రాజ్యసభకు వెళ్ళే అర్హత, దళితులకి, మైనార్టీలకీ లేదా.?

‘నాలుగు రాజ్య సభ సీట్లలో రెండిటిని మేం బీసీలకు ఇచ్చాం. యాభై శాతం కోటా బీసీల విషయంలో అమలు చేస్తున్న పార్టీ వైసీపీ మాత్రమే..’ అని వైసీపీ ఘనంగా చెప్పుకుంటోన్న సంగతి తెలిసిందే. నిజమే, వైసీపీ నుంచి రాజ్యసభ సభ్యుల కోటాలో బీసీలకు  అవకాశం దక్కుతున్నమాటని ఎవరూ కాదనలేరు. అయితే, ఇక్కడ బీసీ కోటాలో ఎవర్ని రాజ్యసభకు పంపుతున్నారన్నదే కీలకం. సరే, ఏ రాజకీయ పార్టీకి అయినా కొన్ని ‘అవసరాలు’ వుంటాయి, వాటికి తగ్గట్టే రాజ్యసభ సభ్యుల ఎంపిక వుంటుంది. వైసీపీ కూడా అదే చేస్తోంది.

అయితే, మైనార్టీల సంగతేంటి.? దళితుల మాటేమిటి.. ఇతర సామాజిక వర్గాల సంగతేంటి.? రెండు సీట్లు బీసీలకి, రెండు సీట్లు రెడ్డి సామాజిక వర్గానికి ఇచ్చుకునే బదులు, ఓ మైనార్టీకీ, ఓ దళిత వ్యక్తికీ రాజ్యసభ అవకాశాన్ని కల్పించొచ్చు కదా.? అన్నది వైసీపీలోనే అంతర్గతంగా జరుగుతున్న చర్చ.

‘వస్తాయ్.. ముందు ముందు వాళ్ళకీ వస్తాయ్..’ అని వైసీపీ చెబుతోంది. గతంలో అయినా, ఇప్పుడు అయినా, రెడ్డి సామాజిక వర్గానికి వైసీపీలో అగ్రస్థానం అన్నది ఓపెన్ సీక్రెట్. మంత్రి వర్గంలో సామాజిక న్యాయం.. అని వైసీపీ చెబుతున్నప్పటికీ, పెత్తనమంతా సకల శాఖ మంత్రి సజ్జల రామకృష్ణారెడ్డి చేతిలోనే వుంది’ అనే విమర్శని అంత తేలిగ్గా కొట్టి పారేయలేం.

హోం శాఖ దగ్గర్నుంచి, అన్ని వ్యవహారాలపైనా సజ్జల రామకృష్ణారెడ్డి మీడియా ముందుకొచ్చి మాట్లాడతారు, వివరాలు చెబుతారు తప్ప, సంబంధిత మంత్రుల స్పందన తగినంత వివరణాత్మకంగా కనిపించదు.

రాజ్యసభ సభ్యుల విషయానికొస్తే, రాజ్యసభకు వెళుతున్న వైసీపీ ఎంపీల్లో ఎంతమంది రాష్ట్రం తరఫున ప్రత్యేక హోదా కావొచ్చు, ఇతర విషయాల్లో కావొచ్చు గట్టిగా కేంద్రాన్ని నిలదీయగలుగుతారు.?

మొత్తమ్మీద.. విజయసాయిరెడ్డికి రెండో సారి అవకాశమిచ్చిన వైసీపీ అధిష్టానం, ఆ స్థానంలో ఓ మైనార్టీని సమర్థ నాయకుడిగా చూడలేకపోవడం, ఓ దళిత నాయకుడ్ని సమర్థుడిగా చూడలేకపోవడం ఆశ్చర్యకరమే.

వైసీపీ చేసుకునే పబ్లిసిటీకీ, చేసే పనులకీ అస్సలు పొంతన వుండదని తాజాగా రాజ్యసభ సభ్యుల ఎంపిక వ్యవహారంలో స్పష్టమైపోయింది. ఈ విషయమై వైసీపీలోనే అంతర్గతంగా తీవ్రమైన చర్చ నడుస్తోంది. ‘మేమెవరం అర్హులుగా, సమర్థులుగా అధినేతకు కనిపించలేదా.?’ అని మైనార్టీ, దళిత నాయకులు వాపోతున్నారట.