ఫాదర్స్ డే స్పెషల్‌.. టాలీవుడ్ తండ్రి కొడుకులు చాలా స్పెషల్‌

టాలీవుడ్ లో వారసులు ఎక్కువే అనే విషయం తెల్సిందే. ముఖ్యంగా తండ్రి హీరో అయితే ఆయన పిల్లల్లో ఎక్కువ శాతం హీరోలుగా అవుతున్న వారే ఉన్నారు. ఇప్పటికే ఉన్న స్టార్‌ హీరోల్లో మెజార్టీ శాతం స్టార్ హీరోల పిల్లలే ఉన్నారు. అందులో సూపర్ స్టార్‌ లు అయిన వారు కూడా చాలా మంది ఉన్నారు. ఇండస్ట్రీలో తండ్రి కొడుకులు మరియు తండ్రి కూతుళ్ల మద్య అనుబంధం ఎలా ఉంటుంది… వారు వెండి తెరపై ఎలా కనిపించారు అనేది నేడు ఫాదర్స్ డే సందర్బంగా చూద్దాం..

చిరంజీవి – చరణ్‌

ప్రస్తుత జనరేషన్ కు ఈ తండ్రి కొడుకుల గురించి ప్రత్యేకంగా చెప్పనక్కర్లేదు. చరణ్ అంటే చిరంజీవికి ఎంతటి అభిమానం ప్రేమ ఉంటుందో అందరికి తెల్సిందే. చిరంజీవి మరియు చరణ్ లను పలు సందర్బాల్లో వెండి తెరపై చూశాం. ఆచార్య సినిమా లో ఒక పూర్తి స్థాయి మల్టీ స్టారర్ గా తాజాగా ప్రేక్షకుల ముందుకు వచ్చింది. వీరిద్దరి మద్య ఉండే ప్రేమ అన్యోన్యత గురించి ఎంత చెప్పినా తక్కువే అంటూ మెగా ఫ్యాన్స్ అంటూ ఉంటారు.

ఎన్టీఆర్‌ – బాలయ్య…

సీనియర్ ఎన్టీఆర్ నట వారసుడిగా బాలకృష్ణ ఇండస్ట్రీలో అడుగు పెట్టాడు. తండ్రి వారసత్వంను పుణికి పుచ్చుకుని మూడు దశాబ్దాలుగా ఇండస్ట్రీలో ఒక వెలుగు వెలుగుతున్నాడు. తన ప్రతి సినిమా లో కూడా ఏదో ఒక సమయంలో తండ్రి ఎన్టీఆర్‌ ప్రస్థావన డైరెక్ట్‌ గా లేదా ఇండైరెక్ట్ గా తీసుకు వస్తాడు. బాలయ్య కు తండ్రి ఎన్టీఆర్ అంటే ఎంత అభిమానమో ఆయన మాటలు మరియు చేతలను బట్టి అర్థం అవుతుంది. పలు సినిమాల్లో ఈ తండ్రి కొడుకులు కలిసి నటించారు.

నాగేశ్వర రావు – నాగార్జున 

టాలీవుడ్ సినీ ఇండస్ట్రీలో అక్కినేని నాగేశ్వరరావు నటవారసుడిగా నాగార్జున అడుగుపెట్టి తనకంటూ ప్రత్యేక గుర్తింపు తెచ్చుకున్నారు. అంతేకాదు తండ్రి తగ్గ తనయుడు అనిపించుకున్నారు. ఆయనతో ఆరు సినిమాల్లో స్క్రీన్ షేర్ చేసుకున్నారు. నాగార్జున తండ్రి అక్కినేని బాటలో నటుడిగా నిర్మాతగా రాణిస్తున్నారు. ఇక నాగార్జున నట వారసులుగా నాగ చైతన్య, అఖిల్ కూడా ఇండస్ట్రి లోకి అడుగుపెట్టిన సంగతి తెలిసిందే

కృష్ణ – మహేష్‌ బాబు..

టాలీవుడ్‌ సూపర్ స్టార్‌ గా కృష్ణ ఏ స్థాయి లో సక్సెస్‌ అయ్యారో అంతకు మించి అన్నట్లుగా ఆయన వారసుడు మహేష్ బాబు సక్సెస్ అయ్యారు. తండ్రికి తగ్గ కొడుకు.. తండ్రిని మించిన కొడుకు అన్నట్లుగా మహేష్‌ బాబు పేరు దక్కించుకున్నాడు. ఎంత ఎదిగినా ఒదిగే ఉండాలి అన్నట్లుగా మహేష్ బాబు తన తండ్రి వద్ద చాలా వినమ్రంగా ఉంటూ గౌరవిస్తూ ఉంటారు. ఇప్పటికి కూడా కృష్ణ అంటే ఎంతో గౌరవంతో మహేష్‌ బాబు వ్యవహరిస్తూ ఉంటాడు. మహేష్‌.. కృష్ణ కలిసి చాలా సినిమాల్లో నటించారు. మరో వైపు మహేష్ బాబు కూడా తండ్రిగా మారి గౌతమ్‌ మరియు సితారలను గొప్ప వాళ్లుగా తీర్చి దిద్దే క్రమంలో ఉన్నాడు. త్వరలో గౌతమ్‌ స్టార్‌ నటుడు అయ్యే అవకాశం ఉంది.. సితార కూడా తాను ఉన్న రంగంలో ఉన్నత స్థాయి లో ఉండే అవకాశం ఉంది. మహేష్ సినిమాలో గౌతమ్‌ నటించిన విషయం తెల్సిందే.

హరికృష్ణ – ఎన్టీఆర్‌ – కళ్యాణ్ రామ్‌…

సీనియర్ ఎన్టీఆర్‌ తనయుడు హరికృష్ణ. సినిమా ల్లో హరికృష్ణ రాణించాడు. ఆయన వారసులు ఎన్టీఆర్ మరియు కళ్యాణ్‌ రామ్‌. ఇద్దరు కూడా ఇండస్ట్రీలో ప్రస్తుతం వరుసగా సినిమాలు చేస్తూ నందమూరి అభిమానులను ఎంటర్‌ టైన్ చేస్తూ వస్తున్నారు. కొన్నాళ్ల క్రితం హరికృష్ణ చనిపోయిన సమయంలో ఎన్టీఆర్‌.. కళ్యాణ్ రామ్‌ లు ఎంతగా మదన పడ్డారో తెల్సిందే. ఇద్దరికి కూడా హరికృష్ణ తో ఎంతో అన్యోన్యత ఉంది. ఎన్టీఆర్‌ తన ప్రతి సందర్బంలో కూడా తండ్రి హరికృష్ణను తల్చుకుంటూ ఉంటాడు.

మోహన్‌ బాబు – మంచు విష్ణు – మంచు మనోజ్‌ – మంచు లక్ష్మి..

టాలీవుడ్‌ లో సీనియర్‌ హీరో అయిన మోహన్‌ బాబు నట వారసులుగా ఆయన ముగ్గురు పిల్లలు ఎంట్రీ ఇచ్చారు. ఆ ముగ్గురు కూడా ప్రస్తుతం ఇండస్ట్రీలో మంచి గుర్తింపు దక్కించుకున్నారు. ఆ ముగ్గురికి తండ్రి మోహన్‌ బాబు అంటే ఎంతో గౌరవం మరియు మర్యాద.

ఇంకా ఇండస్ట్రీలో ఎంతో మంది స్టార్స్ వారి తండ్రులను గురించి గొప్పగా చెప్పుకోవడం.. తండ్రుల వల్ల ఇండస్ట్రీలో అడుగు పెట్టడం జరిగింది. హీరోయిన్స్ లో కూడా చాలా మంది తండ్రులకు చాలా ఎమోషనల్‌ బాండింగ్  ఉంది అంటూ పలు సందర్బాల్లో చెబుతూ వచ్చారు. ఇక తెలుగు సినిమా ఇండస్ట్రీలో తండ్రి కొడుకులు మరియు తండ్రి కూతుర్ల కు సంబంధించిన సెంటిమెంట్‌ సినిమాలు వందల కొద్ది వచ్చాయి. అందులో సూపర్‌ హిట్ సినిమాలు కూడా ఉన్నాయి. నాన్నకు ప్రేమతో.. మా నాన్నకు పెళ్లి… అమ్మా నాన్న ఓ తమిళ అమ్మాయి ఇలా నాన్న నేపథ్యంలో చాలా చాలా సినిమాలు చేసిన ఘనత కూడా తెలుగు ఫిల్మ్‌ స్టార్స్ కి మాత్రమే దక్కింది.