జగన్ చేతికానివాడైతే మీరేంటి బాబూ?

ఏపీ సీఎం వైఎస్ జగన్ మోహన్ రెడ్డిపై టీడీపీ అధినేత చంద్రబాబు తీవ్ర వ్యాఖ్యలు చేశారు. ఏపీకి అసలైన ద్రోహి జగనే అంటూ మండిపడ్డారు. జగన్ చేతికానివాడు అని, దద్దమ్మ అని, దిగిపో అంటూ విరుచుకుపడ్డారు. రాజధాని ప్రాంత రైతుల దీక్షకు సంఘీభావంగా ఆయా గ్రామాల్ల పర్యటిస్తున్న చంద్రబాబు.. బుధవారం కృష్ణాయపాలెంలో మాట్లాడుతూ ఈ మేరకు సంచలన ఆరోపణలు చేశారు. తాను కట్టిన భవనాల్లో కూర్చుని జగన్ పెత్తనం చెలాయిస్తున్నారంటూ దుయ్యబట్టారు. రాజధానిని మార్చే అధికారం ఆయనకు ఎవరిచ్చారని కూడా ప్రశ్నించారు.

ఎన్నికల్లో ఓడిపోయామనే బాధకంటే రాజధాని అమరావతి నుంచి తరలిపోతుందనే బాధే బాబులో ఎక్కువగా కనిపిస్తోంది. ప్రస్టేషన్లో ఏం మాట్లాడుతున్నారో ఆయనకే అర్థం కావడంలేదని విమర్శలు వినిపిస్తున్నాయి. జగన్ ఓ ప్రభుత్వాధినేత అని, ప్రజలే ఆయన్ను ఎన్నుకున్నారనే సంగతి బాబు మరచిపోయినట్టున్నారని ఎద్దేవా చేస్తున్నారు.

రాష్ట్ర విభజన తర్వాత ఏ అధికారంతో రాజధానిగా అమరావతిని ఎంపిక చేసిందో, అదే విధంగా ఇప్పుడు రాజధానిని మార్చే అధికారం వైసీపీ ప్రభుత్వానికి ఉందని పేర్కొంటున్నారు. ఇక తాను కట్టించిన భవనాల్లో కూర్చుని పెత్తనం చెలాయిస్తున్నారంటూ బాబు మాట్లాడంపై వైసీపీ శ్రేణులు మండిపడుతున్నాయి. ఆయన జేబులో నుంచి సొమ్ము తీసి వాటిని కట్టారా అని ప్రశ్నిస్తున్నాయి.

రాజధాని నిర్మిస్తారనే విశ్వాసంతో గత ఎన్నికల్లో మిమ్మల్ని ఎన్నుకున్నారని, కానీ మీరు ఇచ్చిన హామీలను నెరవేర్చకపోవడం వల్లే ప్రజలు మొన్నటి ఎన్నికల్లో ఓడించారని సంగతి గుర్తుంచుకోవాలని వైసీపీ నేతలు దుయ్యబడుతున్నారు. అధికారంలోకి వచ్చిన ఆరు నెలల్లోనే జగన్ ఎన్నో హామీలను అమలు చేశారని, ఐదేళ్లు ముఖ్యమంత్రిగా ఉన్న మీరు ఏం చేశారని ప్రశ్నిస్తున్నారు. ఆరు నెలల్లోనే ఎన్నో పనులు చేసిన జగనే చేతికానివాడైతే, ఐదేళ్లూ గ్రాఫిక్స్ తో కాలం గడిపేసిన మీరేంటని మండిపడుతున్నారు.