ఒకే ఒక్క పదం మండలిని రద్దు చేయించింది తెలుసా?

ప్రస్తుతం తెలుగు రాష్ట్రాల్లో ఎక్కడ చూసినా ఏపీ శాసనమండలిపైనే చర్చ జరుగుతోంది. ఏపీలోని అధికార పార్టీ పట్టుదల కారణంగా మండలి రద్దు దిశగా మంత్రాంగం నడుస్తోంది. ఈ సందర్భంగా గతంలో మండలి రద్దు అయిన సందర్భాలు ప్రస్తావనకు వస్తున్నాయి. ఎన్టీఆర్ ముఖ్యమంత్రిగా ఉన్న సమయంలో ఒకసారి ఏపీ శాసనమండలి రద్దు అయింది. అనంతరం వైఎస్ సీఎంగా ఉన్నప్పుడు దానిని పునరుద్ధరించారు.

అయితే, ఎన్టీఆర్ హయాంలో మండలి రద్దు కావడానికి కారణం ఒకే ఒక్క పదం అని తెలిస్తే ఆశ్చర్యం కలగక మానదు. అప్పట్లో టీడీపీకి మండలిలో బలం లేకపోవడం, కాంగ్రెస్ కు ఎక్కువ మంది సభ్యులు ఉన్నారనే కారణంతోనే మండలి రద్దుకు ఎన్టీఆర్ తీర్మానం చేసి పంపించారని చెబుతారు. ఇది ఒక కారణమైనప్పటికీ, ఇదే ప్రధాన కారణం కాదు.

ఎన్టీఆర్ నిర్ణయాలపై మండలిలో తీవ్ర విమర్శలు వ్యక్తమయ్యేవి. ఆయన విధానాలపై కాంగ్రెస్ నేతలు విరుచుకుపడుతుండేవారు. ఇది ఇలా కొనసాగుతున్న సమయంలో ఓ రోజు ‘పెద్దల గలాభా’ అని ఈనాడు పత్రికలో వార్త వచ్చింది. దీనిని మండలి తీవ్రంగా పరిగణించింది. అసలే కాంగ్రెస్ వ్యతిరేక పత్రిక కావడంతో దానిపై చర్య తీసుకోవాలని భావించి.. వెంటనే ఈనాడు పత్రిక ఎడిటర్ ను అరెస్టు చేసి తమ ముందు హాజరుపరచాలని ఆదేశించింది. ఈ కేసు సుప్రీంకోర్టుకు, రాష్ట్రపతి వరకు కూడా వెళ్లింది.

ఈ నేపథ్యంలో ఎడిటర్ ను అరెస్టు చేయొద్దంటూ సుప్రీంకోర్టు స్టే ఇచ్చింది. ఈ తతంగం అంతా సాగుతున్న సమయంలోనే మండలి రద్దుకు బీజం పడింది. తమకు తలనొప్పిగా మారిన మండలిని రద్దు చేయడమే మంచిదని భావించిన ఎన్టీఆర్.. ఆ మేరకు అసెంబ్లీలో తీర్మానం చేసి కేంద్రానికి పంపించారు. కానీ ఈ కేసు వివరాలు తెలుసుకున్న అప్పటి ప్రధాని ఇందిరాగాంధీ అందుకు అంగీకరించలేదు.

అనంతరం రాజీవ్ గాంధీ ప్రధాని అయిన తర్వాత ఆయనతో సంత్సంబంధాలు కలిగిన ఎన్టీఆర్ మండలిని రద్దు చేయించుకున్నారు. ఈ విషయాన్ని బుధవారం మాజీ మంత్రి యనమల కూడా ప్రస్తావించారు. 1984లో ఒక వార్త విషయంలో యాజమాన్యాన్ని మండలి ముందుకు పిలిపించడంపై రేగిన వివాదం మండలి రద్దుకు దారి తీసిందని ఆయన పేర్కొన్నారు.

కేవలం ఒక పదం విషయంలో నాడు మండలి తీవ్ర నిర్ణయం తీసుకుందని, ఇప్పుడు జగన్ మీడియా రోజూ ఘోరమైన కథనాలు ప్రచురిస్తోందని విమర్శించే క్రమంలో యనమల ఈ విషయాన్ని వెల్లడించారు. దీనికి సంబంధించిన వివరాలను శ్రీ పొట్టిశ్రీరాములు తెలుగు విశ్వవిద్యాలయం అందించే ఎంసీజే కోర్సులోని పాఠ్యపుస్తకంలో కూడా పొందపరిచారు.