కేసీఆర్ కీ సీఏఏ అర్థం కాలేదా?

పౌరసత్వ సవరణ చట్టం (సీఏఏ) గురించి టీఆర్ఎస్ అధినేత కేసీఆర్ కి కూడా సరిగా అర్థం కాలేదా లేక ఉద్దేశపూర్వకంగానే అలా మట్లాడారా అనేది ప్రస్తుతం చర్చనీయాంశంగా మారింది. సీఏఏ, ఎన్సీఆర్, ఎన్పీఆర్ లను నిరసిస్తూ దేశవ్యాప్తంగా నిరసనలు జరుగుతున్న సంగతి తెలిసిందే. బెంగాల్, కేరళ వంటి రాష్ట్రాలు తాము సీఏఏ అమలు చేయబోమని ఇప్పటికే స్పష్టం చేశాయి. గత కొంతకాలంగా ఈ విషయంలో నిరసనలు జరుగుతున్నా.. మౌనంగా ఉన్న కేసీఆర్ తాజాగా దీనిపై స్పందించారు.

మున్సిపల్ ఫలితాల అనంతరం ఏర్పాటు చేసిన విలేకరుల సమావేశంలో వీటిపై తమ విధానమేంటో స్పష్టంచేశారు. సీఏఏ నూటికి నూరు శాతం తప్పుడు నిర్ణయమని, సుప్రీంకోర్టు దానిని సుమోటోగా స్వీకరించి కొట్టివేయాలని పేర్కొన్నారు. ముస్లింలకు నష్టం చేసే అలాంటి నిర్ణయాన్ని తాము సమర్థించబోమని స్పష్టంచేశారు. వాస్తవానికి సీఏఏ వల్ల భారతదేశంలోని ఏ ముస్లింకూ నష్టం జరగదు అని బీజేపీ చెబుతున్నా, అది జనంలోకి బాగా వెళ్లలేదు.

ఆ చట్టం ఉద్దేశం పొరుగు దేశాల్లో ఉన్న మైనారిటీలకు మన దేశ పౌరసత్వం కల్పించడం. పాకిస్థాన్, బంగ్లాదేశ్ వంటి మన పొరుగు దేశాల్లో ముస్లింలు మైనారిటీలు కాదు. అందువల్లే వారికి మన పౌరసత్వం ఇవ్వాల్సిన అవసరం లేదు. ఇదే విషయాన్ని బీజేపీ స్పష్టంచేస్తూ సీఏఏ తీసుకొచ్చింది. దీనివల్ల మన దేశంలోని ముస్లింలకు ఎలాంటి నష్టం జరగదు. అసలు వారికి సంబంధించింది కూడా కాదు. కానీ కేసీఆర్ మాత్రం ఇది ముస్లింలందరికీ నష్టం చేకూర్చే చట్టం అంటూ బీజేపీ పై విమర్శలు చేయడం గమనార్హం.

పైగా ఇన్నాళ్లూ ఈ అంశంపై మౌనంగా ఉండి ఇప్పుడు స్పందించడం కూడా వ్యూహమే అంటున్నారు. మున్సిపల్ ఎన్నికల ముందు ఈ విషయాన్ని ప్రస్తావించి తమ వైఖరి చెబితే.. అది బీజేపీకి లాభించే అవకాశం ఉందని భావించడం వల్లే ఇప్పటివరకు దీనిపై కేసీఆర్ మౌనాన్ని ఆశ్రయించారని చెబుతున్నారు. మున్సిపల్ ఎన్నికలు ముగిసి టీఆర్ఎస్ విజయఢంకా మోగించడంతో సీఏఏపై కేసీఆర్ స్పందించారని అంటున్నారు.

ఇక పొరుగుదేశాల ముస్లింలపై ప్రేమ కనబరుస్తున్న కేసీఆర్.. ఛత్తీస్ గడ్ నుంచి బతుకుజీవుడా అంటూ రాష్ట్రానికి వచ్చిన గుత్తికాయల విషయంలో అనుసరించిన వైఖరి ఏమిటని ప్రశ్నిస్తున్నారు. అప్పుడు తాను తీసుకున్న నిర్ణయం సరైనదే అయితే, సీఏఏ విషయంలో కేంద్రానిది కూడా సరైన నిర్ణయమేనని పలువురు పేర్కొంటున్నారు. మరి వీటికి కేసీఆర్ ఏమని సమాధానం చెబుతారో చూడాలి.