కరోనా స్లీపర్‌ సెల్స్‌: ఏపీలో దిగజారిన రాజకీయం!

ఆంధ్రప్రదేశ్‌లో రాజకీయం ‘పాతాళం లోతుల్ని’ వెతుకుతోంది. అవును, ఆ స్థాయికి రాజకీయాల్లో విలువల్ని రాజకీయ పార్టీలు దిగజార్చేశాయి. లాక్‌డౌన్‌ వేళ సోషల్‌ డిస్టెన్స్‌ పాటించాల్సిన అధికార పార్టీ నేతలు, పబ్లిసిటీ స్టంట్లు చేస్తుండడంతో కరోనా వ్యాప్తికి అవకాశం పెరుగుతోందన్న చర్చ సర్వత్రా జరుగుతోంది.

ఈ నేపథ్యంలో అధికార పార్టీ ఒకింత బాద్యతాయుతంగా వ్యవహరించాలి. ఆ మాటకొస్తే, లాక్‌డౌన్‌ నిబంధనల్ని అధికార పార్టీ నేతలు, కార్యకర్తలు పాటించాలి.. ఇతర రాజకీయ పార్టీలకు ఆదర్శంగా వుండాలి. దురదృష్టవశాత్తూ అధికార పార్టీ, తమకు లాక్‌డౌన్‌ నిబంధనలు పట్టవన్నట్లు వ్యవహరిస్తోంది.

ఇక, అధికార పార్టీ అత్యుత్సాహం కారణంగా ఆయా జిల్లాల్లో కరోనా వ్యాప్తి పెరిగిందనడానికి అక్కడ నమోదవుతున్న కేసులే నిదర్శనం. ఈ నేపథ్యంలో, అధికార పార్టీ తెలివిగా విపక్షాలపై కొత్త, చెత్త విమర్శలకు తెరలేపింది. రాష్ట్రంలో కరోనా వ్యాప్తి చెందేలా తెలుగుదేశం పార్టీ ‘స్లీపర్‌ సెల్స్‌’ పనిచేస్తున్నాయంటూ సాక్షాత్తూ మంత్రి మోపిదేవి వెంకటరమణ వ్యాఖ్యానించడం గమనార్హం.

మంత్రి చేసిన వ్యాఖ్యలు ఉత్త రాజకీయ విమర్శలని ఎలా కొట్టిపారేయగలం. ప్రభుత్వం చేతిలోనే అధికారం వుంది.. మంత్రిగారు చేస్తున్న ఆరోపణల్లో నిజముంటే, ఆ స్లీపర్‌ సెల్స్‌పై కరిన చర్యలు తీసుకోవాలి. లేదంటే, మంత్రిపై కరిన చర్యలు తీసుకోవాల్సి వుంటుంది.

అయినా, ఇదేమన్నా తీవ్రవాదమా.? స్లీపర్‌ సెల్స్‌.. అనేంతటి తీవ్రమైన పదజాలం ఉపయోగించడానికి.? రాష్ట్రంలో కరోనా కంటే భయంకరంగా రాజకీయాలు తయారయ్యాయనడానికి ఇంతకన్నా నిదర్శనం ఇంకేం కావాలి.? ప్రభుత్వం తన వైఫల్యాల్ని కప్పిపుచ్చుకునేందుకు.. ఇతరులపై తేలిగ్గా నిందారోపణలకు దిగుతుండడం నిజంగా సిగ్గుచేటైన వ్యవహారం.

పారాసిటమాల్‌.. బ్లీచింగ్‌ పౌడర్‌.. అంటూ మొదట్లో కరోనా వైరస్‌ని ప్రభుత్వం నిర్లక్ష్యం చేయడంతోనే ఇప్పుడు రాష్ట్రానికి ఈ దుస్థితి దాపురించింది