ఆయన స్టూడియో కి రావడం అదృష్టం : విశాల్ చంద్రశేఖర్

దుల్కర్ సల్మాన్, మృణాల్ ఠాకూర్ జంటగా వైజయంతీ మూవీస్ లో రాబోతున్న చిత్రం ‘సీతారామం’. హను రాఘవపూడి దర్శకత్వంలో తెరకెక్కిన ఈ చిత్రంపై ప్రేక్షకుల్లో భారీ అంచనాలు వున్నాయి. విశాల్ చంద్రశేఖర్ సంగీతం అందించిన ఈ చిత్రంలోని పాటలు సంగీత ప్రియులని మెస్మరైజ్ చేసి చార్ట్ బస్టర్ హిట్స్ గా నిలిచాయి. ఆగస్ట్5న ఈ చిత్రం ప్రేక్షకుల ముందుకు వస్తున్న నేపధ్యంలో సంగీత దర్శకుడు విశాల్ చంద్రశేఖర్ విలేఖరుల సమావేశంలో ముచ్చటించారు.

‘సీతారామం’లో మ్యూజిక్ గురించి…

దర్శకుడు హను రాఘవపూడి చాలా గొప్ప కథ రాశారు. కథలో పాటలు వచ్చే సందర్భాలు అద్భుతంగా వుంటాయి. మ్యూజిక్ ని డిమాండ్ చేసిన కథ సీతారామం. దర్శకుడు హనుతో ఇది వరకు ‘పడిపడి లేచే మనసు’ సినిమా చేశాను. ఆయన కథ రాసుకునే విధానం అద్భుతంగా వుంటుంది.

పాటల్లో మంచి సాహిత్యం గురించి…

కళ్యాణం పాట రాసిన సిరివెన్నెల గారు సాంగ్ కంపోజ్ చేసినప్పుడు స్టూడియోకి రావడం నా అదృష్టంగా భావిస్తున్నా. నాకు చాలా విషయాలు చెప్పారు. ఒకే లిరిక్ లో డిఫరెంట్ ట్యూన్స్, డిఫరెంట్ లిరిక్స్ లో అదే ట్యూన్ ఎలా ప్రజంట్ చేయాలో చెప్పారు. కేకే గారు, అనంత్ శ్రీరామ్ లతో కూడా మంచి అనుబంధం వుంది.

ఎస్పీ చరణ్ తో పాడించారు…

ఈ విషయంలో నాకు పూర్తి స్వేఛ్చ వుంది. ది గ్రేట్ బాలు గారిలా మరొకరు పాడుతున్నారంటే పాడించికోవడం ఆనందమే కదా.

ఇంతందం పాటలో పిల్లలతో పాడించిన కోరస్ గురించి…

పిల్లలతో కోరస్ పాడించాలానే ఆలోచన దర్శకుడు హను గారిది. ఈ పాట విన్నపుడు.. ఇక్కడ పిల్లలతో కోరస్ పాడిస్తే ఎలా వుంటుందని అన్నారు.

సీతారామంలో నేపధ్య సంగీతం..

అద్భుతమైన నేపధ్య సంగీతం వినబోతున్నారు. జర్మనీ, యుఎస్, ఫ్రాన్స్,.. ఇలా విదేశీ వాయిద్య కారులతో పాటు దాదాపు 140మంది మ్యుజిషియన్స్ నేపధ్య సంగీతం కోసం పని చేశారు. మ్యూజిక్ విషయంలో చాలా హార్డ్ వర్క్ చేశాం.

ఇతర సినిమాలకి సీతారామం మ్యూజిక్ కి తేడా..!

మ్యూజికల్ గా చాలా రిచ్ గా వుంటుంది. సింథటిక్, ఫ్లాస్టిక్ మ్యూజిక్ కాకుండా చాలా ఆర్గానిక్ గా చేసిన సినిమా ఇది. ఈ సినిమా కోసం రాగాల విషయంలో రీసెర్చ్ కూడా చేశాను. 60, 80 దశకాలలో తెలుగు సినిమాలో ఎలాంటి రాగాలతో పాటలు వచ్చాయనే విషయంలో చాలా పరిశోధన చేశాను.

సాహిత్యాన్ని అర్ధం చేసుకోవడానికి…

పాటలో ఎక్స్ ప్రెషన్ ఉండాలంటే సాహిత్యాన్ని అర్ధం చేసుకోవడం చాలా ముఖ్యం. ప్రతి మాటకి ఖచ్చితంగా అర్ధం తెలుసుకుంటాను.

సీతారామంలో ఎన్ని పాటలు…

సీతారామంలో ఆరు పాటలు వున్నాయి. చిన్న బిట్ సాంగ్స్ మూడు వున్నాయి. ఇప్పటికే మూడు పాటలు రిలీజ్ అయ్యాయి.

మీకు ట్యూన్ చేయడానికి కష్టం అనిపించిన సందర్భం..

సీతారామంలో సెకండ్ హాఫ్ లో ఒక పాట వస్తుంది. భాద, ఆనందానికి సంబధించిన పాట కాదు.

మీకు స్ఫూర్తిని ఇచ్చే సంగీత దర్శకుడు…

రజింత్ బరోట్. తమిళ్ లో ప్రభుదేవా హీరోగా వీఐపీ అనే సినిమాకి సంగీతం అందించారు. ఆయన సంగీతం నాలో చాలా స్ఫూర్తిని నింపింది. ఆయన సంగీత దర్శకుడిగా కొనసాగలేదు. రెహ్మాన్ గారి ట్రూప్ లో మెయిన్ డ్రమ్మర్.

మీ సంగీత ప్రయాణం…

నా బాల్యం నుండే ప్రయాణం మొదలైయింది. నా ఆసక్తి చూసి అమ్మనాన్న కీ బోర్డ్ కొనిపెట్టారు. అలా సంగీత ప్రయాణం మొదలైయింది.

ఏ దర్శకులతో కలసి పని చేయాలనుకుంటున్నారు..

మిస్కిన్ గారి సినిమాలకి పని చేయాలని వుంది. మంచి కథ రాసే ఎవరైనా సరే వారితో కలిసి పని చేయాలనీ కోరుకుంటున్నాను.

కొత్తగా చేయబోతున్న సినిమాలు…

మాధవన్ గారితో ఒక సినిమా చర్చల్లో వుంది.