అవతార్ 2 రివ్యూ: కనుల విందు

జేమ్స్ కామెరూన్ నుండి ఇప్పటికే మనం ఎన్నో మరపురాని చిత్రాలను చూసాం. ఆయన నుండి 13 ఏళ్ల తర్వాత వచ్చిన సీక్వెల్ అవతార్: ది వే ఆఫ్ వాటర్. ఇప్పటికీ హాలీవుడ్ లో హయ్యస్ట్ గ్రాసింగ్ చిత్రంగా అవతార్ ఉంది. ఎన్నో భారీ చిత్రాలు వచ్చినా ఆ ప్లేస్ అలాగే పదిలంగా ఉంది. మరి ఇన్నేళ్ల తర్వాత అవతార్ కు సీక్వెల్ వస్తోంది. అవతార్ కలెక్షన్స్ ను దాటే దమ్ము, అవతార్ 2 కు ఉందా?

కథ:

జేక్ సల్లీ మరియు తన పార్ట్నర్ నేయిత్రిల కథ అవతార్ నుండి కొనసాగింపుగా ఉంటుంది. పండోరా అడవుల్లో వీరిద్దరూ తమ నలుగురు పిల్లలతో కలిసి సంతోషంగా జీవిస్తూ ఉంటారు. అంతా బాగానే ఉంటుంది కానీ స్కై పీపుల్ గా పేర్కొనబడే మనుషులు మళ్ళీ తిరిగొస్తారు.

తమ వాళ్ళను కాపాడుకోవడానికి జేక్, తన కుటుంబం అజ్ఞాతంలోకి వెళ్ళిపోతుంది. వాళ్ళు ఎక్కడికి వెళ్లారు? స్కై పీపుల్ నుండి పండోరా గ్రహాన్ని కాపాడుకుంటారా?

నటీనటులు:

సామ్ వర్తింగ్టన్ ఈ చిత్రంలో జేక్ సల్లీ పాత్రలో కనిపిస్తాడు. పండోరా గ్రహ వాసులను భవిష్యత్తు దిశగా నడిపించే బాధ్యతను తీసుకుంటాడు. ఈ చిత్రంలో తన పాత్రతో ముడిపడ్డ ఎమోషన్ ను చక్కగా పలికించగలిగాడు. ఇక తండ్రి పాత్రలో చాలా బాధ్యతగా కనిపిస్తాడు.

నేయిత్రి పాత్రలో జో సల్దానా ఈ సీక్వెల్ లో తల్లి పాత్రలో కనిపిస్తోంది. మొదటి భాగం తాలూకు పాత్రే అయినా కూడా జో ఇందులో ఇంకా మెచ్యూర్డ్ గా కనిపిస్తుంది.

మొదటి భాగంలో చనిపోయాడు అనుకున్న స్టీఫెన్ లాంగ్, రెండో భాగంలో కూడా విలన్ గా తిరిగొస్తాడు. పాత్ర పరంగా మొదటి భాగానికి, దీనికి పెద్దగా మార్పులేం లేవు. డా. గ్రేస్ కు కూడా ఇందులో మంచి పాత్రే దక్కింది. సెకండ్ పార్ట్ లో ఆమె పాత్ర కచ్చితంగా ఆసక్తికరంగా అనిపిస్తుంది. అవతార్ నుండి రాబోయే సీక్వెల్స్ కు ఈమె పాత్ర కీలకం. ఇక సెకండ్ పార్ట్ లో జేక్ పిల్లలు అందరూ కూడా బాగా రాణించారు.

సాంకేతిక వర్గం:

జేమ్స్ కామెరూన్ ఈ చిత్రం కోసం నేల విడిచి సాము చేయలేదు. మొదటి భాగం తీరులోనే రెండో భాగంలో కూడా ఎమోషన్, ప్రతీ ఫ్రేమ్ ను అందంగా మలచడంపైనే ఫోకస్ పెట్టాడు. అవతార్ 2 కథ చాలా సింపుల్. మరోసారి పెను ప్రమాదాన్ని పండోరా వాసులు ఎలా ఎదుర్కొన్నారు అన్నది కథాంశం. ప్రతీ పాత్రను హ్యాండిల్ చేసిన విధానం, ఆ పాత్ర తాలూకూ ఎమోషన్ ను డీల్ చేయడం జేమ్స్ కామెరూన్ బ్రిలియన్స్ ను తెలియజేస్తుంది.

జేమ్స్ కామెరూన్ తర్వాత సీక్వెల్స్ కు ఈ చిత్రంతో రంగం సిద్ధం చేసుకున్నాడనే చెప్పాలి. అవతార్ 2 కు బ్యాక్ గ్రౌండ్ మ్యూజిక్ వన్ ఆఫ్ ది మేజర్ హైలైట్స్ అనడంలో ఎలాంటి అతిశయోక్తి లేదు. ప్రతీ పాత్రా ఫీల్ అవుతోంది, బ్యాక్ గ్రౌండ్ మ్యూజిక్ ద్వారా మనం కూడా ఫీల్ అవుతాం.

ఇక ఈ సీక్వెన్స్ లో విజువల్స్ మెయిన్ హైలైట్. ఇందులో వచ్చే వాటర్ విజువల్స్ మనల్ని అబ్బురపరుస్తాయి. సినిమాటోగ్రఫీ ఒక అద్భుతం. మనం నిజంగానే వేరే గ్రహానికి వెళ్ళామా అన్నట్లు ఉంటాయి. ప్రొడక్షన్ డిజైన్, ఎడిటింగ్ కూడా బాగానే అనిపిస్తాయి. అయితే రన్ టైమ్ విషయంలో కొంచెం శ్రద్ధ తీసుకోవాల్సింది.

ప్లస్ పాయింట్స్:

• పెర్ఫార్మన్స్
• బ్యాక్ గ్రౌండ్ మ్యూజిక్
• విజువల్స్

మైనస్ పాయింట్స్:

• రన్ టైమ్
• అక్కడక్కడా ల్యాగ్ అనిపించే సన్నివేశాలు

విశ్లేషణ:

అవతార్ మొదటి భాగం మీకు నచ్చినట్లైతే రెండో భాగం మీకు కచ్చితంగా నచ్చుతుంది. ఇది కేవలం థియేటర్లలోనే, మంచి సౌండ్ అండ్ విజువల్ క్వాలిటీ ఉన్న థియేటర్లలోనే చూడాల్సిన సినిమా. మిస్ కావొద్దు.

తెలుగుబులెటిన్ రేటింగ్: 3/5