తప్పు చెయ్యకపోతే వైసీపీకి అంత భయమెందుకు.?

మహిళ అని చూడకుండా ఓ అభ్యర్థి మీద దాడి చేసి, ఆమె ప్రైవేట్ పార్ట్స్ తాకుతూ, ఆమె దాచుకున్న నామినేషన్ పత్రాల్ని చింపేశాడో వైసీపీ నేత. ఓ వృద్ధుడిని రక్తమొచ్చేలా కొట్టి అతనిచేత నామినేషన్ ఉపసంహరించేలా చేయడానికి ప్రయత్నంచాడు మరో వైసీపీ నేత. ఇళ్ళ మీద దాడులకు వెళ్ళడం.. చిన్న పిల్లలపై దాడులు చేయడం.. ఒకటా.? రెండా.? పదుల సంఖ్యలో, వందల సంఖ్యలో ఇలాంటి ఘటనలు జరిగాయి. గత ఏడాది స్థానిక ఎన్నికల ప్రక్రియ ప్రారంభమయిన తరుణంలో తలెత్తిన రావణ కాష్టమిది.

అప్పట్లో పరిస్థితి తీవ్రతను చూసి చలించిపోయిన రాష్ట్ర ఎన్నికల కమిషనర్, కేంద్ర హోంశాఖకు ఫిర్యాదు చేసిన విషయం విదితమే. ఏమయ్యిందోగానీ, ఇప్పుడు ఎస్ఈసీ ‘ఆల్ ఈజ్ వెల్’ అనే మంత్రం జపిస్తున్నారు. పంచాయితీ ఎన్నికల వేళ బలవంతపు ఏకగ్రీవాలు జరిగాయి.. ఓటుకి వెయ్యి రూపాయల నుంచి 10 వేల రూపాయల దాకా ధర పలికింది. కొన్ని చోట్ల ఏకగ్రీవాల కోసం 50 నుంచి 60 లక్షలదాకా ఖర్చు చేశారు అధికార పార్టీ మద్దతుదారులు. ఇవన్నీ కళ్ళముందు కనిపిస్తున్నవే. అయినాగానీ, అంతా ప్రశాంతం.. అన్నది ఎస్ఈసీ వాదన.

ఇక, మున్సిపల్ ఎన్నికలు.. పరిషత్ ఎన్నికలు ముంచుకొస్తున్నాయి. గతంలో ఎక్కడైతే ప్రక్రియ ఆగిందో, అక్కడి నుంచే మళ్ళీ ప్రక్రియ మొదలవుతుందట. ఇదెక్కడి న్యాయం.? అని అంతా ముక్కున వేలేసుకుంటున్నారు. ‘బలవంతపు నామినేషన్ల ఉప సంహరణకు సంబంధించి ఆధారాలు చూపిస్తే, ఇంకో అవకాశం’ అంటోంది ఎస్ఈసీ. ‘తూచ్, అలా కుదరదు..’ అని అధికార పార్టీ నేతలు మేకపోతు గాంభీర్యం ప్రదర్శిస్తున్నారు. అక్కడికేదో ఎస్ఈసీ, అధికార పార్టీకి వ్యతిరేకంగా వ్యవహరిస్తున్నట్లు ప్రొజెక్షన్ జరుగుతోందంతే. కానీ, తెరవెనుకాల కథ వేరేలా వుంది.

‘నాకు వైఎస్సార్ అంటే చాలా అభిమానం..’ అని సాక్షాత్తూ రాష్ట్ర ఎన్నికల కమిషనర్ చెప్పడమేంటి.? ‘నేను తిట్టినట్లు నటిస్తాను.. నువ్వు ఏడ్చినట్లు నటించు..’ అన్నట్టుంది వైసీపీ, ఎస్ఈసీ వ్యవహారం.. అన్నది తెరపైకొస్తున్న కొత్త అనుమానం. అయినా, పంచాయితీ ఎన్నికల్లో 80 శాతం పైగా స్థానాలు తామే గెలిచామని చెప్పకుంటోన్న వైసీపీకి, కొత్తగా మళ్ళీ పరిషత్, మున్సిపల్ ఎన్నికల ప్రక్రియ ప్రారంభమయితే వచ్చే నష్టమేంటట.? అంటే, గతంలో తాము అడ్డగోలు చర్యలకు పాల్పడ్డామనీ, అవన్నీ ఇంకోసారి చేయాల్సి వస్తే.. అదనపు ఖర్చు దండగ అనీ వైసీపీ చెప్పకనే చెబుతున్నట్లే కదా.?