మద్య నిషేధమా.? అంటే ఏంటి.! నవ్విపోదురుగాక వాళ్ళకేటి.?

మద్య నిషేధం అంటే ఏంటి.? అని అమాయకంగా రేప్పొద్దున్న వైసీపీ నేతలు ‘నటించినా’ ఆశ్చర్యపోవాల్సిన పనిలేదు. అధికారంలోకి రాగానే, వారం రోజుల్లో సీపీఎస్ రద్దు చేస్తామని ప్రతిపక్ష నేతగా వున్న సమయంలో వైఎస్సార్ కాంగ్రెస్ పార్టీ అధినేత వైఎస్ జగన్ మోహన్ రెడ్డి ప్రకటించేశారు. అధికారంలోకి వచ్చాక, ‘సీపీఎస్ రద్దు వల్ల ప్రయోజనం లేదు..’ అంటూ వింత వాదనకు తెరలేపింది వైసీపీ.

రాజకీయ నాయకులకు రెండు నాల్కలుంటాయ్. కాదు కాదు, రెండు లక్షల నాల్కలుంటాయ్. ఏది ఎప్పుడు ఎలా మాట్లాడతారో వాళ్ళకే తెలియదు. కేంద్రం మెడలు వంచేసి ప్రత్యేక హోదా తెస్తామన్న వైసీపీ, అదే కేంద్రం ముందు తమంతట తాముగా మెడలు విరిచేసుకుని కూర్చుంది. ఎందుకిలా.? అని ప్రశ్నిస్తే, ‘చంద్రబాబు చేసిందేంటి.?’ అని ఎదురు ప్రశ్నించడం వైసీపీకే చెల్లింది. అయితే, టీడీపీని మూలన కూర్చోబెట్టినట్లు వచ్చే ఎన్నికల్లో వైసీపీని కూడా మూలన కూర్చోబెట్టెయ్యాలన్నమాట.. అని జనం డిసైడ్ అవ్వాల్సిందే.

మద్య నిషేధం విషయానికొస్తే, ఎన్ని కబుర్లు చెప్పారు.? ఇప్పుడు ఎన్ని వికృత చేష్టలు చేస్తున్నారు. మద్యం దుకాణాల దగ్గర టీచర్లను కాపలా పెట్టిన ఘన చరిత్ర వై‘ఛీప్’ సర్కారుది. అది గతం. ప్రభుత్వమే మద్యం దుకాణాల్ని నిర్వహిస్తూ, మద్య నిషేధం ఊసెత్తడంలేదు.

రాష్ట్రంలో బార్ల లైసెన్సుల్ని మళ్ళీ పొడిగించారు. సో, రాష్ట్రంలో మద్య నిషేధం అన్న ఊసే భవిష్యత్తులో వుండబోదన్నమాట. సీపీఎస్ రద్దు విషయంలో ఎలాగైతే వైఎస్ జగన్ అవగాహనా రాహిత్యంతో ప్రకటన చేశారో (అలాగని స్వయానా వైసీపీ ముఖ్య నేత, ప్రభుత్వ సలహాదారు సజ్జల సెలవిచ్చారు), మద్య నిషేధం విషయంలో కూడా అంతే అవగాహనా రాహిత్యంతో వైఎస్ జగన్ ఎన్నికల హామీ ఇచ్చారన్నమాట.

మధ్యలో జనమే వెర్రి వెంగళప్పలన్నమాట.. వైఎస్ జగన్ మోహన్ రెడ్డి మాటల్ని నమ్మినందుకు. నమ్మితే నట్టేట్లో మునిగిపోవాలని తెలియక జనం వైసీపీకి ఓట్లేశారా.? తెలిసీ వైసీపీ అనే బురదలోకి దిగారా.?

మొత్తమ్మీద, మద్యం మీద వచ్చే ఆదాయంపై వైసీపీ సర్కారు తన మమకారం చంపుకోలేకపోతోందన్నమాట. ఇక్కడ వైసీపీకి రెండు ప్రయోజనాలున్నాయ్.. అందులో అతి ముఖ్యమైనది, తమవైన సొంత అడ్డగోలు బ్రాండ్లను జనం మీద రుద్దేయొచ్చు.. మద్యం ద్వారా వచ్చే ఆదాయంతో సంక్షేమ పథకాల పేరుతో ఓటు బ్యాంకు రాజకీయాలూ చేయొచ్చు.!

దీన్ని పరిపాలన అంటారా.? వ్యాపారమంటారా.? నవ్విపోదురుగాక వాళ్ళకేటి.?