మెగాస్టార్ బర్త్ డే స్పెషల్స్: గ్రామీణ నేపథ్యంలో చిరంజీవి మాసివ్ హిట్ ‘కొండవీటి రాజా’

సినిమాల్లో గ్రామీణ నేపథ్యం ఉన్న కథలకు ఎప్పుడూ ఆదరణ ఉంటుంది. అటువంటి కథలు పాత తరంతోపాటు 80వ దశకంలో కూడా వచ్చాయి. వీటికి స్టార్ ఇమేజ్ తోడైతే సినిమా ఓ రేంజ్ లో ఉంటుంది. ఆ తరహాలో సూపర్ హిట్ అయిన చిరంజీవి సినిమా ‘కొండవీటి రాజా’. సహజంగానే గ్రామీణ నేపథ్యం, పంట పొలాలు, పాడి, గ్రామాల్లో చిత్రీకరణ, కుటుంబ కథలు ప్రేక్షకులను మెప్పిస్తాయి. దీనికి ఆకట్టుకునే కథ కీలకం. ఇవన్నీ కొండవీటి రాజాలో ఉన్నాయి. చిరంజీవికి స్టార్ ఇమేజ్ వచ్చాక మాస్, యాక్షన్ సినిమాలే చేసారు. వీటికి భిన్నంగా గ్రామీణ నేపథ్యంలో ఈ సినిమా చేశారు. అచ్చ తెలుగు సంప్రదాయ పంచెకట్టులో చిరంజీవి కనిపిస్తారు. ఎడ్ల పందాలు, కర్రసాము వంటి గ్రామీణ క్రీడలు ప్రేక్షకులను అలరించాయి.

చిరంజీవి మేనరిజమ్..

చిరంజీవి ముగ్గురు మొనగాళ్లు సినిమాలో కోట శ్రీనివాసరావు ఓ సందర్భంలో.. ‘మొదట హీరో దొంగగా వచ్చి క్లైమాక్స్ లో నేనే అసలైన పోలిస్ అంటాడు’ అని సందర్భానుసారం ఓ డైలాగ్ అంటారు. అచ్చం అలాంటి కథే కొండవీటి రాజా. రివెంజ్ డ్రామానే అయినా మొదట పల్లెటూరి యువకుడిగా నటించిన చిరంజీవి సెకండాఫ్ లో పురావస్తు శాఖ అధికారిగా కనిపిస్తారు. గ్రామంలోని ఓ కోటలోని నిధిని విలన్ల దక్కకుండా చేసే అధికారిగా నటిస్తారు. ఈ తరహా కథ, కథనం ప్రేక్షకులకు బాగా నచ్చింది. దీంతో సినిమా సూపర్ హిట్ గా నిలిచింది. సినిమాలో చిరంజీవి మేనరిజమ్ ‘దెబ్బక్కాయ్.. ట్టో’ ఫేమస్ అయింది. కొబ్బరికాయను మోచేత్తో కొట్టడం, కాలు కింద పెట్టకుండా ఫైట్ చేయడం ప్యాన్స్ తో ఈలలు వేయించాయి.

పాటలు హైలైట్

విలన్లతో చిరంజీవి చేసే కామెడీ, ఆటపట్టించడం, చిరంజీవి హీరోయిజం, మాస్ పాత్ర ఫ్యాన్స్ ను అలరించాయి. సినిమాలో ఇద్దరు హీరోయిన్లుగా అప్పటికే చిరంజీవికి సరిజోడుగా పేరు తెచ్చుకున్న విజయశాంతి, రాధ నటించారు. వీరితో చిరంజీవి అల్లరి ఆకట్టుకుంటుంది. వీరిమధ్య ప్రేమ, సెంటిమెంట్ సన్నివేశాలు ప్రేక్షకులను అలరించాయి. పాటల్లో వీరి జోడి, డ్యాన్స్ ప్రేక్షకులను అలరించాయి. ముఖ్యంగా పాటల చిత్రీకరణలో దర్శకేంద్రుడి స్టైల్ కనిపిస్తుంది. చక్రవర్తి మరోసారి తన బాణీల పవర్ చూపించి వీనులవిందైన పాటలు అందించారు. వీటిలో ‘మంచమేసి.. దుప్పటేసి మల్లెపూలు జల్లాను రారా..’ అనే పాట మాస్ బీట్ తో ధియేటర్లను హోరెత్తించింది.

నిర్మాత సంచలన ప్రకటన..

దేవీ ఫిలిం ప్రొడక్షన్స్ బ్యానర్ పై చిరంజీవికి లక్కీ ప్రొడ్యూసర్ గా పేరున్న కె.దేవీవరప్రసాద్ ఈ సినిమా నిర్మించారు. అడవిదొంగతో బాక్సాఫీసు లెక్కల్ని షేక్ చేసిన కె.రాఘవేంద్రరావు మరోసారి చిరంజీవితో తన మ్యాజిక్ చేసి చూపించారు. 1986 జనవరి 31న విడుదలైన ఈ సినిమా సూపర్ హిట్టయింది. సుప్రీంహీరోగా వెలిగిపోతున్న చిరంజీవి ఇమేజ్ పెంచింది. 25 కేంద్రాల్లో 100 రోజలు పూర్తి చేసుకుని శతదినోత్సవ సినిమాగా నిలిచింది. ఎన్టీఆర్, చిరంజీవితో కలిపి తిరుగులేని మనిషి తీసిన దేవీవరప్రసాద్ ఓ సందర్భంలో.. ‘ఎన్టీఆర్, చిరంజీవిలతో తప్ప మరెవరితోనూ సినిమా తీయను’ అనే స్టేట్మెంట్ ఇచ్చి సంచలనం రేపారు. నిజంగానే ఎన్టీఆర్ తర్వాత ఆయన చిరంజీవితోనే సినిమాలు చేసారు.