దిల్ రాజు.! అందగాడు, ఆటగాడే కాదు, వేటగాడు కూడా.!

అరరె.! ప్రముఖ నిర్మాత దిల్ రాజు తనకు గ్లామరెక్కువైపోయిందని అంటున్నాడే.! అయ్యోపాపం, అలాగైతే సినిమా హీరోగా ట్రై చేసెయ్యొచ్చు కదా.?

ఎప్పటినుంచో దిల్ రాజుని చాలామంది మీడియా ప్రతినిథులు ‘హీరోగా ట్రై చేయొచ్చు కదా’ అని అడుగుతుంటారు. బహుశా ఆ కోరిక ఆయనలోనూ బలంగా వుండబట్టే, ‘గ్లామరెక్కువైపోయింది’ అని స్వకుచ మర్ధనం చేసుకుంటున్నారు దిల్ రాజు.

అసలు ఈ గ్లామర్ విషయం ఎందుకు ప్రస్తావనకు వచ్చినట్లు.? అంటే, ఈ మధ్య దిల్ రాజు పేరు మార్మోగిపోతోంది. సినీ పరిశ్రమలో నిర్మాణ వ్యయం పెరిగిపోవడంతో ఆ మధ్య కొన్నాళ్ళపాటు షూటింగులు బంద్ చేసేసుకున్నారు. అప్పట్లో అన్ని సినిమాల షూటింగులూ ఆగిపోయాయ్.. ఒక్క దిల్ రాజు సినిమాలు తప్ప.

తెలుగు సినిమాలే అన్నాడు.. తమిళ సినిమాలని బుకాయించాడు..

స్ట్రెయిట్ తెలుగు సినిమాయేనంటూ ‘వారిసు’ గురించి చెప్పుకొచ్చాడు దిల్ రాజు అంతకు ముంది. కానీ, టాలీవుడ్‌లో సినిమాల షూటింగ్ బంద్ సమయంలో ‘వారిసు’ షూటింగ్ జరిగితే, ‘అది తమిళ సినిమా’ అని చెప్పాడు. ఆ తర్వాత దాన్ని ద్విభాషా చిత్రమన్నాడు.

దిల్ రాజు మాటలు ఇలాగే వుంటాయి. గతంలో, సంక్రాంతి పండగకి డబ్బింగ్ సినిమాలెలా తెస్తారు.? అంటూ ప్రశ్నించాడు దిల్ రాజు. అది గతం. ఇప్పుడేమో, డబ్బింగ్ సినిమా ‘వారిసు’ని, ఈ సంక్రాంతికి తెలుగు ప్రేక్షకుల నెత్తిన దిల్ రాజు బలవంతంగా రుద్దున్నాడు.

తెలుగు సినీ పరిశ్రమలో ఆటగాడూ అతనే.. వేటగాడూ అతనే అన్నట్లు తయారైంది పరిస్థితి. చిరంజీవి, బాలకృష్ణకే దిల్ రాజు కారణంగా ఇప్పుడు సంక్రాంతికి సరైన థియేటర్లు దొరకని పరిస్థితి. ముఖ్యమైన థియేటర్లు మీకే వస్తాయ్ కదా.? అని ప్రశ్నిస్తే, ‘అది గుడ్ విల్..’ అంటూ తనదైన అహంకారం ప్రదర్శించాడు.

మీడియాకి ప్రకటనివ్వడం దండగ..

ప్రీ రిలీజ్ ఈవెంట్స్ చేయడం.. పత్రికల్లో ఫుల్ పేజీ ప్రకటనలు ఇవ్వడం.. ఇదంతా దండగ.. అని కొత్త పంచాయితీ తెరపైకి తెచ్చాడు దిల్ రాజు. మీడియా ఏమీ సినిమా ప్రకటనల మీద ఆధారపడదు. కాకపోతే, అవి మీడియాకి కొంతమేర ఉపయోగపడతాయి.

మీడియాలో సినిమాని ఎలా పబ్లిసిటీ చేసుకోవాలి.? సినిమాలకి హైప్ ఎలా తీసుకురావాలి.? అన్న కోణంలో నానా రకాల స్టంట్లూ చేసి, మీడియాతో పొగిడించుకున్న దిల్ రాజు, ఇప్పుడిలా ప్లేటు ఫిరాయించేశాడు.

తమిళనాడులో విజయ్ సినిమా ‘వారిసు’కి అవసరమైన థియేటర్ల కోసం అడుక్కోవాల్సి వస్తోందంటూ దిల్ రాజు చెబుతుండడం మరో ఆసక్తికరమైన అంశం. అంటే, తెలుగునాట నిర్మాతలు, దిల్ రాజుని తమ సినిమాల విడుదల కోసం థియేటర్ల విషయమై అడుక్కోవాలన్నమాట.

‘ఇది వ్యాపారం..’ అంటూ దిల్ రాజు మొహమాటం లేకుండా చెబుతున్నాడు. ‘దిల్’ రాజు కంటే గొప్ప నిర్మాతలు చాలామంది వున్నారు సినీ పరిశ్రమలో. కానీ, దిల్ రాజు.. తెలుగు సినిమా తీరు తెన్నుల్ని అడ్డగోలుగా మార్చేశాడు. అదే అసలు సమస్య. ఆ చాణక్యం ఎవరికీ చేతకాలేదు ఇన్నాళ్ళూ.!

థియేటర్లు, డిస్ట్రిబ్యూషన్.. ఇలా అన్నీ తన చేతిలో వున్నాయన్న అహంకారం.. దర్శకులు, నటీనటుల డేట్స్ తన వద్ద లాక్ అయిపోయాయన్న అహంకారం.. ఇవే దిల్ రాజుతో ఇలా మాట్లాడిస్తున్నాయని అనుకోవచ్చా.?

తెలుగు సినీ పరిశ్రమలో ఇద్దరు అగ్ర హీరోల్ని, తన డబ్బింగ్ సినిమాతో దిల్ రాజు సవాల్ చేస్తున్నాడు. అంటే, తెలుగు సినిమా పట్ల దిల్ రాజుకి వున్న గౌరవం ఏంటన్నది అర్థమైపోవట్లే.? ఔను, దిల్ రాజు జస్ట్ వ్యాపారస్తుడంతే.