ఆశ్రయించారు. తమకు తెలిసిన సమాచారం మేరకు వరవరరావు పరిస్థితి అత్యంత విషమంగా ఉందని.. జేజే ఆస్పత్రిలో ఆయన తలకు గాయం కావడంతో అక్కడ నుంచి నానావతి ఆస్పత్రికి తరలించారని వరవరరావు తరఫు లాయర్ కోర్టుకు నివేదించారు. ఆయన ఎలా ఉన్నారనే విషయాన్ని కుటుంబ సభ్యులకు కూడా తెలియజేయడంలేదని తెలిపారు. వరవరరావు చూసేందుకు కుటుంబ సభ్యులను అనుమతించేలా ఆదేశించాలని కోరారు.

దీంతో బాంబే హైకోర్టు జాతీయ దర్యాప్తు సంస్థతోపాటు మహారాష్ట్ర సర్కారుకు నోటీసులు జారీచేసింది. వరవరరావు వాస్తవ ఆరోగ్య పరిస్థితి ఎలా ఉందనే విషయంపై బుధవారంలోగా తమకు నివేదిక ఇవ్వాలని ఆదేశించింది. అలాగే కరోనా నేపథ్యంలో నిర్దేశిత దూరం నుంచి వరవరరావును చూసేందుకు ఆయన కుటుంబ సభ్యులకు అనుమతి ఇవ్వగలరో లేదో కూడా చెప్పాలని సూచించింది.

ఎల్గర్ పరిషత్ కేసులో 2018 జూన్ 6న అరెస్టైన వరవరరావు.. అప్పటి నుంచి మహారాష్ట్ర జైలులో జ్యుడీషియల్ రిమాండ్ లో ఉన్నారు. తాజాగా ఆయన ఆరోగ్యం క్షీణించడంతో తొలుత జేజే ఆస్పత్రికి తరలించారు. అనంతరం అక్కడ నుంచి నానావతి ఆస్పత్రికి తీసుకెళ్లారు. ఈ క్రమంలో ఆయనకు కరోనా పాజిటివ్ అని నిర్దారణ కావడంతో కుటుంబ సభ్యులు ఆందోళన చెందుతున్నారు. ఆయన ఆరోగ్యం బాగాలేనందున తాత్కాలిక బెయిల్ మంజూరు చేయాలని కోర్టును ఆశ్రయించారు.