పవన్ కళ్యాణ్ మూడు పెళ్ళిళ్ళు చేసుకున్నారు.! ఇది అందరికీ తెలిసిన విషయమే. ఇందులో దాపరికం ఏమీ లేదు.! వైఎస్ జగన్ సోదరి వైఎస్ షర్మిలకి ప్రస్తుత భర్త అనిల్‌తో జరిగింది రెండో వివాహమే కదా.!
ఈ రోజుల్లో పెళ్ళి లేదా పెళ్ళిళ్ళ గురించి అభ్యంతరకర వ్యాఖ్యలు చేయడమంటే, అంతకన్నా హాస్యాస్పదం ఇంకోటుండదు. అందునా, రాజకీయ నాయకులు పెళ్ళిళ్ళ గురించి మాట్లాడితే, అది ఇంకా హాస్యాస్పదం. మాట్లాడినోళ్ళ పరువే పోతుంటుంది.!
అసలు విషయానికొస్తే, తాజాగా ఇంకోసారి ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డి, జనసేన అధినేత పవన్ కల్యాణ్ పెళ్ళిళ్ళ గురించి ఓ అధికారిక బహిరంగ సభలో అభ్యంతరకర వ్యాఖ్యలు చేశారు. ‘పెళ్ళి చేసుకుని, మూడు నాలుగేళ్ళు కూడా కాపురం చెయ్యకుండానే ఇంకో పెళ్ళి చేసుకుంటారనీ.. మూడు నాలుగేళ్ళకోసారి కార్లను మార్చినట్లు భార్యల్ని మార్చుతుంటారనీ’ పవన్ కళ్యాణ్ మీద సెటైర్లేశారు వైఎస్ జగన్.
వైఎస్ జగన్ కేవలం వైసీపీ అధినేత మాత్రమే అయితే, ఇలాంటి వ్యాఖ్యల్ని ఆయన విజ్ఞతకి వదిలేయొచ్చు. కానీ, ఆయన ఆంధ్రప్రదేశ్ రాష్ట్రానికి ముఖ్యమంత్రి. అక్కడ కార్యక్రమం కూడా చిన్న పిల్లలకు సంబంధించింది. సంక్షేమ పథకానికి సంబంధించి, లబ్దిదారుల ఖాతాల్లోకి నిధుల్ని విడుదల చేసే కార్యక్రమంలో ఈ ఛండాలం ఏంటి.?
‘ఛండాలం’ అనే మాట, అక్కడ ఆ కార్యక్రమానికి హాజరైన విద్యార్థులు, వారి తల్లిదండ్రుల నోట వినిపించడం గమనార్హం. 2024 ఎన్నికల్లో వైసీపీ దారుణమైన ఓటమిని చవిచూడబోతోందా.? అదే జరిగితే, అందులో ఈ ‘పెళ్ళిళ్ళ పేరుతో వెకిలి వ్యాఖ్యల’ వాటా కూడా ఎక్కువగానే వుండబోతోందన్నది నిర్వివాదాంశం.
వైఎస్ జగన్ వ్యక్తిగత జీవితం గురించి మాట్లాడాలని జనసేన అధినేత పవన్ కళ్యాణ్ అనుకుంటే ఎంత సేపు.? ఆ తర్వాత వైఎస్ జగన్ తలెత్తుకు తిరగలేరంటూ సోషల్ మీడియాలో జనసేన మద్దతుదారులు కామెంట్ చేస్తున్నారు.
మొత్తమ్మీద, పవన్ కళ్యాణ్ వ్యక్తిగత జీవితం మీద విమర్శలు చేస్తే, అక్కడికేదో పవన్ కళ్యాణ్ రాజకీయంగా తగ్గుతారని ముఖ్యమంత్రి వైఎస్ జగన్ అనుకుంటున్నారేమోగానీ, ఆయన చేస్తున్న వ్యాఖ్యలు వైసీపీని రాజకీయంగా పాతరేసేసేలా వున్నాయ్.!