బోధన్ లో 144 సెక్షన్..! శివాజీ విగ్రహ ఏర్పాటుపై ఇరువర్గాల మధ్య ఘర్షణ

నిజామాబాద్ జిల్లా బోధన్ పట్టణంలో ఉద్రిక్త పరిస్థితులు తలెత్తాయి. చత్రపతి శివాజీ విగ్రహం విషయంలో ఇరు వర్గాల మధ్య ఘర్షణ తలెత్తింది. దీంతో పరిస్థితి అదుపు తప్పింది. స్థానిక అంబేద్కర్ చౌరస్తాలో చత్రపతి శివాజీ విగ్రహం ఏర్పాటు చేయాలని ఓ వర్గం భావించింది. దీనిని మరో వర్గం వ్యతిరేకించింది. దీంతో రెండు వర్గాల మధ్య వాగ్వివాదం జరిగడంతో పరిస్థితులు ఘర్షణకు దారి తీశాయి. దీంతో ఇరు వర్గాలు రాళ్ల దాడికి పాల్పడ్డారు.

పరిస్థితులు ఉద్రిక్తంగా మారడంతో పోలీసులు రంగ ప్రవేశం చేశారు. ఆందోళనకారులను చెదరగొట్టారు. పోలీసులపైనా ఓ వర్గం రాళ్ల దాడికి పాల్పడగా వారిపై లాఠీచార్జి చేశారు. అయినా.. పరిస్థితి అదుపులోకి రాలేదు. టియర్ గ్యాస్ ప్రయోగించి పరిస్థితులను అదుపులోకి తెచ్చే ప్రయత్నం చేశారు. పరిస్థితులు మరింత ఉద్రిక్తం కాకుండా ఉండేందుకు భారీ పోలీసు బందోబస్తు ఏర్పాటు చేశారు. దీంతోపాటు పట్టణంలో 144 సెక్షన్ విధించారు. పాలనాపరమైన అనుమతులు ఉంటేనే శివాజీ విగ్రహ ఏర్పాటుకు అనుమతిస్తామని పోలీసులు అంటున్నారు.