చివరకు ఆర్టీసీ కార్మికుల పరిస్థితి ఇలా మారింది..!!

52 రోజులపాటు ఆర్టీసీ కార్మికులు తమ విలువైన డిమాండ్ల కోసం సమ్మె చేశారు. ఆంధ్రప్రదేశ్ లో ఆర్టీసీని విలీనం చేసారు కాబట్టి ఇక్కడ కూడా విలీనం చేయాలని కోరుతూ సమ్మెకు దిగారు. అయితే, సమ్మెకు దిగిన వేళా విశేషం బాగాలేదు. అందుకే సమ్మె చేసి ఇప్పుడు ఉద్యోగాలు పోగొట్టుకోవాల్సిన పరిస్థితి దాపురించింది. ఇకపై ఉద్యోగాలు ఉండవని తెలియడంతో చాలామంది కార్మికులు ఏం చేయాలో దిక్కు తోచక కూలి పనులు చేయడం మొదలుపెట్టారు.

మరికొందరు వారి వృత్తి పనులను నమ్ముకుంటున్నారు. ఇదిలా ఉంటె, కొందరు ఉద్యోగాలు లేవని చెప్పి బాధపడి.. మంచానపడి మరణించగా మరికొందరు భయంతో ఆత్మహత్యలు చేసుకున్నారు. ఇవన్నీ ఒకెత్తయితే.. ఇప్పుడు ప్రభుత్వం ఏకంగా ఆర్టీసీని పూర్తిగా క్లోజ్ చేయాలనీ చూస్తోంది. 5100 రూట్లలో ప్రైవేట్ బస్సులకు అనుమతి ఇచ్చి.. మిగతా ప్రాంతాల్లో ఆర్టీసీ బస్సులు నడపాలని చూస్తున్నది. దీంతో పాపం ఆర్టీసీ కార్మికుల పరిస్థితి రోడ్డుపైకి వచ్చింది.

ఇప్పుడు వాళ్లకు ఎం చేయాలో దిక్కు తోచడం లేదు. చాలామంది కార్మికులు ఇప్పటికే రోడ్డున పడ్డారు. తిండికి లేక ఇబ్బందులు పడుతున్నారు. సాయం చేసేవారి కోసం ఎదురుచూస్తున్నారు. కనీస అవసరాల కోసం డబ్బులు లేకపోవడంతో కొంతమంది పస్తులు ఉండాల్సిన పరిస్థితి వచ్చింది. అయితే, కొంతమంది విద్యార్థులు, స్కూల్ పిల్లలు విరాళాలు అందిస్తూ కొంతమందికి సహాయం చేస్తున్నారు. సమ్మె చేస్తే డిమాండ్లు నెరవేరుతాయని అనుకున్నారుగాని, ఇలా ఉద్యోగాలు పోగొట్టుకొని రోడ్డున పడతారని ఎవరూ ఊహించలేదు.