మూడు రాజధానులు అలా.! 26 జిల్లాలు ఇంకెలా.?

అభివృద్ధి వికేంద్రీకరణ ముసుగులో పరిపాలనా వికేంద్రీకరణ.. అంటూ వింత నాటకానికి తెర లేపి బొక్క బోర్లా పడింది వైఎస్ జగన్ ప్రభుత్వం. ఆంధ్రప్రదేశ్ వాస్తవ పరిస్థితేంటీ.? రాష్ర్టానికి ఏం కావాలి.? అన్న కనీస ఇంగితం లేకుండా మూడు రాజధానుల నాటకాన్ని తెర పైకి తెచ్చి, దాదాపు రెండున్నరేళ్లుగా రాజధాని విషయంలో గందరగోళాన్ని కొనసాగిస్తూ వచ్చారు. వున్నదీ పాయె, వుంచుకున్నదీ పాయె.. అన్నట్లు తయారయింది రాష్ర్టం పరిస్థితి.

మూడు ముక్కలాటలో అడ్డంగా పేలి, ఇప్పుడు 26 ముక్కల కొత్త నాటకం షురూ చేశారు. 13 జిల్లాల ఆంధ్ర ప్రదేశ్ ఇకపై 26 జిల్లాల ఆంధ్ర ప్రదేశ్ కాబోతోందట. ‘పరిపాలనా సౌలభ్యం కోసం’ అని చెబుతోంది వై ఎస్ జగన్ ప్రభుత్వం. లోక్‌సభ నియోజక వర్గం యూనిట్‌గా ఈ జిల్లాల విభజన జరగబోతోందట. ఎన్నికల్లో హామీ ఇచ్చారు కనుక.. నెరవేర్చేస్తారట. కానీ, ఎలా.?

మూడు ముక్కలాట అతీ గతీ లేకుండా పోయినట్లే.. 26 జిల్లాల కథ కూడా కొన్నాళ్లు నడిచీ, నడిచీ చివరకి సార్వత్రిక ఎన్నికల ముంగట బొక్క బోర్లా పడుతుందేమో. తెలంగాణలో జిల్లాల విభజన సజావుగానే జరిగింది కాబట్టి, ఆంధ్ర ప్రదేశ్‌లోనూ జిల్లాల విభజన బహు బాగా జరిగిపోతుందనుకుంటే, పొరపాటే.

తెలంగాణ పరిస్థితులు వేరు. అక్కడి ఆర్ధిక స్థితిగతులు వేరు. అక్కడి సెంటిమెంట్లు వేరు. ఆంధ్రప్రదేశ్ భౌగోళిక, ఆర్ధిక పరిస్థితులు, సామాజిక పరిస్థితులు వేరు. కొత్త జిల్లాల పుణ్యమా అని రాష్ర్టంపై అదనపు ఆర్ధిక భారం పడే పరిస్థితి వస్తే, బాధ్యత ఎవరిది.?

కొత్త కలెక్టరేట్లు సహా చాలా చిక్కులుంటాయ్. ఆయా ప్రాంతాల్లో సెంటిమెంట్లు.. ఆర్ధిక సమీకరణాలు.. ఇలా సెగ రాజుకోవడం ఖాయం. శ్రీకాకుళం జిల్లానే తీసుకుంటే, ఎట్టి పరిస్థితుల్లో విభజనని ఒప్పుకునేది లేదంటూ అక్కడి జనం ముక్త కంఠంతో నినదిస్తున్నారు. మరికొన్ని చోట్లా ఇదే పరిస్థితి వుంది. జిల్లాల విభజనతో చిచ్చు రేగితే, అది ముమ్మాటికీ రాష్ర్ట భవిష్యత్తుకి శాపం అవుతుంది.