Chiranjeevi: మెగాస్టార్ (Mega Star) చిరంజీవి (Chiranjeevi).. ఈ పేరు తెలుగు సినిమాపై చెరగని సంతకం. సినిమాల్లో తన సమ్మోహన నటనతో అలరిస్తున్న ఆయనే.. నిజజీవితంలో సేవా కార్యక్రమాలతో ప్రజలకు సేవలూ అందిస్తున్నారు. దశాబ్దాలుగా ఇందుకు ఉదాహరణలు ఎన్నెన్నో. ఇప్పుడు మరోసారి తన ఉన్నత మనసును చాటుకున్నారు. ప్రస్తుత వేసవి కాలంలో ఎండలు, ఉక్కపోతల అధికంగా ఉంటున్నాయి. ఈ సమయంలో ప్రజలకు చలవ అందించాలని చేసిన ప్రయత్నం సర్వత్రా ప్రశంసలు అందుకుంటోంది.
చిరంజీవి ఇంట్లోనే తయారు చేయించిన ‘రాగి జావ’ను ప్రజలకు అందించి ఎండల నుంచి ఉపశమనం కల్పిస్తున్నారు. హైదరాబాద్ లోని చిరంజీవి చారిటబుల్ ట్రస్టు సమీపంలో ఏర్పాటు చేసిన పందిరిలో ప్రతి రోజూ ‘రాగి జావ’ అందిస్తున్నారు. వేసవి కాలం పూర్తయ్యే వరకూ ప్రతిరోజూ నిర్విరామంగా అటుగా వందల సంఖ్యలో వచ్చే ప్రజలకు అందించే ఏర్పాట్లు చేసి ప్రారంభించారు. ఎండల్లో వస్తున్నవారు ‘రాగి జావ’ తాగి ఉపశమనం పొందుతున్నారు. చిరంజీవి చేపట్టిన ఉదాత్తమైన సేవను కొనియాడుతున్నారు. చిరంజీవి ట్రస్టు నిర్వాహకులు ప్రతిరోజూ ‘జావ’ అందిస్తున్నారు.